YAĈHAKUNA 03
¿Bibliapiqa confiakayta puytinchikchu?
Bibliapiqa achka consejokunata, bendicionkunata ima tarinchikllapa. Yaĉhanayanki kanqa ima mas imakunamantataq Bibliaqa yaĉhachimanchik nir, pero ichapis Bibliapiqa manaraq masiawta confiakayankichu kanqa. Chayqa, unay may tiempo escribikasha katinmapis, ¿Biblia nishanpiqa confiakayta puytinchikchu? ¿Creyiypaqchu kanan tiempopaq, shamuq tiempopaq ima Biblia niyashanpiqa? Achka runakunaqa allita chaypi creyinllapa. Yaĉhakuy imapaqtaq chaynu creyinllapa nir, chaynumi qampis cuentata qukanki imapaqtaq Biblia nishanpi confiakaypaq nir.
1. ¿Tukuy Biblia nishanqa ciertochu kanqa?
Bibliapiqami “chiqap [manaqa cierto] rimaykunata” tarinchik (Eclesiastés 12:10). Tukuy Biblia niyashanqa kabaltami rurakaran. Biblia runakunamanta willamanchik chaykunaqa ciertota kawsaranllapa (liyiy Lucas 1:3; 3:1, 2 ima). Biblia tukuy ima pasashakunamanta rimarqa nin: imataq pasaran, pitataq pasaran, maydiataq pasaran, maypitaq pasaran ima nir.
2. Kabal achka tiempoyjun katinmapis, ¿imapaqtaq Bibliapiqa confiakanchik?
Unaymanta Bibliaqa rimayaranna, runakuna chayraq yaĉhashanmanta. Runakunaqa ukmanta creyinllapa, pero Biblia-shuypaqa yaĉhachimanchik pitaq, imanutaq ima tukuy imakunata ruraran nir. Chaymi kanan tiempopiqa mas yaĉhaq runakunaqa cuentata qukashallapa Bibliaqa mana pantanchu nir. Tukuy Biblia niyashanqa “tukuy tiempopaq ĉhurakasha. Chiqap [manaqa cierto] kaqwan chaynulla karanla kaqwan rurakasha” (Salmo 111:8).
3. ¿Imaraykutaq confiakaypaq Biblia shamuq tiempopaq niyashanpi?
Unaymanta-pacha, Bibliaqa nimayaranchikna “achka imakuna manaraq cumplikashakunamanta” (Isaías 46:10, NWT). Bibliaqa niranpis achka imakuna pasanqa nir, achka tiemporaq cumplikanapaq faltayatin. Tukuy imakunata kay tiempokunapi rikayanchik chaykunamantapis Bibliaqa rimayaranna. Kay yaĉhakunapiqa yaĉhakushunllapa unaymanta-pacha achka imakunamanta Biblia niyashanmanta, yaĉhakushunpis imanutaq Biblia niyashannu cumplikasha nir.
MAS INTRAKASHUNLLAPA
Mas yaĉhaq runakuna nishanta Biblia nishanwan compararqa, cuentata qukashunllapa chaylla nir. Yaĉhakushunllapapis unaymanta-pacha Biblia niyashanqa imanutaq cumplikasha, imanutaq cumplikayan, imanutaq cumplikanqa ima nir.
4. Mas yaĉhaq runakuna niyashanqa Biblia niyashannulla
Unay tiempomanta-pacha, kusala achka runakunaqa creyiqllapa pachaqa achka imakunapi sintikuyan nir. VIDEOTA rikayllapa.
3.500 añokunana pasasha libro Job shutiqpi Moisés pachapaq escribikushanqa. Liyiyllapa Job 26:7, chaymantaqa kaykunamanta parlayllapa:
Pachaqa mana imapipis sintikuyanchu nin Bibliaqa, ¿imatataq chayqa yarpuchishun?
