Tapukïkuna kaq
◼ Juk publicador bautisakïta munarninqa, ¿imanötaq këkanman reunionkunaman ëwëchö y yachatsikoq yarqïchö?
Bautisakunapaq akranqantsikmi imëkapitapis mas precisaq kaqqa. Tsëmi, bautisakunampaq anciänukuna manaraq niyaptin, bautisakïta munaq nunaqa alliraq käyinan (mayanan) Jehovä pëpita imata shuyaranqanta. Jinamampis, llapan shonqunwanmi rikätsikunan Dios munanqannö rasumpa kawëta munanqanta.
Llapan cristiänukunatam Bibliaqa nimantsik reunionkunaman mana faltëpa ëwanapaq, y bautisakïta munaq publicadorpapis tsëllam costumbrin kanman (Heb. 10:24, 25). Jina preparakunqampitam reunionkunachö comentanan. Y Yachatsikunapaq Diospa Escuëlanchömi matriculädu këkanman, bautisakunampaq mana precisaptimpis.
Llapan cristiänukunam alli willakïtaqa yachatsikunantsik, tsënöpa Jesuspa mushoq qateqninkuna kayänampaq, bautisakïta munaq mushoq publicadorqa yachatsikoqmi imëpis yarqïkanman (Mat. 24:14; 28:19, 20). ¿Ëka killapataq publicador kanman manaraq bautisakurnin? Cada killakuna yachatsikoq yarqunampaq decidishqa kanqanta rikätsikunampaqqa, atska tiempupanam yachatsikïkanman (Sal. 78:37). Tsënö kaptimpis, manam atska tiempuraqtsu pasashqa kanman, itsa juk ishkë o mas killakunalla. ¿Y ëkatataq killachö informanman? Manam ëkata informanampaq patsakashqa hörakuna kantsu. Anciänukunaqa cada publicadorpa tukïläya necesidäninkunata alli rikëkurmi imatapis decidiyanman (Lüc. 21:1-4).
Anciänukunaqa (mana kaptinqa siervu ministerialkunaqa) alleqmi musyayänan bautisakoqpaq kaq publicadorkunaqa alläpa juklayayan kayanqanta, imatapis alli rikëkurmi bautisakunampaq o mana bautisakunampaq decidiyanman. Bautisakïta munarqa alli clärum rikätsikunan Jehoväpa testïgun këta munanqanta, Diospa markanwan juntakanqanta y nunakunata yachatsita kuyanqanta. Anciänukunaqa manam Jehoväta unëna sirweq cristiänunö Diospa kaqchö poqushqa y yachaq kanantaraq bautisakïta munaq publicadorpita shuyaräyanmantsu. Manaraq bautisakunampaq kaqta anciänukuna rikarninqa, shumaq kuyëllapam Bibliawan rikäratsiyanman imanir manaraq bautisakïta puëdinqanta y Diospa kaqchö pillapis mas yanapanampaq kaqtam rikäyanman.