Jehoväqa bendicinmi yuriyanqan nacionman kuteqkunata

ATSKAQ wawqi panikunam reqishqa nacionkunaman ëwayanqampita yapë kutiyashqa yuriyanqan nacionman. Jehoväta y nuna mayinta kuyayanqanrëkurmi, Diospita yachatsikoqkunata wanayanqan markakunaman ëwayashqa (Mat. 22:37-39). Tsëpaqqa, ¿imatatan rurayashqa? ¿Imanötan Jehovä pëkunata bendicishqa? Camerun nacionchö pasanqampita yachakushun.

“‘PESCÄDUTA TSARINAPAQ’ ALLI SITIU”

1998 watachömi Onësime jutiyoq wawqi Camerun nacionnimpita juk nacionman ëwakurqan y 14 watapam tsëchö karqan. Täranqan nacionchömi juk wawqi Diospita yachatsikuypaq parlar, reunionchö juk igualatsikuywan kënö yachatsikurqan: “Pensarishun ishkaq amïgukuna pescäduta tsarir këkäyanqanman. Juknin atska pescäduta tsareqta rikarqa, ¿manatsuraq wallkalla pescäduta tsareq kaqqa tsë läduman ëwanman?”.

Camerun nacionchö atska nunakuna Diospita yachakuyta munayaptinmi, mas yanapakoqkunata wanayan. Tsëmi kë igualatsikuyta wawqintsik Onësime wiyanqanqa nacionninman kutita pensanampaq yanaparqan. Peru atska watakunapa juk nacionchö tärashqa karmi, Camerun nacionman kutir mana yachakänampaq kaqta pensarnin yarpachakurqan. Tsëmi puntataqa joqta killapa Camerunman ëwarqan y yachakarmi 2012 watachö täraq kutikurqan.

Wawqi Onësimem kënö cuentakun: “Alläpa achachaptin y jukläya kawakuyaptinmi tsëchö yachakänä karqan. Reunionkunachöqa yapëmi yachakänä karqan chukru bancukunachö jamëta. Y reunionkunachö yachatsikayämunqanta wiyarqa, ñampu shumaq asientukunatapis qonqareqmi kä”.

2013 watachömi wawqi Onësimeqa Geraldïne paniwan casakurqan. Kë paniqa isqun watapam Francia nacionchö tärashqa karqan, peru tsëpitaqa Camerun nacionmanmi kutirqan. Jehoväta mas sirwiyänampaq churapakäyanqantaqa, ¿imanötan Jehovä bendicirqan? Tsëpaqmi wawqi Onësimeqa kënö nin: “Ishkäkunam ëwayarqä ishkë killa duraq escuëlaman y Betelchöpis yanapakuyarqämi. Pasaq watachömi yanapakunqa congregacionchö 20 Bibliapita yachakoqkuna bautizakuyashqa. Kananqa atska ‘pescäduta tsarinapaq’ alli sitiuchömi këkä” (Mar. 1:17, 18). Pani Geraldïnenam kënö nin: “Manam imëpis pensarqätsu mëtsika bendicionkunata chaskinäpaq kaqtaqa”.

JESUSPA QATEQNIN TIKRAYÄNAMPAQ YANAPAKUYQA KUSHIKUYPAQMI

Pani Judithqa, Estädus Unïdus nacionman ëwakushqa karpis, Diospita yachatsikuychö maslla yanapakuytam munarqan. Kënömi nin: “Camerunman familiäta cada watukaq ëwarqa atskaq nunakunatam Bibliapita yachatseq kä y pëkunapaq llakikurmi Estädus Unïdusman waqar kutikoq kä”. Tsënö karpis Camerunman täraq ëwëtaqa manam churapakarqantsu. Alli trabäjuyoq karmi papänin Camerunchö qeshyaptin jampikunampaq qellëta apatseq. Peqa Jehoväman markäkur o yärakurmi Camerun nacionman täraq kutirqan. Estädus Unïduschö imëka kapunqankunaman yarparmi llakikoq. Tsëmi yachakänampaq Jehoväman mañakurqan. Y congregacionkunata watukaq wawqiwan warminmi shumaq parlapar yanapayarqan.

