LLAPAN LEYINA KAQ Watchtower
Watchtower
LLAPAN LEYINA KAQ
Quechua (Ancash)
  • BIBLIA
  • RURAYÄMUNQÄKUNA
  • REUNIONKUNA
  • w25 Marzu pägk. 26-31
  • Confiakushun Jehovä yanapamänapaq kaqman

Këchöqa manam videu kantsu

Imanöparaq manam kë videu kichakämushqatsu.

  • Confiakushun Jehovä yanapamänapaq kaqman
  • Täpakoq Jehovä Diospa Gobiernumpita Willakoq (Yachakunapaq)—2025
  • Subtïtulukuna
  • Jukchö tsëpaq parlaq
  • ¿IMATATAQ MOISESPITA Y ISRAELÏTAKUNAPITA YACHAKUNTSIK?
  • FALTAPAKUNQANTSIK HÖRAKUNA JEHOVÄMAN CONFIAKUSHUN
  • EDÄNA KASHQAPIS JEHOVÄ CUIDAMÄNAPAQ KAQMAN CONFIAKUSHUN
  • Wanukuyänampaqna këkar consejakuyanqankuna
    Täpakoq Jehovä Diospa Gobiernumpita Willakoq (Yachakunapaq)—2024
  • Imatapis manaraq decidir Jehoväman confiakushun
    Cristiänunö Kawakunapaq Y Yachatsikunapaq Reunionchö Yachakunapaq (2023)
  • Ima asuntutapis mana entiendirqa humildi kashun
    Täpakoq Jehovä Diospa Gobiernumpita Willakoq (Yachakunapaq)—2025
  • Jehovälla “kawëkaq Dios” kanqantam yarpänantsik
    Täpakoq Jehovä Diospa Gobiernumpita Willakoq (Yachakunapaq)—2024
Masta rikë
Täpakoq Jehovä Diospa Gobiernumpita Willakoq (Yachakunapaq)—2025
w25 Marzu pägk. 26-31

13 KAQ

4 KAQ CANCION “Jehovämi Mitsimaqnï”

Confiakushun Jehovä yanapamänapaq kaqman

“¿Noqa Jehovä tsëta rurëta mana puëdinqätaku pensanki?”(NÜM. 11:23).

¿IMATATAQ YACHAKUSHUN?

Këchöqa yachakushun wananqantsikkunata Jehovä Diosnintsik imëpis mana faltatsimunampaq kaqman confiakunapaqmi.

1. ¿Imatataq Moises rurarqan Jehoväman confiakurnin?

HEBRËUS libruchömi willakun mëtsikaq nunakuna Jehoväman markäkuyanqanta o yärakuyanqanta. Jukqa Moisesmi karqan, y pëpitam yachakuyta puëdintsik (Heb. 3:2-5; 11:23-25). Moisesqa Jehoväman markäkurmi, israelïtakunata yanaparqan Egiptupita yarqayämunampaq. Manam faraonta ni soldädunkunata mantsarqantsu. Pëqa llapan shonqunwan Jehoväman markäkurmi israelïtakunata Puka lamarpa pasatsirqan y tsunyaq sitiupa pusharqan (Heb. 11:27-29). Mëtsikaq israelïtakuna Jehovä cuidanampaq kaqman mana confiakuyaptimpis, Moisesqa confiakurqanmi. Y confiakunqannöllam Jehoväqa, tsunyaq sitiuchö israelïtakuna kawayänampaq mikuyta ni yakuta faltatsirqantsu (Ex. 15:22-25; Sal. 78:23-25).a

2. Nümerus 11:21 a 23 ninqannö, ¿imanirtan Jehoväqa Moisesta tapurqan?

2 Egiptupita israelïtakuna yarqayämunqampita juk watanöna pasariptinmi, israelïtakunata Jehovä änirqan ëtsata qaranampaq. Peru Moisesqa Jehoväman markäkur o yärakurpis, manam creirqantsu mëtsika millon israelïtakunapaq tsunyaq sitiuchö ëtsata mëpita yuritsimunampaq kaqta. Tsëmi Jehoväqa Moisesta kënö tapurqan: “¿Noqa Jehovä tsëta rurëta mana puëdinqätaku pensanki?” (leyi Nümerus 11:21-23). Kë textuchö ninqantaqa hebreu idiömachö “Jehoväpa makin” ninmi. Tsënö nirqa, Jehoväpa santu espïritumpaq o podernimpaqmi parlëkan. Juk parlakuychöqa, Jehoväqa Moisesta kënö tapoq cuentam nikarqan: “¿Tsëta rurëta mana puëdinäpaq kaqtaku creinki?”.

