Bibliaqa Diospa Gobiernonmanta riman. Jehová Diosqa tukuy imakunata kay pachapi ruranayashantaqa gobiernonwan ruranqa. ¿Diosqa gobiernoyjunchu? ¿Imanutaq yaĉhanchik Diospa Gobiernonqa mandakuyanna nir? ¿Imakunatataq rurasha? ¿Imakunatataq shamuq tiempopiqa ruranqa? Kaykunamanta yaĉhakushun kay yaĉhakunapi, ishkay shamuq yaĉhakunakunapipis mas yaĉhakur siguishun.

1. ¿Diosqa gobiernoyjunchu? ¿Pitaq mandakunqa?

Jehová Diosqa uk gobiernota ĉhurasha kay pachaman mandakamunanpaq. Chay gobiernopiqa Jesús cielomanta-pacha mandakamunqa (Mateo 4:17; Juan 18:36). Jesuspaq Bibliaqa nin: ʻPay mandakunqa tukuy tiempopaqʼ (Lucas 1:32, 33). Jesusmi Diospa Gobiernonpi Mandakuq kanqa, chayrayku kay pachaman mandakamunqa.

2. ¿Pikunawantaq Jesusqa mandakunqa?

Jesusqa mana paylachu mandakunqa. Bibliaqa nin: ʻTukuy ayllukunamanta, ukman rimaykunapi rimaqkunamanta, tukuy pueblokunamanta ima. Chaynulla uklaw nacionmanta kaqkunapis […] mandakunqallapaʼ (Apocalipsis 5:9, 10). ¿Michkataq Jesuswanqa mandakunqallapa? Jesús kay pachapi kawsashanmanta-pacha kabal achka runakuna siguiq qallarishallapa. Pero 144.000 runakunala cieloman rinqallapa Jesuswan pulla mandakunanllapapaq (liyiy Apocalipsis 14:1-4). Tukuy cristianokuna kay pachapi quedaqkunaqa Jesús mandakuyatinnaqa apoyanqallapa (Salmo 37:29).

3. ¿Imapaqtaq Diospa Gobiernonqa mas allin runakunapa gobiernonmantaqa?

Achka mandakuqkuna allin imakunata ruranayan, pero mana poderniyjunchu chaykunata rurananpaqqa. Wakinkunaqa mana achka tiempota mandakunllapachu, ishkay manaqa kimsa añomantaqa ukkuna mandakuq yaykun. Pero Jesusta-shuypaqa mana pipis Diospa Gobiernonmantaqa urqunqachu. Chaymi Bibliaqa nin: “Chay gobiernoqa mana tukukanqachu” nir (Daniel 2:44, NTW). Jesús kay pachaman mandakamurqa tukuyta yanapamashun. Jesusqa kusala llakipakuq, kusalata munamanchik, kusala allin ima, chayrayku tukuy runakunata yaĉhachinqa paykunapis llakipakuq kananpaq, wakinkunata munananpaq, cuidananpaq ima (liyiy Isaías 11:9).

4. Jesusmi pachaman mandakamunqa

Jesucristoqa kusala poderniyjun, chayrayku pay mas allin mandakuq kanqa runakunamantaqa. Liyiyllapa Mateo 28:18, chaymantaqa kaykunamanta parlayllapa:

• ¿Imapaqtaq Jesuspa gobiernonqa mas allin kanqa runakunapa gobiernonmantaqa?

Runakunaqa mandakuyta puytinllapa uk nacionlapi, chaynullapis uk tiempolata mandakunllapa. Pero, ¿chaynuchu pasanqa Diospa Gobiernonwanqa? Liyiyllapa Daniel 7:14, chaymantaqa kaykunamanta parlayllapa:

• Diospa Gobiernontaqa nipipis tukchinqachu, ¿imapaqtaq chayqa kusala allin nuqanchikpaq?

• Diospa Gobiernonqa tukuy pachapi mandakunqa, ¿imapaqtaq chayqa kusala allin nuqanchikpaq?

