¿Kushishqa kawakïta puëdinkimanku?
SHAMOQ TIEMPUCHÖQA manam qeshyapäkushunnatsu, awkinyäshunnatsu ni wanushunnatsu. Tsënö kawakïtaqa llapantsikmi tarita puëdintsik. Peru kanan witsanqa, më tsëchömi mana alli kawakïlla kan. Tsëkuna jananchö kawëkarninqa, ¿kushishqa kawëta puëdinkimantsuraq? Diospa Palabranqa kushishqa y alli kawakunëkipaqmi yanapashunki. ¿Imanötaq mana allikunapa pasashqa yanapamantsik? Rikärishun.
KAPAMANQANTSIKLLAWANMI KUSHISHQA KANANTSIK
Diospa Palabran ninqan: “Imanöpis kawayanqëkichöqa qellë kuyë katsuntsu, y kayäpushunqëki cösaskunallawan kushishqa kayë” (Hebrëus 13:5).
Kanan witsan Diosta mana sirweq nunakunaqa, imëkayoq karninraq kushishqa kanapaq kaqtam niyan. Peru Diospa Palabranqa nin, kapamanqantsik cösaskunallawan kushishqa këta puëdinqantsiktam. ¿Imatataq ruranantsik kushishqa kanapaq?
Manam qellëta kuyanantsiktsu. ‘Qellëta kuyarninmi’ mëtsikaq nunakunaqa amïgunkunata, salorninkunata oqrayashqa, familiankunawan kushishqatsu kayan, y alläpa mana allikunata rurayan (1 Timoteu 6:10). Jina qellëta kuyaq nunaqa “manam tarinqanwan kushishqatsu” kawan (Eclesiastes 5:10). ¡Qellërëkurmi nunakunaqa kushishqatsu kawayan!
Kapamanqantsik cösaskunapitaqa nunakunatam mas kuyanantsik. Juk nunaqa kuyamantsik y shumaqmi parlapämantsik, peru kapamanqantsik cösaskunaqa yanapakurpis manam tsëkunata rurëta puëdintsu. Mas kushishqaqa kantsik, juk alli amïguyoq karninmi (Proverbius 17:17).
DIOSPA PALABRAN NINQANTA CÄSUKURQA KUSHISHQAM KAWAKUSHUN
ALLÄPA MANA QESHYAPÄKUNAPAQ
Diospa Palabran ninqan: “Kushishqa këkaq shonquqa, imëka kachakätsikoq jampinömi” (Proverbius 17:22).
Kushishqa këqa alläpam yanapakun qeshyapäkushqapis. Peru ¿imanötaq kushishqa kashwan imëpis qeshyapäkïkarninqa?
Agradecikoqmi kanantsik. Qeshyapäkunqantsikllaman imëpis yarparäkurninqa, manam kushishqa këta puëdishuntsu (Proverbius 15:15). Tsëmi Diospa Palabranqa kënö nimantsik: “Agradecikoq kayanqëkita rikätsikuyë” (Colosensis 3:15). Llapampitam gracias nikïta yachakunantsik. Inti jeqanqanta rikar, lamar kuchunchö purir o familiantsik kushishqa këkanqanta rikarninmi gracias nikunantsik.
Wakinkunatam yanapanantsik. Diospa Palabranqa nimantsik wakinkunata yanapë “imata chaskipitapis” mas kushikïta apamunqantam (Hëchus 20:35). Yanapanqantsikpita wakinkuna kushishqa këkäyanqanta rikarqa, kikintsikpis kushishqam sientikuntsik y mana allikunapa pasanqantsiktapis qonqarintsikmi.
FAMILIACHÖ ALLI KAWAKUNAPAQ
Diospa Palabran ninqan: “Mas precisaq cösaskunapita segurakuyänëkipaq” (Filipensis 1:10).
Juk nuna warminwan o juk warmi nunanwan imatapis juntu mana rurarninqa, mana reqinakushqanönam kawar qallëkuyanqa. Tsëmi juk ollquqa warminta imëkapitapis mas puntaman churanan, jina tsënöllam juk warmipis nunanwan ruranan.
Imallatapis juntu rurayë. Diospa Palabranchöqa nin “jukllaqllapitaqa, ishkaqmi mas alli kanqa” (Eclesiastes 4:9). Japallëkilla imatapis rurakunëkipa rantinqa, ishkëkikuna rurëta puëdiyanqëki kaqman pensë. Itsa ishkëkikuna imallatapis mikuyänëkipaq rurayankiman, pasiaq yarquyankiman, y jamayanqëki junaq imallatapis rurayankiman.
Kuyanakuyanqëkitam rikätsinakuyänëki. Diospa Palabranqa nin warmiwan ollqu kuyanakuyänampaq y respetanakuyänampaqmi (Efesius 5:28, 33). Kuyanakïllapa shumaq parlapänakuyanqan, kuyapänakuyanqan y imallatapis qaranakuyanqanqa alläpam yanapakun. Jina majankunallapaq karninmi, jukwanqa ewkuyanmantsu (Hebrëus 13:4).