3. ¿Imanirtan alli pensanantsik Moisesta y israelïtakunata pasanqanman?

3 Y qamqa, ¿imëllapis yarpachakurnin kënö pensarqunkiku?: “¿Jehoväqa noqata y familiätapis cuidayämanqatsuraq y wanayanqäkunata tariyänäpaq yanapayämanqatsuraq?”. Tsënö pensashqa o mana pensashqa kaptikipis, këchömi Moisespita y israelïtakunapita yachakushun. Pëkunaqa Jehoväman confiakushqa karpis, mananam confiakuyarqannatsu. Tsënöllam juk ishkë textukunata yachakushun Jehovä poderösu kanqanta següru kanantsikpaq y cuidamänapaq kaqman confiakunantsikpaq.

¿IMATATAQ MOISESPITA Y ISRAELÏTAKUNAPITA YACHAKUNTSIK?

4. ¿Imanirtan mëtsikaq israelïtakuna Jehovä cuidanampaq kaqman confiakuyarqannatsu?

4 ¿Imanirtan israelïtakunaqa Jehovä cuidanampaq kaqman confiakuyarqannatsu? Israelïtakuna Egiptupita yarqayämuptinqa, pëkunawan juntum yarqayämurqan mana israelïta nunakunapis y Dios Änikunqan Patsaman chäyänampaqmi israelïtakunawan juntu tsunyaq sitiupa ëwayarqan (Ex. 12:38; Deut. 8:15). Tsë mana israelïta nunakunaqa manä mikuytam ajayäyarqan, tsëmi quejakuyarqan. Tsëta rikarmi mëtsikaq israelïtakunapis quejakur qallëkuyarqan (Nüm. 11:4-6). Egiptuchö mikuyanqan mikuykunatam llakiyarqan. Tsënö quejakuyaptinmi Moisesqa yarpachakur qallëkurqan ëtsata kikin qaranampaq (Nüm. 11:13, 14).

5, 6. ¿Pikunata rikartan israelïtakunanö mana agradecikoq tikrakurishwan?

5 Rikärinqantsiknöpis, mana israelïta kaq nunakuna mana agradecikoq kayaptinmi, israelïtakunapis Diosnintsik bendicinqankunata valorayarqannatsu ni agradecikuyarqannatsu. Noqantsiktapis tsëmi pasaramashwan. Diosta mana sirweq nunakunaqa mana agradecikoqmi kayan y pëkunata rikarmi noqantsikpis Jehovä bendicimanqantsikkunapita agradecikushwannatsu. Capazchi unë kapamanqantsikkunata llakishwan o wakinkunapanö imëkantsikpis kapamänata munashwan. Peru rasumpa kushishqaqa këta puëdishun kapamanqantsikkunapita agradecikurninmi.

6 Israelïtakunaqa manam yarpäyarqantsu Jehovä äninqanta. Jehoväqa nirqan Äninqan Patsaman chäyaptinraq bendicinampaq kaqtam, y manam tsunyaq jirkachö bendicinampaqtsu. Tsëmi noqantsikpis mana tarinqantsikkunaman yarpachakur kakunantsikpa rantin, shamoq tiempuchö Jehovä Diosnintsik bendicimänapaq kaqkunaman masqa pensanantsik. Tsënöllam alli pensanantsik, Jehovä Diosnintsikman maslla confiakunapaq yanapamaqnintsik textukunaman.

7. ¿Imanirtan següru këkashwan mëchö këkashqapis Jehovä yanapamänapaq kaqta?

7 ¿Imanir-raq Jehoväqa Moisesta, “¿noqa Jehovä tsëta rurëta mana puëdinqätaku pensanki?” nir tapurqan? Capazchi poderösu kanqanta y më karuchö këkäyaptimpis poderösu karnin yanapëta puëdinqanta entiendiyänanta munarqan. Tsëmi Jehoväqa israelïtakuna tsunyaq sitiuchö këkäyaptimpis, poderösu karnin mëtsika ëtsata qaranampaq änirqan. Y tsëtam rurarqan. Pëqa ‘puëdeq makinwanmi’ israelïtakunata wanayanqanchö yanaparqan (Jer. 32:21). Tsënöllam noqantsikpis ima pruëbapa pasarpis o më karuchö këkarpis, llapan shonquntsikwan Jehoväman confiakunantsik puëdeq makinwan yanapamänapaq kaqta (Sal. 138:6, 7).