5. Runakunapa gobiernonta tukchinqa

¿Imapaqtaq Diospa Gobiernonqa runakunapa gobiernonkunata tukchinqa? VIDEOTA rikayllapa, chaymantaqa kaykunamanta parlayllapa:

VIDEO: ¿Imatataq Diospa Gobiernonqa ruranqa? (uk partela) (1:41)

• Runakunapa gobiernonkunaqa, ¿ima saqra imakunatataq rurasha?

Liyiyllapa Eclesiastés 8:9, chaymantaqa kaykunamanta parlayllapa:

• ¿Diospa Gobiernonqa runakunapa gobiernonta tukchinqachu? ¿Imapaqtaq?

6. Cieloman rinanpaq akrakashakunaqa Jesuswan pulla kusala allin mandakuqkuna kanqallapa

Jesusqa uk runa yupay kay pachapi kawsaran. Chayrayku, allita riqsimanchik “imanula kashamapis llakipamayninchikta puytin” ima (Hebreos 4:15). Jehová Diosqa akraran 144.000 ullqukunawan warmikunata Jesuswan pulla mandakunanllapapaq. Paykunaqa ʻtukuy ayllukunamanta, ukman rimaykunapi rimaqkunamanta, tukuy pueblokunamanta […] uklaw nacionmantaʼ ima (Apocalipsis 5:9).

• Cieloman rinanpaq akrakashakunaqa Jesuswan kay pachapi kawsaranllapa nir yaĉharqa, ¿imanutaq sintinki? ¿Imapaqtaq?

7. Jehová Diospa leyninqa shumaq kawsanapaq yanapamanchik

Gobiernokunaqa runakunata leykunata qusha allinta kawsananllapapaq. Chaynulla, Diosninchikpis leyninta qumashanchik payta kasurqa shumaqta kawsanapaq. Liyiyllapa 1 Corintios 6:9-11, chaymantaqa kaykunamanta parlayllapa:

• ¿Imanutaq kawsashunllapa tukuy runakuna Diosta kasur kawsatinllapaqa?a

• ¿Tukuy runakuna Diospa leyninta kasuypaqllapachu? ¿Imapaqtaq chaynu yarpunki?

• ¿Imanutaq yaĉhanchikllapa mana Diosta kasuqkunapis Diostaqa kasuyta puytinllapa nir? (Rikayllapa versículo 11).

KAYKUNATA YAĈHAKUSHANCHIK

Diospa Gobiernonqa cielopi, entero pachapi ima mandakunqa.

¿Imataq ninkiman?

• ¿Pikunatataq Jehová Diosqa akrasha cielomanta-pacha mandakamunanllapapaq?

• ¿Imapaqtaq Diospa Gobiernonqa mas allin runakunapa gobiernonmantaqa?

• Jesús mandakutin tukuy tiempo kawsanapaq, ¿imatataq ruraypaqllapa?

MAS YAĈHAKUNAYKIPAQ

Liyiy Jesús rimashanmanta maypitaq Diospa Gobiernonqa kanqa nir.

“¿Es el Reino de Dios algo que se lleva en el corazón?” (Artículo de jw.org)

¿Imapaqtaq Jehová Diospa testigonkunaqa Diospa Gobiernonta kasunllapa runakunapa gobiernonta kasunanllapamantaqa? Rikay videota.

Completamente a favor del Reino de Dios (1:43)

Liyiy imataq Bibliaqa nin 144.000 runakuna cieloman rinanpaq akrakashakunamanta.

“¿Quiénes van al cielo?” (Artículo de jw.org)

Uk warmi carcelpi kaqta, ¿imataq yanaparan Jehová Diosla yanapamayninchikta puytin nir cuentata qukananpaq? Liyiy.

“Aprendí cómo se solucionarán las injusticias” (¡Despertad!, noviembre de 2011)

Diospa Gobiernonqa 1914 añopi cielopi mandakuq qallariran. Chay añolla kay pachapi kaq gobiernokuna tukukananpaq diaqa qallariran. ¿Imanutaq yaĉhanchik? Kaypi yaĉhakushun imataq niyaran Bibliaqa, imataq entero pachapi pasayan, imanutaq runakunaqa tukuyanllapa 1914 añomanta-pacha ima nir.

1. ¿Imataq Bibliaqa niyaran?

