YAĈHAKUNA 05
Diosqami Bibliataqa nuqanchikkunapaq ruraran
Jehová Diosninchikqami nuqanchikpaq Bibliata dejasha; Bibliapi tarinchik 66 librokuna. ¿Pimantataq Bibliaqa shamun? ¿Pikunataq Bibliataqa escribiranllapa? Kay yaĉhakunapiqa chaykunamantaqa yaĉhakushunllapa.
1. Runakuna escribisha katinmapis, ¿imapaqtaq ninchikllapa Diospa Palabran nir?
40 runakuna Bibliataqa escribiranllapa; michikuqkuna, pescadorkuna, mandakuqkuna ima. 1513 añopi manaraq Jesús pachaman ĉhamuyatin, runakuna Bibliataqa escribiq qallariranllapa; 98 añopi Jesús kay pachaman ĉhamushana katin, escribir tukchiranllapa. 1.600 añota tardaranllapa Bibliata escribinanllapapaqqa. Chaynu katinmapis, ¿imapaqtaq tukuy Bibliata escribiqkunaqa chaynullatami Diospa yarpuynintaqa escribiranllapa? Bibliaqami Diospa Palabran (liyiy 1 Tesalonicenses 2:13). Kay runakunaqa mana paykunapa yarpuynintachu escribiranllapa. Ashwan ‘Dios munashannulla yaĉhachikuran, escribiran ima santo espíritu chaynu ruray nir yanapatin’ (2 Pedro 1:21).a Diosqa santo espiritunwan runakunata yanaparan pay munashannullata escribinanllapapaq (2 Timoteo 3:16).
2. ¿Pikunataq Bibliamanta yaĉhakuyta puytinllapa?
‘Tukuyla pachapi kawsaqkuna, uklaw nacionmanta [manaqa paismanta] kaqkuna, ukman ayllukuna, ukman rimaypi rimaqkuna, chaynulla tukuyla pueblokuna ima’ Bibliamanta yaĉhakuyta puytinllapa (liyiy Apocalipsis 14:6). Diosninchikqami tukuy runakuna Bibliataqa liyinanta munayan, chayrayku Bibliaqa rurakasha kusala achka rimaykunapi. Bibliaqa mas rimaykunapi kan wakin librokunamantaqa.
3. ¿Imatataq Diosqa ruraran Bibliaqa ama chinqananpaqchu?
Bibliataqa animalpa qaranpi, uk qiru papiro shutiqpi ima escribiranllapa, chayrayku dañakayta puytiyaran. Pero allin runitokuna kutir kutir makinwan Bibliapa copiankunata allinta escribiranllapa. Wakin runakunaqa Bibliata ĉhiqnir chinqachinaranllapa, wakin runakuna-shuypaqa yaqqala wanuran, nataq wakin-shuypaqa vidanta qukur wanuranllapa Bibliata washananllapapaq. Jehová Diosqa palabranta washasha nuqanchikwan parlar siguinanpaq. Bibliaqa nin: “Diosninchikpa palabran-shuypaqa tukuy tiempopaq kanqa” nir (Isaías 40:8, NWT).
MAS INTRAKASHUNLLAPA
Masta yaĉhakushun imanutaq Jehová Dios runakunata yanaparan Bibliata escribinanllapapaq nir. Yaĉhakushunllapapis imanutaq Jehová Diosqa palabranta washaran liyiyta puytinapaq nir.
4. Bibliaqa Diospa palabran
VIDEOTA rikayllapa. Liyiyllapa 2 Timoteo 3:16, chaymantaqa kaykunamanta parlayllapa:
Runakuna Bibliataqa escribisha katinmapis, ¿imapaqtaq ninchikllapa Diospa palabran nir?
¿Imapaqtaq creyiypaq Jehová Diosqa runakunata willatin Bibliataqa escribiranllapa nir?