8. ¿Imatataq rurashwan israelïtakunanö mana kanapaq? (Dibüjuta rikäri).

8 Jehoväqa änikunqanta cumplirmi israelïtakunapaq tsakwa niraq mëtsika codornizkunata yuritsirqan. Peru israelïtakunaqa tsë milagruta rikëkarpis, manam agradecikuyarqantsu. Y mikuyllaman yarparäkurmi cäsi ishkë junaqpa codornizkunata ëllurlla o qorirlla kakuyarqan. Tsënö kayanqanta rikarmi Jehoväqa alläpa cölerakurqan y castigarqan (Nüm. 11:31-34). ¿Imatataq israelïtakunapita yachakuntsik? Manam israelïtakunanöqa munanqantsikllamanqa yarparäkunantsiktsu. Rïcu kar o waktsa karpis, ciëluchö ‘väleq’ cösasnintsikkuna kanampaqmi kallpachakunantsik. Y tsëtaqa rurantsik Jehoväwan y Jesuswan mas amïgu kanantsikpaq kallpachakurmi (Mat. 6:19, 20; Lüc. 16:9). Tsëta rurarqa, imëka wananqantsiktapis Jehovä mana faltatsimunampaq kaqmanmi confiakushun.

Tsunyaq sitiuchömi israelïtakuna tsakwa niraq codornizkunata paqaspa ëlluykäyan.

¿Imanötan israelïtakunaqa tsunyaq sitiuchö portakuyarqan, y imatataq tsëpita yachakuntsik? (Leyi 8 kaq pärrafuta).


9. ¿Imamantan llapan shonquntsikwan confiakunantsik?

9 Kanan witsampis Jehoväqa sirweqninkunata llapan wanayanqanchömi yanapan. Peru tsënö yanapamashqapis, höraqa qellëta o mikuytapis faltapakushunmi.b Peru faltapakurpis, segürum këkänantsik Jehovä Diosnintsik imëpis mana dejamänapaq kaqta. Pëmi mana allikunapa pasanqantsik hörakuna alli aguantanapaq kallpanwan yanapamäshun. Peru këman pensarishun: ¿faltapakunqantsik hörakuna confiakuntsikku Jehovä yanapamänapaq kaqman? ¿Awkinyarnin o chakwanyarnin mantenikunapaq qellënintsik churakuyta munarku alläpa trabajantsik? Tsë ishkampita yachakurishun Jehovä yanapamänapaq kaqman confiakunapaq.

FALTAPAKUNQANTSIK HÖRAKUNA JEHOVÄMAN CONFIAKUSHUN

10. Kë mana alli tiempuchöqa, ¿imakunaraq pasaramashwan?

10 Mana alli tiempuchömi kawantsik y capazchi mas watakuna pasaptinqa wananqantsikkunata faltapakur qallëkushun. Capazchi polïtica asuntuchö problëmakuna kaptin, guërrakuna kaptin, ima desgraciapis pasakuptin o muyakoq o shukukoq qeshyakuna kaptin trabäjupita qarqaramashwan o cösasnintsikkunata y hasta wayintsiktapis perdirishwan. Tsëqa capazchi markantsikchö juk trabäjukunaman yëkuyta munashwan o trabäjurëkur familiantsikwan juk markakunapa ëwakuyta munashwan. Tsëkuna pasamashqaqa, ¿imanöraq Jehovä yanapamänapaq kaqman confiakunqantsikta rikätsikushwan?

11. ¿Imakunata ruranqantsiktan yanapamäshun faltapakunqantsik hörakuna? (Lücas 12:29-31).

11 Tsëkunapa pasarqa, imanö sientikunqantsikta y yarpachakunqantsikkunatam Jehoväta willanantsik (Prov. 16:3). Jehoväta mañakushun imatapis allita decidinapaq, alläpa mana yarpachakunapaq y tranquïlu sientikunantsikpaq yanapëkamänapaq (leyi Lücas 12:29-31). Tsënölla rogakushun tarinqantsikkunallawan kushishqa kanantsikpaq yanapëkamänapaq (1 Tim. 6:7, 8). Y pasëkanqantsik asuntupaq consëjukunata publicacionnintsikkunachö ashishun. Wakinkunaqa pasëkäyanqan asuntukunapaq consëjukunata tariyashqa videukunachö y jw.org päginachömi.