Bibliapi Danielpa libronqa rimayaranna Diospa Gobiernonqa mandakuq qallarinqa ʻsiete tiempokunaʼ pasashana katin nir (Daniel 4:16, 17, NWT). Jesuspis kay pachapi karqa niran michka tiempota nacionkunaqa mandakunqallapa nir. Yaĉhachikuranpis chay tiempoqa manaraq tukukashachu karan nir (Lucas 21:24). Kay yaĉhakuyashanchiknu siete tiempokunaqa tukukaran 1914 añopi.

2. ¿Imataq entero pachapi pasayan, imanutaq runakunaqa tukuyanllapa ima 1914 añomanta-pacha?

Discipulonkunaqa Jesusta kaynu nir tapuranllapa: ʻ¿Ima señalta rikartaq yaĉhayashaqllapa qam tikrakamuyankina nir, chaynulla kay pacha tukukanan tiempo ĉhamunqa nirqa?ʼ (Mateo 24:3). Jesusqa discipulonkunata respondiran achka imakuna pasanqa pay Diospa Gobiernonpi mandakuq qallarishana katinqa nir. Niran kanqa guerrakuna, mallaqnay tiempo, pachamapis kusalata kuyunqa ima nir (liyiy Mateo 24:7). Bibliaqa niranpis tukukana diakunapiqa runakuna saqrata tukutin “kay pachapiqa mana yaĉhakuypaqnachu kanqa” nir (2 Timoteo 3:1-5). 1914 añomanta-pacha cada día runakunaqa mas saqra imakunata rurayanllapa, tukuyanllapa ima.

3. ¿Imapaqtaq entero pachapi saqra imakunata rikayanchikllapa Jesús mandakuq qallarishanmanta-pacha?

Jesús cielopi Diospa Gobiernonpi mandakuq qallarirqa, unaq cielopi kusalata maqanakuran Satanaswan, demonionkunawan ima. Satanasqa mana ganakuyta puytiranchu, chaymi Biblia nishannu, ʻdiablotaqa tantar angelninkunawan pullata kay pachaman itakamuranllapaʼ (Apocalipsis 12:9, 10, 12). Satanasqa yaĉhayan mana masiaw tiempoyjunnachu nir, chayrayku kabalta piñakusha puriyan. Chaynullapis, entero pachapi tukuyta qischayan. Pero Diospa Gobiernon tukuy problemanchikkunata tukchinqa.

MAS INTRAKASHUNLLAPA

4. Biblia nishannu 1914 añopi Jesusqa mandakuq qallariran

VIDEO: 1914 añopi Diospa Gobiernonqa mandakuq qallariran (5:02)

Diosqa uk mandakuq Babiloniamanta Nabucodonosor shutiqta musqupachiran. Nabucodonosor musqupashan, Daniel rimashan imaqa; Nabucodonosorpa gobiernonpi, Diospa Gobiernonpi ima cumplikaran (liyiyllapa Daniel 4:17).a

Liyiyllapa Daniel 4:20-26. Chaymantaqa dibujokunata rikakur kay tapukuykunata respondiy:

• A) ¿Imatataq Nabucodonosorqa musquparqa rikaran? (Rikayllapa versiculokuna 20, 21 ima).

• B) ¿Imataq atun qirutaqa pasananpaq karan? (Rikayllapa versículo 23).

• C) ¿Imataq pasananpaq karan “siete tiempokuna” tukukashana katinqa? (Rikayllapa versículo 26).

Nabucodonosor musqupashan qiru, Diospa Gobiernon ima

BIBLIAQA NIYARAN (Daniel 4:20-36).

Gobierno

A) Kusala atun qiru

Gobiernonmanta lluqshiran

B) “Qiruta kuchuyllapa”, dejayllapapis “siete tiempokuna pasananpaq”

Gobiernonman qashan tikrakaran

C) “Qashan mandakuq qallarinki”

Pipitaq naypaqtaqa cumplikaran:

• D) ¿Pitaq atun qiruqa karan? (Rikayllapa versículo 22).

• E) ¿Ima pasatintaq gobiernonmanta lluqshiran? (Liyiyllapa Daniel 4:29-33).

