YAĈHAKUNA 20
¿Imanutaq Diospa pueblonqa?
Jehová Diosqa mana imatapis sunsunulla ruranata munanchu (1 Corintios 14:33). Chayrayku, paypa pueblonqa pay munashannu adorananllapata munayan. ¿Imanutaq Jehová Diospa pueblonqa payta adoran? ¿Imatataq nuqanchikkunapis rurayta puytinchik?
1. ¿Pitaq congregacionpiqa mandakun?
Bibliaqami nin: ‘Jesucristomaqa paypi creyiqkunapaqqa’ manaqa congregacionpaq uman (Efesios 5:23). Jesusqa cielomanta-pacha Taytan Jehová Diospa pueblonta rikan. Payqa akraran uk grupito ‘Kusala allin servikuq’ shutiqta, chay taksha grupitoqa shutinpis Jehová Diospa Pueblonta Cuidaqkuna (liyiy Mateo 24:45-47). Punta siglopi imanutaq apostolkuna, Jerusalenmanta creyiqkunata rikaqkuna ima Diospa pueblontaqa yanaparanllapa, chaynu kay tiempopi Jehová Diospa Pueblonta Cuidaqkunapis entero pachapi Diospa pueblontaqa yanapayanllapa (Hechos 15:2). Pero, kay runakunaqa Diospa pueblonpiqa mana mandakuyanllapachu, ashwan Diosta mañanllapa, Diospa palabranta allita estudianllapa, chaynullapis Jesucristo mandakushankunata kasunllapa ima.
2. ¿Imatataq creyiqkunata rikaqkunaqa ruranllapa?
Creyiqkunata rikaqkunaqa Bibliawan yaĉhachikunllapa, congregacionpi kaqkunata Bibliawan yanapanllapa ima. Paykunaqa mana cobrakunllapachu. Bibliapis nin: ʻChaymi imatapis ama amalaschu rurar, ashwan Dios munashannu alegrila rurankillapa. Amami chay rurashaykirayku paqrakanaykillapapaq yarpur imachu rurankillapa. Ashwanmi imatapis rurankillapa kusa alegrila, ama kwashallachuʼ (1 Pedro 5:1, 2). Creyiqkunata rikaqkunataqa, creyiqkunata serviqkuna yanapanllapa, paykunapis uk tiempomantaqa creyiqkunata rikaqkuna kayta puytinllapa.
Jehová Diospa Pueblonta Cuidaqkuna, creyiqkunata rikaqkunata akranllapa congregacionkunata watukuqkuna kananllapapaq. Paykunaqa achka congregacionkunata watukur yanapanllapa, animachinllapa ima. Chaynullapis, paykunaqa creyiqkunata rikaqkunata, creyiqkunata serviqkunata ima akranllapa Biblia niyashanta allita rikar (1 Timoteo 3:1-10, 12; Tito 1:5-9).
3. Uk Jehová Diospa testigon, ¿imatataq ruran?
Tukuy congregacionman riqkunaqa “TAYTA [Jehová, NWT] DIOSPA shutinta” alabanllapa makinllapata alzar rimar, discursokunata qukur, shunqunmanta-pacha cantar ima. Chaynullapis, wasin wasin rir yaĉhachikur Diosta adoranllapa (liyiy Salmo 148:12, 13).
MAS INTRAKASHUNLLAPA
Rikashunllapa imanutaq Jesusqa congregacionta llakipayan, chaynullapis yaĉhakushun imanutaq creyiqkunata rikaqkunaqa Jesús yupay congregacionta cuidayanllapa, nuqanchikkunapis imanutaq Jesusta, creyiqkunata rikaqkunata ima yanapayta puytinchik nir.
4. Jesusqa congregacionpi kaqkunata kusalata llakipan
Jesusqa nuqaman shamuyllapa nir invitamanchik. Liyiyllapa Mateo 11:28-30, chaymantaqa kaykunamanta parlayllapa:
¿Imanutaq Jesusqa congregaciontaqa cuidan? ¿Kwashalla kanatachu munayanqa?
¿Imanutaq creyiqkunata rikaqkunapis Jesús yupay congregaciontaqa cuidanllapa? VIDEOTA rikayllapa.
