¿Pikunataq Diosmanta yaĉhachikur puriyanllapa?

Jehová Diosqa Gobiernonwan tukuy runakunapaq problemankunata tukchinqa. Jehová Diosqa kay shumaq noticiakunamantaqa tukuy runakunata parlanata munayan. Chaynullapis, Jesusqa yaĉhakuqninkunata yaĉhachiran entero pachata rir tukuyta parlananllapapaq (Mateo 28:19, 20). ¿Imanutaq Jehová Diospa testigonkunaqa kay Jesús mandakushantaqa kasuyanllapa?

1. ¿Imanutaq Mateo 24:14 nishanqa cumplikayan kay tiempopi?

Jesusqa niran: “Diospa […] shumaq rimaynintaqa tukuy entero pachapi yaĉhachikunqallapa” nir (Mateo 24:14, NWT). Jehová Diospa testigonkunaqa kusala alegre kay Jesús mandakushantaqa kasunillapa. Chayrayku, entero pachata rir tukuy runakunata kay shumaq noticiakunataqa parlanillapa 1.000 rimaykunapi. Kay kusa shumaq trabajota rurayqa mana facilchu, pero Taytanchik Jehová Dios yanapamatinllapa kusa shumaqta rurayanillapa.

2. ¿Imanutaq tukuy runakunata yaĉhachinillapa?

Unay tiempopi naypaq cristianokunaqa “wasin wasin” tukuy runakunata yaĉhachiqllapa (Hechos 5:42, NWT). Chaynulla, kay tiempopipis tukuy runakunata maylawpi katinmapis parlanillapa; cada año kusala achka runakunata Diosmantaqa parlanillapa. Pero achka runakunata mana wasinpi tariyta puytinillapachu, chayrayku parquekunapi, mercadokunapi ima parlakunillapa. Maypi karpis Jehová Diosmanta, imatataq payqa ruranqa ima nir parlakur purinillapa.

3. ¿Pikunataq chay shumaq noticiakunataqa parlakunmanllapa?

Tukuy runakuna Jesús yaĉhachikushankunata ruraqkuna kay shumaq noticiakunataqa parlakunmanllapa. Nuqakunaqa shunquyllapamanta-pacha kaytaqa ruranillapa, chayrayku tukuy runakunata parlanillapa paykunapis washakananllapapaq (liyiy 1 Timoteo 4:16). Nipipis pagramatinllapachu kaytaqa ruranillapa, Bibliaqa nin: ʻChaymi imata rurar yanapakurpis ama cobrakunkillapachuʼ nir (Mateo 10:7, 8). Jehová Diosta adorar, alegriyachir, paymanta tukuy runakunata parlar ima siguinillapa wakin runakuna mana uyapamanayatinllapamapis.

MAS INTRAKASHUNLLAPA

4. Tukuy runakunata yaĉhachinillapa

VIDEO: Predicamos “hasta la parte más distante de la tierra” (7:33)

• ¿Ima ninkitaq imanu Jehová Diospa testigonkuna yaĉhachikur purishanmanta?

Liyiyllapa Mateo 22:39; Romanos 10:13-15 ima, chaymantaqa kaykunamanta parlayllapa:

• ¿Imata rurartaq tukuy runakunata munayanchikllapa?

• ¿Imanutaq Jehová Diosqa rikan paypa shumaq noticiankunata parlakuqkunataqa? (Rikayllapa versículo 15).

5. Yaĉhachikurqa Diosta yanapayanchikllapa

Jehová Diosmi yaĉhachikushaqa yanapamayanchikllapa. Rikashunllapa imataq pasaran Nueva Zelanda nacionpi nir. Uk día uk warmisita Jehová Diosta mañakuyaran shutinpi, “Jehová, imaraq riqsishunayani” nir. Chay tardella uk testigo, Paul shutiqqa riran wasin wasin yaĉhachikuq. Chaypi chay warmisitataqa tariran, Paulqa nin: “Kimsa horala pasaran wasinman ĉhar punkunta takanaypaqqa” nir.

Liyiyllapa 1 Corintios 3:9, chaymantaqa kaykunamanta parlayllapa:

• Kaypi rikashanchiknu, ¿pitaq yanapamayanchikllapa Diosmanta yaĉhakunaqkunataqa tarinallapapaq?

Liyiyllapa Hechos 1:8, chaymantaqa kaykunamanta parlayllapa:

• ¿Imapaqtaq Jehová Dios yanapamanallapata ministiyanchikllapa?

¿Yaĉhayaraykichu?

Reunionman rirqa, yaĉhakuyta puytinchik wasin wasin lluqshir yaĉhachikunallapapaq, ¿nuqakunawan tantakashaykichu? ¿Chaynu yaĉhachimatinllapaqa qamtaqa gustashunchu?

6. Tukuyta wasin wasin parlarqa Diosta kasuyanchikllapa

Naypaq siglopiqa Diosta ĉhiqniqkunaqa Jesuspa yaĉhakuqninkuna mana yaĉhachikunanta munaranllapachu. Pero naypaq cristianokunaqa autoridadkunaman riranllapa yaĉhachikur siguinanllapapaq (Filipenses 1:7). Kay tiempopipis Jehová Diospa testigonkunaqa chaynu rurayanillapa.a

VIDEO: Defendemos legalmente las buenas noticias (2:28)

Liyiyllapa Hechos 5:27-42, chaymantaqa kaykunamanta parlayllapa:

• ¿Imapaqtaq yaĉhachikur siguinillapa? (Liyiyllapa versiculokuna 29, 38, 39 ima).

KAYKUNATA YAĈHAKUSHANCHIK

Jesusqa payta siguiqkunata entero pachata rir yaĉhachikunanllapapaq mandaran. Jehová Diospis paypa pueblontaqa yanapayan kayta rurananllapapaqqa.

¿Imataq ninkiman?

• ¿Imatataq rurayanillapa tukuy runakunata Diosmanta yaĉhachinayllapapaq?

• ¿Imapaqtaq tukuy runakunata Diosmanta yaĉhachinchikllapa?

• ¿Diosmanta yaĉhachikuyqa yanapamashunchu alegre kanapaq? ¿Imapaqna?

MAS YAĈHAKUNAYKIPAQ

Rikay imanutaq Jehová Diospa testigonkunaqa kusala atun pueblokunapi yaĉhachikuyanllapa nir.

Predicación pública especial en áreas metropolitanas en París (5:11)

¿Imanutaq Jehová Diospa testigonkunaqa uklaw nacionmanta shamushakunata yaĉhachinllapa? Kaypi rikakuy.

Calmamos la sed espiritual de los refugiados (5:59)

Rikay imanutaq uk warmisita kusala alegre Diosmanta tukuy tiempo parlakur purin nir.

Un viaje incomparable (6:29)

Liyiy imanutaq Jehová Diospa testigonkunaqa achka juiciokunata ganashallapa nir.

“Los mensajeros del Reino acuden a los tribunales” (El Reino de Dios ya está gobernando, capítulo 13)