Jehová Dioswan Jesusta yusul payji niypaq uchanchikkunamanta washamashanchikllaparayku

¿Imanutaq sintinki amigoyki uk shumaq regalota qushutinqa? Alegre sintinki, ¿manchu? Chaynullapis, amigoykita rikachinayanki kanqa chay regaloqa kusala shumaq qampaqqa nir. Jehová Dioswan Jesuspis kabal shumaq regalota qumashanchik: Jesús vidanta nuqanchikkunapaq qukuran. Yaĉhakushun imanutaq rikachikuyta puytinchik chay regaloqa kusala shumaq nuqanchikpaqqa nir.

1. ¿Imatataq rurayta puytinchik Jehová Dioswan Jesusta yusul payji ninapaq?

Bibliaqa nin tukuy runakuna ʻJesuspi creyiqkunaqaʼ tukuy tiempopaq kawsanqallapa nir (Juan 3:16). ¿Imata rurartaq Jesuspi allita creyiyta puytinchik? Mana Jesuspi creyirlachu, ashwan Jesús yupay kawsar (Santiago 2:17). Chaykunata rurarqa, mas Jehová Dioswan Jesusta munashunllapa (liyiy Juan 14:21).

2. ¿Imata rurartaq Jehová Dioswan Jesusta payji niyta puytinchik?

Jesús manaraq wanuyarqa yaĉhakuqninkunata willaran, tukuy añokunata tantakananllapapaq. Bibliaqa chay diata shutichin Jesús wanushanta yarpushunllapa nir (1 Corintios 11:20). Jesusqa chay diata akraran apostolninkuna, pay yaĉhachikushanta rurar kawsaqkuna ima, payqa tukuy runakunapaq wanuran nir yarpunanllapapaq. Chaymi Jesusqa kaynu nir mandakuran: “Kaytami ama qunqarchu rurankillapa yarpumanaykillapapaq” nir (Lucas 22:19). Jesús wanushanta yarpunaykipaq tantakarqa Jehová Dioswan Jesusta yusul payji niyanki.

MAS INTRAKASHUNLLAPA

3. Jehová Diosta payji ninapaqqa pay munashanta rurar kawsashunmanllapa

Ĉhuqayatki mayqan das yanapashutinqa. ¿Chay yanapashuran chaymantaqa das qunqankimanchu? ¿Manaqachu achka imakunata rurar payji ninkiman?

Jehová Diosqa wamranta kaĉhamuran, tukuy tiempo kawsayta puytinapaq. Liyiyllapa 1 Juan 4:8-10, chaymantaqa kaykunamanta parlayllapa:

• ¿Imapaqtaq Jesús wanushanqa uk regalo yupay nuqanchikpaqqa?

• ¿Imanutaq sintinki Jehová Dioswan Jesús kaykunata qampaq ruraran nir yaĉharqa?

¿Imatataq rurayta puytinchik Jehová Dioswan Jesusta payji ninapaq? Liyiyllapa 2 Corintios 5:15; 1 Juan 4:11, 5:3 ima. Uklap uklap kay textokunataqa liyiyllapa, chaymantaqa kaykunamanta parlayllapa:

• ¿Imatataq rurayta puytinchik Jehová Dioswan Jesusta payji ninapaq?

4. Jesús yupay kawsayllapa

Jesusta payji ninapaqqa Jesús yupay kawsaypaqllapa. Liyiyllapa 1 Pedro 2:21, chaymantaqa kaykunamanta parlayllapa:

• Qampis, ¿imatataq rurankiman Jesús yupay kawsayta puytinaykipaq?

5. Jesús wanushanta yarpunallapapaq tantakaypaqllapa

Chay tuta manaraq wanuyarqa, ¿imatataq Jesusqa apostolninkunawan ruraranllapa? Liyiyllapa Lucas 22:14, 19, 20 ima, chaymantaqa kaykunamanta parlayllapa:

• ¿Imatataq Jesusqa apostolninkunata rurananpaq mandaran?

• Lucas 22:19, 20 nishannu, ¿imataq karan pan? ¿Imataq karan vino? (Rikayllapa versiculokuna 19, 20 ima).

Chay tuta Jesusqa apostolninkunata kaynu nir willaran: “Kaytami ama qunqarchu rurankillapa yarpumanaykillapapaq” nir. Chayrayku, tukuy añokunata Jehová Diospa testigonkunaqa tantakanillapa Jesús wanushanta yarpunayllapapaq, pay mandamaranchikllapa chaynulla. Imanutaq chay shumaq reunionqa nir mas yaĉhanaykipaq, VIDEOTA rikayllapa, chaymantaqa kaykunamanta parlayllapa:

VIDEO: Jesús wanushanta yarpushunllapa (1:41)

• Jesús wanushanta yarpunallapapaq tantakarqa, ¿imatataq ruranchik?

Panqa Jesuspa mana uchayjun cuerpon yupay, vinoqa Jesuspa yawarnin yupay.

KAYKUNATA YAĈHAKUSHANCHIK

Jehová Dioswan Jesusta payji ninapaqqa Jesuspi allita creyiypaq, Jesús wanushanta tukuy añokunata yarpuypaq ima.

¿Imataq ninkiman?

• ¿Imatataq ruraypaqllapa Jesuspi allita creyinchikllapa nir rikachikunapaq?

• ¿Imatataq rurayta puytinchik Jehová Dioswan Jesusta payji ninapaq?

• ¿Imapaqtaq Jesús wanushanta yarpunallapapaq tantakaypaqllapa?

MAS YAĈHAKUNAYKIPAQ

Jesusqa nuqanchikkunapaq wanuran, chayrayku, ¿imatataq ruraypaqllapa? Kaypi rikakuy.

Jesús honró a Jehová con su cuerpo (9:28)

Liyiy imanutaq Jehová Diospi allita creyishaykita rikachikuyta puytinki nir.

“Ejerzamos fe en las promesas de Jehová” (La Atalaya, octubre de 2016)

Uk warmisitata imapaqtaq Jesusqa wanuran nir intrakayqa yanaparan kusala alegre kawsananpaq. Kaypi liyiy.

“La Biblia les cambió la vida” (La Atalaya, 1 de agosto de 2011)

Jesús wanushanta yarpunanllapapaq tantakarqa, ¿imapaqtaq wakinkunala panta mikunllapa, vinota upyanllapa ima? Kaypi liyiy.

“¿Por qué los testigos de Jehová celebran la Cena del Señor de forma diferente a otras religiones?” (Artículo de jw.org)