• F) ¿Imataq Nabucodonosortaqa pasaran “siete tiempokuna” tukukatinnaqa? (Liyiyllapa Daniel 4:34-36).

PIPITAQ NAYPAQTAQA CUMPLIKARAN:

Gobierno

D) Nabucodonosor Babiloniapi mandakuyaran

Gobiernonmanta lluqshiran

E) Nabucodonosor yaru yupay tikrakaran 606 añopi m.J.ĉh.b chayrayku siete añota mana mandakuyta puytiranchu

Gobiernonman qashan tikrakaran

F) Nabucodonosorpa yarpuynin tikrakamutin qashan mandakuq qallariran

Pipitaq chaymantaqa cumplikaran:

• G) ¿Pikunataq atun qiruqa? (Liyiyllapa 1 Crónicas 29:23).

• H) ¿Ima pasatintaq gobiernonmantaqa lluqshiranllapa? ¿Imanutaq yaĉhanchik Jesús kay pachapi katinqa manana mandakuyaranllapachu nir? (Liyiyllapa Lucas 21:24).

• I) ¿Maypitaq Diospa Gobiernonqa qashan mandakuq qallariran? ¿Ima añotaq Diospa Gobiernonqa qashan mandakuq qallariran?

PIPITAQ CHAYMANTAQA CUMPLIKARAN:

Gobierno

G) Diosqa mandakuq israelitakunataqa Israel pueblopi mandakunanllapapaq ĉhuraran

Gobiernonmanta lluqshiran

H) Jerusalén pueblotaqa 607 añopi (m.J.ĉh.) dañaranllapa; chayrayku manana mandakuq israelitakunaqa mandakuyta puytiranllapachu 2.520 añokunata

Gobiernonman qashan tikrakaran

I) Jesusqa cielopi Diospa Gobiernonpi mandakuq qallariran 1914 añopi

5. 1914 añopi manchaypaq imakuna qallariran

VIDEOTA rikayllapa.

VIDEO: 1914 añopi manchaypaq imakuna qallariran (1:10)

Jesusqa niran pay mandakuq qallaritinqa kusala manchaypaq imakuna kay pachapiqa rikarinqa nir. Liyiyllapa Lucas 21:9-11, chaymantaqa kaykunamanta parlayllapa:

• Bibliapi liyishaykinu, ¿imakunatataq rikashayki? ¿Imakunamantataq rimaqllapata uyapashayki?

Apóstol Pabloqa niran kusala saqrata runakunaqa tukunqallapa tukukana diakunapina kawsayashaqa nir. Liyiyllapa 2 Timoteo 3:1-5, chaymantaqa kaykunamanta parlayllapa:

• Kay texto niyashannu, ¿imanutaq runakunaqa tukunqallapa?

6. Jesusqa Diospa Gobiernonpi mandakuyanna nir yaĉharqa, ¿imapaqtaq esfuerzakachuwan?

Liyiyllapa Mateo 24:3, 14, chaymantaqa kaykunamanta parlayllapa:

• Kaypi liyishaykinu, ¿imatataq Diosta serviqkunaqa entero pachapi rurayanllapa?

• ¿Imanutaq qampis Diospa Gobiernonmanta wakinkunata yaĉhachiyta puytinki?

Diospa Gobiernon cielopi mandakuyanna, chaynullapis pukulana faltayan entero pachapi mandakunanpaq. Liyiyllapa Hebreos 10:24, 25, chaymantaqa kaykunamanta parlayllapa:

• ¿Imatataq ruraypaqllapa Diospa dianqami ĉhamunqana nir yaĉharqa?

KAYKUNATA YAĈHAKUSHANCHIK

Biblia unay tiempo niyashan cumplikashatana rikar, chaynullapis kay tiempopi saqra imakuna pasaqta rikar imaqa, cuentata qukanchikllapa Diospa Gobiernonqa mandakuyanna nir. Nuqanchikkunaqa kaypi allita creyinchik, chayrayku Diospa Gobiernonmanta yaĉhachikunchikllapa, reunionman rir siguinchikllapa ima.

¿Imataq ninkiman?

• Daniel libronpi “siete tiempokunamanta” rimaran chaykuna tukukatinnaqa, ¿imataq pasaran cielopi?

