Leyeqkuna tapukuyanqan

Belenchö Jesus yuririptinqa, ¿imanirtan Josëwan Marïaqa Nazaret-ta kutikuyänampa rantin tsëchö quedakuyarqan?

Bibliachöqa manam nintsu imanir quedakuyanqanta, peru wakin versïculukuna ninqankunawanqa capazchi entiendishwan imanir quedakuyanqanta.

Qeshyaq tikranampaq y wamran yurinampaq kaqta juk angel Marïata willanqan witsanqa, Marïaqa Nazaret markachömi täkurqan. Tsë markaqa karqan Josë täkunqan Galilëa markachömi (Lüc. 1:26-31; 2:4). Y tiempuwannam Josëwan Marïa Egiptupita kutimurnin Nazaret-ta kutikuyarqan. Tsë markachö Jesus winashqa kaptinmi, Jesustaqa Nazaret markapita nir reqiyaq (Mat. 2:19-23). Tsëmi Josëpaq, Marïapaq y Jesuspaq imëpis parlayaptinqa Nazaretpita kayanqanta yarpäyan.

Marïaqa Judëa markakunata reqeqmi. Tsëchömi familian Elisabetwan Zacarïas täkuyaq y tiempuwanqa Elisabetqa Bautizakoq Juanpa mamanmi karqan (Lüc. 1:5, 9, 13, 36). Juk kutim Marïaqa Elisabet-ta watukaq ëwarqan y tsëchö cäsi kima killapa quedakurirmi Nazaret markanta kutikurqan (Lüc. 1:39, 40, 56).

Tiempuwanmi llapan nunakunata gobernanti mandarqan inscribikuyänampaq. Y tsëta cäsukurmi Josëqa Nazaretpita Belen markata o ‘Davidpa markan’ niyanqanta ëwarqan. Diospa willakoqninkunaqa tsë markachö Diospa Akrashqan yurinampaq kaqtam willakushqa kayarqan (Lüc. 2:3, 4; 1 Sam. 17:15; 20:6; Miq. 5:2). Y tsë markachömi Jesusqa yurikurqan. Josëqa manachi tsëllaraq qeshyakushqa warminta y llullullaraq wamrata Nazaret markata kutitsinmantsu karqan. Tsëchi Belen markachö juk tiempupa quedakuyarqan. Belen markaqa Jerusalen markapa amänunchömi këkarqan, 9 kilömetrullachö. Tsëchö quedakuyanqanqa allim karqan, tsëmi yanaparqan Ley mandakunqannö wamrata aparkur templuta ëwar Diospaq qarëkunata rupatsiyänampaq (Lev. 12:2, 6-8; Lüc. 2:22-24).

Yarpänantsikmi tsë yureq wamrapaqqa, Marïata angel kënö ninqanta: “Papänin Davidpa gobernar täkunanta[m Dios] entreganqa”. Tsënö nirqa, Gobernanti churanampaq kaqtam willëkarqan. David markachö Jesus yuririptinqa, ¿imataraq Josëwan Marïa pensayarqan? (Lüc. 1:32, 33; 2:11, 17). Capazchi pensayarqan imatapis rurayänampaq Dios willanqanyaq Belen markachö quedakuyänan mas alli kanqanta.

Ëka tiempupa quedakushqa kayanqanta mana musyarpis, musyantsikmi estrëllakunata rikëkur willakoq nunakuna chäyanqan tiempupaqqa Jesusqa manam tsëllaraq yurishqa wamratsu karqan, sinöqa jatunnam karqan y täkuyänampaqpis wayita tarishqanam kayarqan (Mat. 2:11). Tsëwanmi musyantsik Nazaret-ta kutikuyänampa rantin, Belen markachö juk tiempupa täkushqa kayanqanta.

Herödisqa, “Belenchö y amänun markakunachö ishkë watapita qepaman llapan ollqu wamrakunata wanutsiyänampaq[mi] mandakurqan” (Mat. 2:16). Peru Josëtam juk angel willarqan wamrata wanutsita munayanqanta, tsëmi Josëqa wamrata aparkur warmin Marïawan Egiptuta ëwakuyarqan, y tsëchömi Herödis wanunqanyaq quedakuyarqan. Y Egiptupita kutimurnam Josëqa familianta Nazaret markaman pusharqan. ¿Imanirtan Belen markata ëwayarqantsu? Tsë witsampaqqa, Herödispa Arquelau jutiyoq tsurinmi Judëachö gobernëkarqan, y pëqa alläpa mana alli nunam karqan. Tsëmi peligrösu kanqanta angel willaptin Josëqa familianwan Nazaret-ta ëwakuyarqan. Y tsëchöqa manam Jesusta wanutsiyänantsu karqan y Jehovä Diosta sirwinampaqmi shumaq yachatsita puëdiyanman karqan (Mat. 2:19-22; 13:55; Lüc. 2:39, 52).

Jesus wanunqanwanmi wakin nunakunaqa ciëluta ëwëta puëdiyanman karqan, peru Josëqa capazchi wanukurqan Jesus manaraq wanuptin, y tsëqa manachi ciëluta ëwanampaq akrashqatsu karqan. Tsënö kaptinqa, capazchi Josëqa kë Patsachö kawarimunqa, y llapantsikchi reqita puëdishun y Jesus yuririptin Belen markachö imanir quedakunqantachi tapupëta puëdishun.