Chayraq 200 añokuna pasasha, mas yaĉhaq runakuna imaraykutaq yakuqa mana chakinchu nir intrakashanllapaqa. Pero Biblia-shuypaqa unay may tiempomanta-pacha kaymantaqa rimayaranna. Liyiyllapa Job 36:27, 28, chaymantaqa kaykunamanta parlayllapa:
Yaku imaraykutaq mana chakinchu nir yaĉhayqa, ¿imaraykutaq kusala shumaq?
Tukuy textokunata liyishaykiqa, ¿yanapashunchu mas Bibliapi confiakanaykipaq?
5. Bibliaqa niran imakunataq pasanqa nir
Liyiyllapa Isaías 44:27-45:2, chaymantaqa kaykunamanta parlayllapa:
200 añokuna manaraq Babilonia puebloqa tukukayatin, ¿imataq Bibliaqa Babiloniapaq niran?
539 añopi manaraq Jesús pachaman ĉhamuyatin, uk mandakuq Ciro shutiq Persia nacionmanta soldadonkunawan Babilonia puebloman yaykuranllapa. Naypaqtaqa uk río Babiloniapa ĉhawpinta pasaqta tikrar chakichiranllapa. Punkukuna kiĉhalla katin mana maqanakurchu yaykuranllapa Babiloniamanqa. 2.500 añokunana pasasha, pero mandakuq Ciro soldadonkunawan tukchiran chaynulla Babiloniaqa, mana pipis chaypiqa kawsannachu. Kananqami rikay imatataq Bibliaqa niran Babiloniapaq nir.
Liyiyllapa Isaías 13:19, 20, chaymantaqa kaykunamanta parlayllapa:
¿Imanutaq kayqa cumplikaran?
Babiloniaqa kaynu quedasha, Irak nacionpi
6. Bibliaqa niran imatataq kay tiempopiqa rikashun nir
Bibliaqa nin “juicio día ĉhamunanpaq shipchana” nir (2 Timoteo 3:1). Yaĉhakuy imakunataq pasanqa kay tiempopiqa nir.
Liyiyllapa Mateo 24:6, 7, chaymantaqa kaykunamanta parlayllapa:
¿Imataq niran Bibliaqa tukukana diakunapaq?
Liyiyllapa 2 Timoteo 3:1-5, chaymantaqa kaykunamanta parlayllapa:
Kay tiempopiqa, ¿imanutaq runakunaqa tukunqallapa niyaran Bibliaqa?
¿Bibliapi liyishanchiknuchu runakunaqa tukuyanllapa? ¿Qamqa rikashaykichu chaynu tukuqta?
WAKINKUNAQA KAYNU YARPUNLLAPA: “Tukuy Bibliapi tarishanchikqa cuento yupay, mana ciertochu”.
Kaypi yaĉhakushaykimantaqa, ¿imataq yanapashunqa allita Bibliapi confiakanaykipaq?
KAYKUNATA YAĈHAKUSHANCHIK
Mas yaĉhaq runakuna niyashan, tukuy Biblia niyashan cumplikashana ima nir yaĉhayqa, yanapamanchik Bibliapi allita confiakanapaq.
¿Imataq ninkiman?
¿Tukuy Biblia nishanqa ciertochu manaqachu cuentota chaypiqa tarinchik?
¿Imanutaq yaĉhanchik mas yaĉhaq runakuna niyashanqa Biblia niyashannulla nir?
¿Bibliaqa shamuq tiempopaq rimayanqachu? ¿Imapaqtaq chaynu yarpunki?
MAS YAĈHAKUNAYKIPAQ
Mas yaĉhaq runakuna cuentata qukashanqa Biblia nishanwan, ¿chayllachu kanqa?
“¿Concuerda la Biblia con lo que ha descubierto la ciencia?” (Artículo de jw.org)
¿Imanutaq yaĉhanchik tukukana diakunapi kawsayanchik nir?
“Seis profecías bíblicas en pleno cumplimiento” (La Atalaya, 1 de mayo de 2011)
Yaĉhakuy imanutaq Biblia Grecia nacionpaq nishan cumplikashana.
Rikay imanutaq unay tiempo Biblia niyashan cumplikashanqa uk runata yanaparan Bibliapi confiakananpaq.