Bibliaqa allita intrachimanchikllapa imatataq creyiqkunata rikaqkunaqa ruranllapa nir.
Liyiyllapa Isaías 32:2; 1 Pedro 5:1-3 ima, chaymantaqa kaykunamanta parlayllapa:
Jesusqa tukuyta llakipaq. ¿Imanutaq sintinki creyiqkunata rikaqkunapis Jesús yupay tukuyta llakipan nir yaĉharqa?
¿Ima mas imakunatataq creyiqkunata rikaqkunaqa ruranllapa Jesús yupay?
5. Creyiqkunata rikaqkunaqa yaĉhachikushanllapanu imatapis ruranllapa
¿Imanutaq Jesusqa creyiqkunata rikaqkunaqa kananllapata munayan? VIDEOTA rikayllapa.
Jesusqa allita intrachikuran imanutaq creyiqkunata rikaqkunaqa congregancionpi kanmanllapa nir. Liyiyllapa Mateo 23:8-12, chaymantaqa kaykunamanta parlayllapa:
Biblia niyashannu, ¿imanutaq creyiqkunata rikaqkunaqa kanmanllapa? Sacerdotekuna, wakin religionpi mandakuqkuna ima, ¿Jesús mandakushannu tukuyanqallapachu? ¿Ima ninkitaq?
Creyiqkunata rikaqkunaqa Diosta allita riqsinanllapapaq esfuerzakanllapa paykunalla, chaynullapis ayllunkunata yanapanllapa Diosta servinanllapapaq.
Creyiqkunata rikaqkunaqa tukuy congregacionpi kaqkunata yanapanllapa.
Creyiqkunata rikaqkunaqa tukuy tiempo yaĉhachikunllapa.
Creyiqkunata rikaqkunaqa yaĉhachikunllapa, Diospa wasinta limpiayta yanapakunllapa, wakin mas trabajokunata rurayta yanapakunllapa ima.
6. Creyiqkunata rikaqkunata kasunchikllapa
Bibliaqa yaĉhachimanchik imapaqtaq creyiqkunata rikaqkunataqa kasuypaqllapa nir. Liyiyllapa Hebreos 13:17, chaymantaqa kaykunamanta parlayllapa:
¿Imapaqtaq Bibliaqa creyiqkunata rikaqkunata kasuyllapa nimanchik? ¿Chayqa allinchu kanqa? ¿Imapaqtaq?
Liyiyllapa Lucas 16:10, chaymantaqa kaykunamanta parlayllapa:
¿Imapaqtaq tukuy tiempo creyiqkunata rikaqkunataqa kasunchikllapa?
WAKINKUNAQA KAYNU YARPUNLLAPA: “Mana wakinkunawan Diostaqa adorayta ministinchikchu”.
¿Imapaqtaq hermanokunawan Diostaqa adorachuwanllapa?
KAYKUNATA YAĈHAKUSHANCHIK
Jesusmi congregacionpiqa mandakun. Creyiqkunata rikaqkunaqa Jesusta kasunllapa, paykunaqa tukuyta cuidamanchikllapa, yaĉhachimanchikllapa ima, chayrayku paykunataqa alegre kasunchikllapa.
¿Ima ninkitaq?
¿Pitaq congregacionpiqa mandakun?
Creyiqkunata rikaqkunaqa, ¿imatataq congregacionpiqa ruranllapa?
Uk Jehová Diospa testigon, ¿imatataq ruran?
MAS YAĈHAKUNAYKIPAQ
Rikakuy michkatataq Jehová Diospa Pueblonta Cuidaqkunaqa munamanchikllapa nir.
Rikakuy imatataq congregacionkunata watukuqkunaqa ruranllapa nir.
La vida de un superintendente de circuito en una zona rural (4:51)
Liyiy imatataq warmikunaqa congregacionpi ruranllapa nir.
“¿Tienen ministras religiosas los testigos de Jehová?” (La Atalaya, 1 de septiembre de 2012)
Liyiy imakunatataq creyiqkunata rikaqkunaqa ruranllapa hermanonkunata animachinanllapapaq nir.
“Los ancianos cristianos, colaboradores para nuestro gozo” (La Atalaya, 15 de enero de 2013)