12. Ima trabäjumampis manaraq yëkurnin, ¿imakunamantan juk cristiänu pensanman?

12 Wakinkunaqa familiankunata dejëkurmi karu markakunata ëwakuyashqa trabajayänampaq, peru tsëpitam cuentata qokuyashqa tsëta decidiyanqanqa mana alli kashqa kanqanta. Tsëmi ima trabäjumampis manaraq yëkur y pägullaman pensanantsikpa rantin, alli pensanantsik Jehoväwan amïgu kënintsik imanö kanampaq kaqman (Lüc. 14:28). Kënömi pensanantsik: “Trabäjürëkur karuta ëwakuptïqa, ¿warmï o qowä o runä imanöraq kanqa? ¿Y puëdishaqtsuraq reunionkunaman ëwëta, yachatsikoq yarquyta y wawqi panikunawampis juntu këta?”. Y wamrayoq karqa kënömi pensanantsik: “Karu markata trabajaq ëwakurqa, ¿wamräta ‘Jehovä munanqannö’ wätëta y consejëta puëdishaqtsuraq?” (Efes. 6:4). Imatapis decidinapaqqa, Jehoväpa consëjunkunatam cuentachö katsinantsik, y manam mana creikoq familiantsikkuna o amïguntsikkuna nimanqantsiktaqa.c Asia occidentalchö täkoq Tony pasanqanta rikärishun. Pëtaqa juk nacionchö trabajanampaqmi atska trabäjuta äniyarqan. Peru tsë asuntupaq Jehoväman alli mañakurirmi, warminwan decidiyarqan tsë trabäjuman mana yëkunampaq. Tsëpa rantinqa, tariyanqan qellë tinkunanta munarmi mas wallkallatana gastayänampaq decidiyarqan. ¿Alliku karqan Tony decidinqan? Kënömi nin: “Atskaq nunakunatam Jehoväta sirwiyänampaq yanapëta puëdirqö y wamräkunapis alläpam Jehoväta kuyayan. Mateu 6:33 ninqanta cäsukushqa karmi, cläru rikäyarqö Jehovä imanö cuidayämanqanta”.

EDÄNA KASHQAPIS JEHOVÄ CUIDAMÄNAPAQ KAQMAN CONFIAKUSHUN

13. Puëdikaptinqa, ¿imatataq kananllapitana rurashwan awkinyarnin o chakwanyarnin mantenikunapaq?

13 Capazchi kananllapitana qellënintsikta churakuyta munashwan awkinyarnin o chakwanyarnin tsëwan kawakunapaq. Peru qellëta churakunapaq alläpa trabajarqa, Jehoväman confiakuytam dejarishwan. Awmi, Bibliachöqa nimantsik, wananqantsikkunata tarinapaq alli trabajanantsikpaqmi (Prov. 6:6-11). Y puëdikaptinqa, allim kanman awkinyarnin o chakwanyarnin mantenikunapaq qellënintsikta churakunqantsik. Tsënö kaptimpis qellë ashillata mas puntaman churashqaqa manam allitsu kanman (Ecl. 7:12).

14. Edäyarnin mantenikunapaq kananllapitana qellënintsikta churakuyta pensashqaqa, ¿imanötan Hebrëus 13:5 ninqan yanapamantsik?

14 Imëkayoq kashqapis Diospa rikëninchö mana alli karqa waktsa cuentam këkantsik, tsëtam Jesus nirqan (Lüc. 12:16-21). Y rasumpa kaqchöqa, manam musyantsiktsu warë warantin ima pasamänapaq kaqta (Prov. 23:4, 5; Sant. 4:13-15). Tsënöllam Jesusqa nirqan, imëkantsikkunata mana dejarqa qateqnin këta mana puëdinapaq kaqta (Lüc. 14:33). Y Judëachö cristiänukunaqa imëkankunata dejëkurmi Jesuspa qateqnin tikrayarqan (Heb. 10:34). Kanan witsampis mëtsikaq wawqi panikunam polïtica asuntuman mana mëtikuyanqampita trabäjunkunata y imëkankunata perdiyashqa (Apo. 13:16, 17). Pëkunaqa Jehovä Diosnintsik kënö änikunqanmanmi confiakuyan: “Manam imëpis dejashqëkitsu ni qonqashqëkitsu” (leyi Hebrëus 13:5). Awkinyarnin o chakwanyarnin mantenikunapaq kananllapita qellënintsikta churakurpis, llapan shonquntsikwanmi confiakuntsik ima pasakuptimpis Jehovä yanapamänapaq kaqman.