¿Ima bendicionkunatatan chaskirqan? Kushishqam Judithqa kënö cuentakun: “Kima watallachömi chuskoqta bautizakuyänampaq yanaparqä”. Tsëpitanam llapan tiempunwan Diospita yachatsikur yanapakurqan. Y kananqa qowan Sam-Castelwanmi congregacionkunata watukar yanapakuyan. Y Judithwan familianmi papäninta grätislla operayänampaq juk nacionchö hospitalta tariyarqan. Papänimpa operacionninqa allim yarqurqan.

JEHOVÄMI YANAPAN

Wawqi Victorqa Canadä nacionmanmi täraq ëwakurqan. Täpakoq revistachö universidäman ëwëpaq yachatsikuyta leyinqanmi estudiëkanqanman pensanampaq yanaparqan. Tsëmi universidächö estudiëkanqanta dejarirnin, wallka tiempulla trabajanampaq estudiar qallëkurqan. Kënömi cuentakun: “Tsëta ruranqämi yanapamarqan raslla juk trabäjuta tarinäpaq y imëpis munanqänö llapan tiempüwan yachatsikunäpaq”. Tsëpitanam pani Carolïnewan casakurnin Camerun nacionman ëwayarqan. Tsëchönam Betelman watukakoq ëwayaptin, Camerunchö Diospita yachatsikur quedakuyänampaq niyarqan. Wawqi Victormi këtapis nin: “Tsëta rurayänapaqqa manam imapis michäyämarqantsu. Wanayanqäkunallawan kawakur yachakashqa karmi, Camerunchö quedakuyta puëdiyarqä”. Hörataqa Pani Carolïneqa qeshyapäkoqmi, tsënö karpis Jehoväta sirwirmi kallpachakur sïguiyarqan.

Bibliapita yachakuy munaqkunata yanapayänampaqmi wawqi Victorwan warmin Carolïneqa, llapan tiempunkunawan yanapakur qallayarqan. Juk tiempupaqa kayäpunqanllawanmi kawakuyarqan, pishipakurnam Canadä nacionman juk ishkë killapa trabajaq ëwayaq. Tsëpitaqa Camerunmanmi llapan tiempunkunawan yanapakuyänampaq kutiyaq. ¿Imanötan Jehovä bendicirqan? Ishkë killa duraq escuëlamanmi ëwayarqan, tsëpitanam llapan tiempunkunawan yachatsikuyarqan. Kananqa Diospita yachakunapaq wayikuna rurëchömi yanapakuyan. Wawqi Victormi nin: “Imëkata dejayanqarëkurmi Jehovä imanö cuidayämanqanta rikäyarqö”.

KUSHIKUYPAQMI JEHOVÄTA SIRWIYÄNAMPAQ NUNAKUNATA YANAPËQA

2002 watachömi Alain wawqi Alemania nacionpa universidäninchö estudiëkar, Jövin, ¿imataraq kawënikiwan ruranki? neq tratäduta leyirqan. Tsëmi yanaparqan Jehoväta sirwinqanchö masta ruranampaq. Y 2006 watachömi Soltërukuna Bibliapita Yachakuyänampaq Escuëlaman ëwarqan y tsë escuëla ushariptinnam Camerunman mandayarqan.

Camerun nacionman chärirqa pullan junaqllam trabajarqan. Pëqa qelanäkurita mana munarmi, Diospita llapan tiempunwan yachatsikunampaq niyaptin raslla änikurqan. Tsëpitanam masta pagayänampaq juk läduchö trabäjuta tarirqan. Wawqi Alain trabäjumpita yarqukunampaq niptinmi patronninqa maslla paguëta munarqan, peru pëqa trabäjumpita yarqukurirqanmi. Tiempuwannam, Francia nacionchö täraq pani Stephaniewan casakurqan. Pani Stephanie Camerunta kutirninqa, ¿ima mana allikunapatan pasarqan?

