YAĈHAKUNA 08
Jehová Diosqa amigon kanaykita munayan
Jehová Diosqa allita riqsinaykita munayan, chayrayku imanutaq payqa nir yaĉhachimanchik. Diosman qimikatkiqa paypis qamman qimikamunqa. Pero, ¿Diospa amigon kayta puytinchikchu? (Liyiy Salmo 25:14). ¿Imatataq rurankiman Diospa amigon kanaykipaq? Bibliaqa chaykunamanta yaĉhachimanchik.
1. ¿Imatataq Diosqa ruranata munayan?
Bibliaqa nin: ‘Diosman tukuy shunquykillapawan qimikayllapa. Chayta ruratkillapa, Diospis qamkunaman’ qimikamunqa (Santiago 4:8). Diosqa paypa amigon kanata munayan. Diostaqa mana rikayta puytinchikchu, chaymi “mana maydiyapis Diospaqa amigon kayta puytishaqchu” nir yarpuchuwan, pero payqa Bibliataqa dejasha payman qimikayta puytinapaq. Dios nimashanchikta Bibliapi liyirqa mas paypa amigon kashun mana rikayta puytirmapis.
2. ¿Imapaqtaq ninchik Jehová Diosqa kusala allin amigonchik kayta puytin nir?
Jehová Diosqa qamta mas llakipashun wakinkunamantaqa. Payqa shumaqta kawsanaykita munayan, imata ministirmapis mañanaykita munayan. Bibliaqa nin: ʻIma pasashutinllapapis ama chaykunalapaq yarpur llakirchu, chay pasashushanllapataqa Diospa makinpina dejayllapa, ¡Taytay Diosmi llakipamanqa! nirʼ (1 Pedro 5:7). Jehová Diosqa tukuy tiempo listo amigonkunata yanapananpaq, consolananpaq, uyakunanpaq ima (liyiy Salmo 94:18, 19).
3. ¿Imanutaq Jehová Diosqa amigonkuna tukunanta munayan?
Jehová Dios tukuy runakunata munan, “nataq karanlata ruraqkunapaqami kusala amigon” (Proverbios 3:32). Diosqa amigonkunaqa allin imakunalata rurar kawsananta munayan, mana allin imakunata-shuypaqa ama ruranantachu munayan. Runakunaqa “uchakuq kani” nir yarpur kaynu ninllapa, “mana maydiyapis Dios munashanta rurayta puytishaqchu” nir. Pero Diosqa kusa llakipakuq kar, mana das piñakunchu, ashwanmi tukuy runakuna paypa amigon kananta munayan (Salmo 147:11; Hechos 10:34, 35).
MAS INTRAKASHUNLLAPA
Yaĉhakushunllapa imatataq ruraypaq Diospa amigon kanapaq, Jehová Diosqa kusala allin amigonchik kayta puytin ima nir.
4. Abrahanmi Diospa amigon karan
Bibliaqa Abrahanmanta rimarqa yaĉhachimanchik imatataq nuqanchikkunapis ruraypaq Diospa amigon kanapaq nir. Abrahanmanta yaĉhakunaykillapapaq, liyiyllapa Génesis 12:1-4, chaymantaqa kaykunamanta parlayllapa:
¿Imata rurananpaqtaq Diosqa Abrahanta willaran?
¿Imatataq Diosqa Abrahanta arniran?
Dios willashanta uyaparqa, ¿imatataq Abrahanqa ruraran?
5. ¿Imatataq Jehová Diosqa amigonkunata mañan?
Amigonchikkunaqa allin imakunata nuqanchikkunapaq rurananta munayanchik, ¿manchu?
¿Imatataq amigoykikunaqa qampaq rurananta munayanki?
Liyiyllapa 1 Juan 5:3, chaymantaqa kaykunamanta parlayllapa:
¿Imatataq Jehová Diosqa amigonkunaqa paypaq rurananta munayan?
Jehová Diosta kasunapaqqa, saqra imakunamanta ashuypaqllapa. Liyiyllapa Isaías 48:17, 18, chaymantaqa kaykunamanta parlayllapa:
¿Imapaqtaq Jehová Diosqa amigonkunaqa allin imakunalata rurar kawsananllapata munayan?
Uk allin amigoqa bienninchikpaq willamanchik ama saqra imakuna pasamanapaq, chaynu Jehová Diospis amigonkunataqa bienninpaq willan.
6. Jehová Diosqa amigonkunata mana dejanqachu
Jehová Diosqa amigonkuna qischakayatinqa yanapan shachinakunanpaq. VIDEOTA rikayllapa, chaymantaqa kaykunamanta parlayllapa.
Chay videopi rikashanchik warmisitataqa, ¿imanutaq Jehová Diosqa yanapasha amana kwashalla tukuy tiempo kawsananpaq?
Liyiyllapa Isaías 41:10, 13, chaymantaqa kaykunamanta parlayllapa:
¿Imatataq Jehová Diosqa tukuy amigonkunapaq ruranqa?
¿Jehová Diosqa kusala allin amigonchik kayta puytiyanqachu?
Allin amigokunaqa imata ministishamapis pullanchik, Jehová Diospis ima pasamashamapis pullanchik kanqa.
7. Jehová Dios amigonkunaqa paywan parlananta munayan
Amigonchikkunawan cada día parlarqa mas riqsinakunchikllapa. Liyiyllapa Salmo 86:6, 11, chaymantaqa kaykunamanta parlayllapa:
¿Imanutaq Jehová Dioswanqa parlayta puytinchik?
¿Imawantaq Jehová Diosqa nuqanchikkunawan parlan?
Nuqanchikkunaqa Jehová Dioswanqa parlanchikllapa payta mañakur, pay-shuypaqa nuqanchikkunataqa Bibliawan parlamanchik.
WAKINKUNAQA KAYNU YARPUNLLAPA: “Mana maydiyapis Diospa amigonqa kayta puytishunchu”.
¿Ima textowantaq allita intrachiyta puytinkiman Jehová Diospaqqa amigon kayta puytinchik nir?
KAYKUNATA YAĈHAKUSHANCHIK
Jehová Diosqa qampaq amigoyki kanayan, chaynullapis yanapashunqa payman qimikayta puytinaykipaq.
¿Imataq ninkiman?
¿Imanutaq Jehová Diosqa amigonkunata yanapan?
¿Imapaqtaq Jehová Diosqa amigonkunaqa saqra imakunata dejananta munayan?
¿Jehová Diosqa amigonkunata masiwtachu mañayanqa? ¿Imapaqtaq chaynu yarpunki?
MAS YAĈHAKUNAYKIPAQ
¿Imanutaq Jehová Diospa amigon kayqa yanapashuyta puytin? Liyiy:
“Jehová, un Dios que vale la pena conocer” (La Atalaya, 15 de febrero de 2003)
Diospa amigon kayta yaĉhakuy.
Yaĉhakuy imanutaq uk warmisitata Diospa amigan kayqa yanaparan nir.
Uyakuy imatataq achka musukunaqa Jehová Diosmanta yarpunllapa nir.