Uk patrón uk cartata serviqninta escribiy nitinqa, chay serviqninqa patronninpa yarpuyninkunata escriben, mana paypa yarpuyninkunatachu. Chaynu Bibliawanpis pasasha: Jehová Diosqa runakunata willatin paypa yarpuyninkunata escribiranllapa.
5. Bibliataqa mana chinqachiyta puytiranllapachu
Bibliaqami Diosmanta shamun, chayrayku mana dejashachu payta ĉhiqniqkunaqa Bibliataqa chinqachinanpaq. Unaymanta achka mandakuqkuna, religiosokuna ima Bibliataqa chinqachinayaranllapa ama runakuna liyinanllapapaqchu, pero pukula runakuna-shuypaqa yaqqala wanur Bibliataqa washaranllapa. Chay runito Bibliata washananpaq vidanta qukuran chayta riqsinaykipaq, VIDEOTA rikayllapa, chaymanta kaykunamanta parlayllapa:
Pukula runakuna Bibliata washananpaq kusalata qischakar wanuran, ¿manchu? Chayqa, ¿animachishunchu mas Bibliata liyiyta munanaykipaq? ¿Imapaqtaq?
Liyiyllapa Salmo 119:97, chaymantaqa kaykunamanta parlayllapa:
¿Imapaqtaq achka runakunaqa vidanta qukuran Bibliaqa achka rimaykunapi rurakananpaq?
6. Bibliaqa tukuypaq rurakasha
Bibliataqami kusala achka rimaykunaman tikrashallapa tukuy runakuna entero pachapi liyiyta puytinanllapapaq. Liyiyllapa Hechos 10:34, 35, chaymantaqa kaykunamanta parlayllapa:
¿Imapaqtaq Diosqa kusala achka rimaykunapi Bibliaqa rurakananta munayan?
Bibliapi yaĉhakushaykimanta, ¿imataq gustashusha?
Yaqqala
100%
runakuna entero pachapi
Bibliata liyiyta puytinllapa rimayninpi
Bibliaqa mas de
3.000
rimaykunapi kan
Yaqqala
5.000 millones
Bibliakuna rurakasha.
Bibliaqa unaymanta-pacha wakin librokunamantaqa mas rurakasha
WAKINKUNAQA KAYNU YARPUNLLAPA: “Bibliaqa masiaw tiempoyjunna, runakuna rurasha ima”.
¿Imataq qamqa ninki?
¿Imapaqtaq ninchikllapa Bibliaqa Diospa palabran nir?
KAYKUNATA YAĈHAKUSHANCHIK
Bibliaqa Diospa palabran Diosqa rurasha tukuy runakuna Bibliayjun kananpaq.
¿Imataq ninkiman?
Bibliata escribirqa, ¿imapaqtaq ninchikllapa runitokunaqa Diospa yarpuyninkunata escribiranllapa nir?
Jehová Diosqa Bibliata washaran ama chinqananpaqchu, ¿imatataq chayqa yarpuchishun? ¿Michka Bibliataq kanankaman kan? ¿Michka rimaykunapitaq kan?
Diosqa Biblianta dejasha payta riqsinaykipaq nir yaĉharqa, ¿imanutaq sintikanki?
MAS YAĈHAKUNAYKIPAQ
Yaĉhakuy imanutaq Bibliataqa ruraranllapa nir.
Yaĉhakuy imanutaq Bibliaqa washakaran kimsa ĉhiqniqninkunamanta nir.
“La Biblia. Una historia de supervivencia” (La Atalaya, núm. 4 2016)
Rikay imataq runakunataqa pasaran Bibliata wakin rimaykunaman tikrayatinllapa.
Achka Bibliapa copiankunaqa kan, pero, ¿imapaqtaq seguro kaypaqllapa Diospa palabranqa unaymanta kanankaman chaylla?
“¿Se ha cambiado o manipulado la Biblia?” (Artículo de jw.org)
a Diospa santo espiritunqa paypa podernin. Mas yaĉhanaykipaq yaĉhakuna 07-ta rikay.