YAĈHAKUNA 09
Diosta mañakurqa payman mas qimikanchik
Diosta mañakutkiqa payqa yanapashunqa shumaqta kawsanaykipaq. Diosta mañakuy qischakayarqa, payqa fuerzanta qushunqa shachinakunaykipaq. Pero, ¿imanutaq Diostaqa mañakuyta puytinchik? ¿Mañashaqa Diosqa uyapamayashunchu? ¿Imanutaq qamqa seguro kayta puytinki Diosqa uyapashuyan nir?
1. ¿Pitataq mañakuypaqllapa? ¿Imakunatataq Diostaqa mañayta puytinchik?
Jesusqa Jehová Diosta mañakuran, chayrayku payqa yaĉhachikuran Taytanlata mañakuypaqllapa nir. Payqa niran: ‘Qamkunaqa kaynu mañakunkimanllapa: “Unaq cielopi Taytayllapa...”’ (Mateo 6:9). Diosta mañakurqa, payman mas qimikashun.
Diostaqa imatapis mañayta puytinchik, pero pay munashannulla. Bibliaqa nin: “Nuqanchikkunaqa pay munashannuta mañakushaqa uyamanchikllapa” nir (1 Juan 5:14). Jesusqa yaĉhachikuran imakunatataq Diostaqa mañakuyta puytinchik nir (liyiy Mateo 6:9-13). Payqa yaĉhachikuranpis Diostaqa yusul payji niypaq nir, ukkunapaq mañakuypaq ima.
2. ¿Imanutaq Diostaqa mañakuypaq?
Bibliaqa nimanchik: “¡Paypa [Diospa] naypanpiqa shunquykita kiĉhay!” nir (Salmo 62:8). Jehová Diosqa shunqunchikmanta-pacha mañanata munayan. Dioswanqa parlayta puytinchik uyarala, imuraspis, may lugarpi karpis, imata rurayar imamapis. Diostaqa kusala respetowan mañakuypaq.
3. ¿Imanutaq Jehová Diosqa tukuy mañakushanchiktaqa contestamanchik?
Diosta mañakushaqa Bibliawan contestamanchik. Cada día Bibliata liyirqa, imatapis Dios munashannu rurayta puytishunllapa, shumaqta kawsayta puytishunllapa ima (Salmo 19:7; liyiy Santiago 1:5). Problemayjun karqa Diosta mañayta puytinchik, paymi animachimayninchikta puytin tranquilo kanapaq. Diospis hermanonchikkunawan yanapamayninchikta puytin.
MAS INTRAKASHUNLLAPA
Yaĉhakushunllapa imanutaq Diosta shunqunchikmanta-pacha mañakuyta puytinchik, imanutaq Diosta mañakuyqa yanapamayninchikta puytin ima nir.
4. Mañakutinllapaqa, ¿Diosqa tukuyta uyapayanqachu?
¿Imatataq ruraypaq mañakushaqa Jehová Diosqa uyapamanallapapaq? VIDEOTA rikayllapa.
Jehová Diosqa paylata mañakunata munayan. Liyiyllapa Salmo 65:2, chaymantaqa kaykunamanta parlayllapa:
¿Jehová Diosqa mañakunaykita munayanqachu? ¿Imapaqtaq chaynu yarpunki?
Jehová Dios mañakushanchikta uyapamanallapapaqqa, pay munashanta rurar kawsaypaqllapa. Liyiyllapa Miqueas 3:4; 1 Pedro 3:12 ima, chaymantaqa kaykunamanta parlayllapa:
¿Imanutaq seguro kayta puytinchikllapa Diosqa mañakushaqa uyapamanchikllapa nir?
Soldadokuna guerraman rir runa masinkunata wanuchinanpaq, ganakunanpaq ima Diosta mañakutinllapaqa, ¿Diosqa uyapayanqachu?
5. Shunqunchikmanta-pacha Diosninchiktaqa mañakuypaqllapa
Achka runakuna Diosta mañakurqa kutir kutir chayllata rimanllapa, pero, ¿chaynu mañatinllapaqa Diosqa uyapayanqachu? Liyiyllapa Mateo 6:7, chaymantaqa kaykunamanta parlayllapa:
¿Imatataq rurayta puytinchik Diosta mañakurqa ama chayllata kutir kutir willanallapapaq?
Cada día yarpuy imakunatataq Diosqa qampaq rurasha nir, chaymantaqa chaykunapaq yusul payji nir mañay. Chaynu rurarqa, uk semanapiqa siete imakunamanta mañashayki kanqa.
Uk llakipakuq tayta wamran shunqunmanta-pacha paywan parlananta munan. Jehová Diospis nuqanchikkunaqa shunqunchikmanta-pacha paywanqa parlanata munayan.
6. Diosqa oracionta qumashanchik paywan parlanapaq
Kwashalla kar mañashaqa, ¿Diosqa fuerzata qumashunchu? VIDEOTA rikayllapa.
Bibliaqa nin Diosta mañakushaqa Diosninchikqa yanapamashun nuqanchiklla tranquilo kanapaq nir. Liyiyllapa Filipenses 4:6, 7, chaymantaqa kaykunamanta parlayllapa:
Problemanchikkuna mana tukukatinmapis, ¿imanutaq Diosta mañakuyqa yanapamanchik?
¿Imakunatataq Diostaqa mañanayanki?
¿Yaĉhayaraykichu?
Amén nirqa quechuanchikpiqa “chaynumi kanqa” niyanchik. Unaymanta-pacha Diosta serviqkunaqa, Diosta mañakur tukchirqa, “chaynumi kanqa” niqllapa (1 Crónicas 16:36).
7. Tiempoykita urquy Diosta mañakunaykipaq
Imanchikkunalapi kusalata yarpurqa Diosta mañakuytaqa qunqachuwan. Jesusqa Taytanta mañakunanpaq tiemponta urquran. Liyiyllapa Mateo 14:23; Marcos 1:35 ima, chaymanta kaykunamanta parlayllapa:
¿Imatataq Jesusqa ruraran tiemponta urqur Taytanta mañakunanpaq?
Qamqa, ¿imatataq rurankiman tiempoykita urqur Diosta mañakunaykipaq?
WAKINKUNAQA KAYNU YARPUNLLAPA: “Yanqalla Diostaqa mañanchik, payqa mana uyapamanchikchu”
¿Ima ninkitaq qamqa?
KAYKUNATA YAĈHAKUSHANCHIK
Jehová Diosta mañakurqa payman mas qimikanki, kusala shumaqta yarpur alegre kawsanki, fuerzata aypar Dios munashanta rurar kawsanki ima.
¿Imataq ninkiman?
¿Pitataq mañakuypaqllapa?
¿Imanutaq mañakuypaqllapa?
¿Imanutaq yanapamanchik Diosta mañakuyqa?
MÁS YAĈHAKUNAYKIPAQ
Mas yaĉhakuy Diosta mañakunaykipaq
“Siete preguntas sobre la oración” (La Atalaya, 1 de octubre de 2010)
Liyiy imapaqtaq Diosta mañakuyta ministinki nir.
Kaypi yaĉhakunki pitataq mañakuchuwanllapa nir.
Rikakuy maypi, maydia, imuras ima Diostaqa mañakunkiman nir.