• ¿Imapaqtaq seguro kanki 1914 añopi Jesusqa cielopi Diospa Gobiernonpi mandakuq qallariran nir?

• ¿Imakunata rurartaq Diospa Gobiernonta apoyayta puytinki?

MAS YAĈHAKUNAYKIPAQ

Liyiy mas yaĉhaq runakunaqa imatataq ninllapa 1914 añomanta-pacha saqra imakuna pasaq qallarishanmanta.

“La era en que los valores decayeron radicalmente” (¡Despertad!, abril de 2007)

Liyiy imanutaq uk runata Mateo 24:14 niyashanqa yanapasha nir.

“El béisbol era mi pasión” (La Atalaya, núm. 3 2017)

¿Imanutaq yaĉhanchik Daniel capítulo 4-qa Diospa Gobiernonmanta riman nir? Kaypi liyiy.

“¿Cuándo comenzó a gobernar el Reino de Dios? (Primera parte)” (La Atalaya, 1 de octubre de 2014)

¿Imanutaq yaĉhanchik Daniel capítulo 4-pi “siete tiempokunamanta” rimayashanqa 1914 añopi tukukaran nir? Kaypi liyiy.

“¿Cuándo comenzó a gobernar el Reino de Dios? (Segunda parte)” (La Atalaya, 1 de noviembre de 2014)

Diospa Gobiernonqa mandakuyanna. Pukulana faltayan kabal achka imakunata kay Pachanchikpi rurananpaq. Yaĉhakushunllapa ima kusala shumaq imakunata Diospa Gobiernonqa ruranqa nir. Chaynullapis, yaĉhakushunllapa achka bendicionkunata qamqa aypanki nir.

1. ¿Imatataq Diospa Gobiernonqa ruranqa kusala allin imakunata rurar, tranquilo ima kawsanapaq?

Uk guerra Armagedón shutiqpi Jesusqa Diospa Gobiernonwan saqra runakunata, runakunapa gobiernonkunata ima tukchinqa (Apocalipsis 16:14, 16). Chay tiempopiqa kay Biblia niyashan limpula cumplikashana kanqa: “Manami maychu saqrata ruraqkuna tukukananpaqqa” (Salmo 37:10). Diospa Gobiernonwan Jesusqa entero Pachapi kusala allin imakunata rurar, tranquilo ima kawsanapaq yanapamashun (liyiy Isaías 11:4).

2. Kay Pachapiqa Dios munayashan rurakatin, ¿imanutaq kawsashunllapa?

Dios mandakuyatinqa, “Allinlata ruraqkunaqami pachataqa herencianllapapaq aypakur, tukuy tiempopaq kawsanqallapa” (Salmo 37:29). Mana saqra runakuna katin, tukuyla Jehová Diosta kabalta munatinllapa, ukninllapa ukninllapa kabalta munanakutinllapa imaqa kusala alegrina kawsashunllapa. ¡Chayqa kusala shumaq kanqa! ¿manchu? Nipipis qishanqanachu, ashwan tukuy runakuna tukuy tiempopaq kawsanqallapa.

3. Diospa Gobiernonqa, ¿imatataq ruranqa saqra runakunata tukchirnaqa?

Saqra runakunata tukchirnaqa Jesusqa 1.000 añokunata mandakunqa, chay tiempopiqa, Jesús 144.000 cieloman rishakunawan, cielomanta-pacha mandakamur kay Pachapi kawsaqkunata yanapanqallapa amana uchayjunnachu kar tukuy tiempopaq kawsayta puytinanllapapaq. 1.000 añokuna tukukatinnaqa entero pacha kabal shumaq kanqa. Tukuy runakuna kusala alegre kawsanqallapa Jehová Diospa leyninkunalata kasur. Chaymantaqa, Jesusqa gobiernontaqa Taytan Jehová Diosta qunqa. Chaymi Diospa shutinta kabalta respetanqallapa (Mateo 6:9, 10). Tukuyla cuentata qukanqallapa Jehová Diosqa kusala allin mandakuq, pueblonta cuidan ima nir. Chaymantaqa, Jehová Diosqa Satanasta demonionkunawan tukchinqa, chaynullapis tukuy Diospa Gobiernonpaq contran kaqkunata tukchinqa (Apocalipsis 20:7-10). Tukuy kusala shumaq imakunata Diospa Gobiernon rurashanqa tukuy tiempopaq kanqa.