15. Jehoväta sirweq papäkunaqa, ¿wamrankuna imata rurayänantataq masqa munayan? (Fötukunata rikäri).

15 Wakin nunakunaqa mëtsika wamrayoq kayan, awkinyäyaptin o chakwanyäyaptin manteniyänampaq kaqta pensarmi. Peru Bibliachöqa nin, papäkuna wamrankunata cuidayänampaq y manteniyänampaqmi (2 Cor. 12:14). Tsënö kaptimpis papäkuna mayorna karqa capazchi wanayanqa wamrankuna manteniyänanta o juk rurëkunachö yanapayänanta, y mëtsikaqmi edäyashqa papäninkunata kushishqa yanapayan (1 Tim. 5:4). Peru cristiänu papäkunaqa masqa kushikuyan Jehoväta sirwiyänampaq wamrankunata yanaparmi y manam manteniyänanta munar atska qellëta ganayänampaq yachatsirtsu (3 Juan 4).

Juk wawqiwan warminmi, wamranwan y mashanwan kushishqa videollamädapa parlakuykäyan. Paniqa qowanwan o runanwanmi construccionchö utilizäyanqan chalëcuwan këkäyan.

Casädukunaqa, shamoq tiempupaq imata decidirpis Bibliachö consëjukunatam cuentachö katsiyan. Tsëmi alliraq pensayan ëka wamrayoq kayänampaq kaqta. (Leyi 15 kaq pärrafuta).d


16. ¿Imanötan papäkuna wamrankunata yachatsiyanman vïdata pasëta yachayänampaq? (Efesius 4:28).

16 Papäkuna, wamrëkikunata ichiknimpita yachatsiyë Jehoväman confiakuyänampaq y alli trabajador kayänampaq (Prov. 29:21; leyi Efesius 4:28). Tsënölla yachatsiyë escuëlachöpis alli estudianti kayänampaq. Publicacionnintsikchö consëjukunawan yanapayë estudiu asuntuchö imatapis alli decidiyänampaq. Y alli entienditsiyë yachatsikoq yarquyänampaq o precursor kayänampaq yanapaq trabäjuta ashita yachakuyänampaq.

17. ¿Imatataq llapan shonquntsikwan creintsik?

17 Jehoväpa sirweqninkunaqa llapan shonquntsikwanmi creintsik Jehovä Dios poderösu kanqanta y wananqantsikkunata mana faltatsimunampaq kaqta. Mana alli tiempuchönam kawantsik, tsëmi Jehovä Diosnintsikmanqa masraq markäkunantsik o yärakunantsik. Ima pasakuptimpis poderösu Diosnintsik yanapamänapaq kaqmanmi confiakunantsik. Pëqa alläpa karu markachö kashqapis puëdeq makinwanmi yanapamäshun y manam wananqantsikkunata faltatsimunqatsu.

¿YARPANKIKU YACHAKUNQANTSIKTA?

  • ¿Imatataq yachakuntsik Moisestawan israelïtakunata pasanqampita?

  • ¿Imanötan Jehoväman confiakunqantsikta rikätsikushwan faltapakunqantsik hörakuna?

  • ¿Imatataq yarpänantsik awkinyarnin o chakwanyarnin mantenikunapaq kananllapitana qellënintsikta churakuyta pensarqa?

150 KAQ CANCION Jehovä Diosmi salvamäshun

a Leyi 2023 wata octubri killa Täpakoq revistachö, “Leyeqkuna tapukuyanqan” neqta.

b Leyi 2014 wata 15 de setiembri killa La Atalaya revistachö, “Preguntas de los lectores” neqta.

c Leyi 2014 wata 15 de abril killa Täpakoq revistachö, “Manam pipis ishkaq patrontaqa sirwita puëdintsu” neqta.

d FÖTUKUNATA ENTIENDINAPAQ: Juk wawqiwan warminmi, videollamädapa warmi wamrankunawan parlëkäyan. Wamrankunaqa qowanwan o runanwanmi Diosta adoranantsik wayikunata rurëchö yanapakuykäyan.

    Llapan publicacionkuna Quechua Ancash (1993-2025)
    Cuentëkita wichqë
    Cuentëkiman yëkuy
    • Quechua (Ancash)
    • Pimampis apatsi
    • Patsätsi
    • Copyright © 2025 Watch Tower Bible and Tract Society of Pennsylvania
    • Utilizänëkipaq conträtu
    • Willakunqëkikunata imanö utilizäyanqä
    • Configuración de privacidad
    • JW.ORG
    • Cuentëkiman yëkuy
    Pimampis apatsi