Stephaniem kënö cuentakun: “Camerunman chärirqa qeshyapäkurmi qallëkurqä, peru jampikurmi alliyärirqä”. Alli tsarakuyanqanrëkurmi Jehoväqa pëkunata bendicirqan. Alainmi kënö cuentakun: “Karuchö këkaq Katë jutiyoq markata yachatsikoq ëwayaptïmi, Bibliapita yachakuyta munaq nunakunata tariyarqä. Tsë nunakunataqa telëfunullapam yachatsiyaq kayä. Pëkunapitaqa ishkaqmi bautizakuyarqan y tsëchö juk grüputa patsätsiyaptinmi reunionkuna rurakar qallakarqan”. Stephaniem kënö cuentakun: “Nunakuna Jehoväta reqiyänampaq y änikur pëllatana sirwiyänampaq yanapënöqa manam imapis kushitsimashwantsu. Kë nacionchöqa atskaq nunakunata yanaparninmi kushikuyarqö”. Kanan witsanqa wawqi Alainwan warmin Stephanieqa congregacionkunata watukarmi yanapakuyan.

“RURAYÄNÄPAQ KAQTAM RURAYARQÖ”

Pani Gisëleqa Italia nacionchö doctörapaq estudiëkarmi bautizakurqan. Y Bibliapita yachatseqnin paniwan qowan kayäpunqankunallawan kawayanqannömi pëpis kawëta munarqan. Tsëmi Diospita maslla yachatsikuyta munar, universidächö estudiëkarllaraq llapan tiempunwan Diospita yachatsikur qallëkurqan.

Diospita mas yachatsikuyta munarmi pani Gisëleqa Camerun nacionninman kutikuyta munarqan. Peru kutinampaqqa imëkakunamanmi yarpachakunan karqan, tsëtam kënö cuentakun: “Italia nacionmanqa manam yapë täraq kutita puëdïmannatsu karqan, amïgükunata y familiäkunatapis dejarïkurmi ëwakunä karqan”. Tsënö kaptimpis 2016 wata mäyu killachömi Camerunman kutikurqan. Tiempu pasariptinnam wawqi Leoncewan casakurqan. Y Betelpitam niyarqan Diospita yachatsikuychö yanapakoq Ayos markaman ëwayänampaq.

¿Imanötan Ayos markachöqa kawakuyaq? Pani Gisëlem kënö cuentakun: “Semanëpam luzqa kaqtsu, tsëmi celularnïkuna carguëtapis puëdiyaqtsu kayä. Tsëmi celularnïkunaqa imëpis upiräkoqlla. Yamtawan cocinakuytam yachakurqä. Paqaskunapa alläpa nunakuna mana kayaptinmi, tsë höralla carretilläkunawan y linternäkunawan yakuman ëwayaq kayä”. Alli tsarakuyänampaq ima yanapanqantam pani Gisële kënö cuentakun: “Jehovä yanapayämaptin, ishkäkuna yanapanakur, familiäkuna y amïgükuna yanapayämaptin y ichik propinäkuna qarayämanqanwanmi tsë markachö yanapakuyta puëdiyarqö”.

Pani Gisëlem Camerunman kutikunqampaq kënö nin: “Kushikümi Camerunman kutikamunqäpita. Tsëllaraq charqa mana allipam pasayarqä y llakikuyaqmi kayä. Peru tsë mana allikuna pasariptinqa, qowäwanmi musyayarqä Ayos markachö yanapakur alli rurayanqäta. Jehoväman markäkur o yärakurmi següru këkäyä pë yanapayämänampaq kaqta”. Wawqi Leoncewan warmin Gisëleqa, ishkë killa duraq escuëlamanmi ëwayarqan y kananqa llapan tiempunkunawanmi yanapakuykäyan.

Ima kaptimpis pescäduta tsariyänampaqqa yarquyanllam. Tsënöllam yurikuyanqan nacionman kutikoq wawqi panikunaqa, imapa pasarpis Bibliapita yachakuyta munaq nunakunata yanapayänampaq kallpachakuyan. Awmi, kë wawqi panikuna rurayanqantaqa Jehovä Diosqa manam qonqanqatsu y rurayanqanrëkurmi bendicinqa (Neh. 5:19; Heb. 6:10). Juk nacionman ëwakushqa karqa, ¿kutikunkimantsuraq nacionnikiman yachatsikoqkunata wanayanqan markakunachö yanapakunëkipaq? Tsënö ruraptikiqa, Jehovämi bendicishunki (Prov. 10:22).