MAS INTRAKASHUNLLAPA

4. Diospa Gobiernonqa runakunapa gobiernonkunata tukchinqa

“Runaqami runa masinta munashanta rurar qischarqa paypis qischakan” (Eclesiastés 8:9). Jehová Diosqa Gobiernonwan saqra imakunata runakuna rurashanta tukchinqa.

Liyiyllapa Daniel 2:44; 2 Tesalonicenses 1:6-8 ima, chaymantaqa kaykunamanta parlayllapa:

• ¿Imanachinqallapataq Jehová Dioswan wamran Jesusqa runakuna mandakuqkunata? Chaynullapis, ¿imanachinqallapataq runakuna runakunapa gobiernonta apoyaqkunata?

• ¿Imapaqtaq seguro kanki Jehová Dioswan Jesús ruranayashanqa kusala allin nir?

5. Jesús kusala allin mandakuq kanqa

Jesús Diospa Gobiernonpi mandakurqa, kusala shumaq imakunata ruranqa kay Pachapi kawsaqkunapaq. VIDEOTA rikayllapa yaĉhanaykipaq imapaqtaq Jesusqa tukuy runakunata yanapanayan, yaĉhanaykipaqpis Diosqa Jesusta poderta qusha chaykunata rurananpaq ima nir.

VIDEO: Jesusqa rikachimaranchik imatataq Diospa Gobiernonqa ruranqa nir (1:13)

Jesús kay Pachapi kusala achka imakunata rurarqa rikachimaranchik imatataq Diospa Gobiernonqa ruranqa nir. Achka bendicionkuna Dios arnimashanchikkuna mas uralawpi kaqkunamantaqa, ¿mayqanninkunataq cumplikananta munayanki? Liyiyllapa tukuy textokunata tukuy Dios arnimashanchikta yaĉhanaykipaq.

6. Diospa Gobiernon mandakutin kusala shumaqta kawsashunllapa

VIDEO: Shamuq tiempopiqa kusala alegre kawsashun (4:38)

Liyiyllapa Salmo 145:16, chaymantaqa kaykunamanta parlayllapa:

• ¿Imanutaq sintiyanki Jehová Diosqa kusala “achka bendicionta” tukuy nuqanchikkunata qumashun nir yaĉharqa?

KAYKUNATA YAĈHAKUSHANCHIK

Jehová Diospa Gobiernonqa tukuy pay munashanta ruranqa. Entero pacha kabal shumaq kanqa chaynullapis, tukuy runakuna Diosta kasuqkuna paylata adoranqallapa tukuy tiempopaq.

¿Imataq ninkiman?

• ¿Imatataq Jehová Diosqa Gobiernonwan ruranqa paypa shutinta respetananllapapaq?

• ¿Imapaqtaq seguro kanchikllapa Diospa Gobiernonqa tukuy Dios arnimashanchikkunata cumplinqa nir?

• Diospa Gobiernonqa achka shumaq imakunata ruranqa chaykunamantaqa, ¿ima bendicionkunatataq alliplata rikanayanki?

MAS YAĈHAKUNAYKIPAQ

Liyiy imataq Armagedonqa nir yaĉhakunaykipaq.

“¿Qué es el Armagedón?” (Artículo de jw.org)

Liyiy imakunataq pasanqa Jesús rimaran chay “kusala saqra manchaypaq” tiempo ĉhamutinqa(Mateo 24:21).

“¿Qué es la gran tribulación?” (Artículo de jw.org)

¿Imakunataq ayllukunata yanapayta puytin mushuq pachapi yarpunanllapapaq? Kay videota rikakuy.

Imagínate en el Paraíso (1:50)

Liyiy imanutaq uk runa Diospa Gobiernonpa contran kaqta Bibliaqa yanaparan nir.

“La Biblia les cambió la vida” (La Atalaya, 1 de enero de 2012)