¿Imataq nin Bibliaqa angelkunamanta?

Jehová Diosqa cielopi kusala achka ayllun kaqta riqsinata munayan. Chay ayllunkunaqa angelkuna, paykunaqa “Diospa wamrankuna” (Job 38:7, NWT). ¿Imatataq Bibliaqa angelkunamanta yaĉhachimanchik? ¿Imatataq paykunaqa nuqanchikkunapaq ruran? ¿Tukuy angelkunaqa Diospa ayllunchu?

1. ¿Pikunataq angelkunaqa?

Manaraq pachata rurayar Jehová Diosqa angelkunata ruraran, pay yupay espíritu katin mana rikayta puytinchikllapachu, paykunaqa cielopi kawsanllapa (Hebreos 1:14). Kan kabal achka angelkuna, pero paykunaqa mana chayllachu (Apocalipsis 5:11). Paykunaqa Jehová Dios “mandakushankunata cumplir nishankunata” rurar ima kawsanllapa (Salmo 103:20). Unay tiempopiqa Jehová Diosqa angelkunata kaĉhamuran pay nishanta rimananllapapaq, yanapakunanllapapaq, pueblonta washananllapapaq ima. Kay tiempopipis angelkunaqa tukuy cristianokunata yanapamayanchikllapa Diosmanta yaĉhakunaqkunata tarinallapapaq.

2. ¿Pikunataq Satanaswan demonionkunaqa?

Wakin angelkunaqa mana Diosta kasunaranllapachu. Naypaqtaqa Diospa contran tikrakaran, Satanás diablo shutichinllapa ‘chaymi […] tukuyla pachapi kawsaqkunataqa engañar purin’ (Apocalipsis 12:9). Satanasqa payta servinanllapata munar, naypaq runakuna Adanwan Evata engañaran. Chaymanta, wakin angelkunatapis engañaran Diospa contran tikrakananllapapaq. Chay angelkunaqa kananqa demoniokuna shutin. Jehová Diosqa paykunataqa kay pachaman itakamuran, chaynullapis shamuq tiempopiqa paykunataqa limpu tukchinqa (liyiy Apocalipsis 12:9, 12).

3. ¿Imanutaq Satanaswan demonionkunaqa engañamanayanchikllapa?

Satanás diabloqa achka runakunata engañayan wasqakuqkunawan, brujokunawan, sorteakuqkunawan, sakawan pichakuqkunawan, saqra imakunata rurar demoniokunawan pukllananllapata ima munayan. Wakin runakuna horoscopokunata uyakunllapa, liyinllapa ima, chaynullapis cartawan chapakuyanllapa, wanushakunawan parlayanllapa ima. Pero Jehová Diosqa kaynu nimayanchik: “Wasqakuqkunaman chaynulla wanushapa espiritunta tapukuqkunamanqa ama riyllapachu” nir (Levítico 19:31). Jehová Diosqa Satanaswan demonionkunamantaqa washamanayanchikllapa, paykunaqa Jehová Diostaqa kabalta ĉhiqninllapa, nuqanchikkunatapis dañota ruramanayanchikllapa ima.

MAS INTRAKASHUNLLAPA

4. Angelkunaqa runakunata yanapan Jehová Diosmanta yaĉhakunanllapapaq

Diospa angelninkunaqa mana paykunallachu runakunataqa parlanllapa. Ashwan, Jehová Diosta serviqkunata yanapan paykuna chay runakunataqa tarir Diosmanta parlananllapapaq. Liyiyllapa Apocalipsis 14:6, 7, chaymantaqa kaykunamanta parlayllapa:

• ¿Imapaqtaq angelkunaqa wakinkunata yaĉhachinapaq yanapamanata ministinchik?

• ¿Imanutaq sintinki angelkunaqa Bibliamanta yaĉhakunaqkunaman qamtaqa apashuyta puytin nir yaĉharqa? ¿Imapaqtaq?

5. Ama riychu brujokunaman, sorteakuqkunaman ima

Satanaswan demonionkunaqa kabalta Jehová Diosta, nuqanchikkunata ima ĉhiqnimanchikllapa. Liyiyllapa Lucas 9:38-42, chaymantaqa kaykunamanta parlayllapa:

• ¿Imanachinllapataq demoniokunaqa runakunata?

Ama demoniokunaqa wasinchikman, vidanchikman ima yaykunanpaq dejaypaqchu. Liyiyllapa Deuteronomio 18:10-12, chaymantaqa kaykunamanta parlayllapa:

• ¿Imanutaq demoniokunaqa engañamanayanchikllapa? ¿Imakunatataq runakunaqa puebloykipi ruranllapa?

• Chay Dios ama ruraychu nimayashanchikkunaqa, ¿allinchu kanqa? ¿Imapaqtaq?

VIDEOTA rikayllapa, chaymantaqa kaykunamanta parlayllapa:

VIDEO: “Opónganse al Diablo” (5:02)

• Palesa itinpa makinpi wallqata watasha karan saqra imakunamanta washananpaq chayqa, ¿allinchu karan? ¿Imapaqtaq?

• ¿Imatataq Palesaqa ruraran demoniokunamanta washakayta puytinanpaq?

Diosta serviqkunaqa tukuy tiempo demoniokunapaq contran kashallapa. Liyiyllapa Hechos 19:19; 1 Corintios 10:21 ima, chaymantaqa kaykunamanta parlayllapa:

• ¿Imapaqtaq tukuy imaykikuna demoniokunamanta shamuqkunataqa rupachinkiman?

6. Satanaswan demoniokunamantaqa washakayta puytinki

Demoniokunataqa Satanás mandan. Pero angelkunata Jehová Diosta kasuqkunata-shuypaqa uk arcángel Miguel shutiq mandan, chaynu Bibliaqa Jesustapis shutichin. ¿Michka poderniyjuntaq arcángel Miguelqa? Liyiyllapa Apocalipsis 12:7-9, chaymantaqa kaykunamanta parlayllapa:

• ¿Pikunataq mas poderniyjun kanqa: Miguel angelninkunawan manaqachu Satanás demonionkunawan?

• ¿Diosta serviqkunaqa Satanaswan demoniokunata manchanmanllapachu?

Satanaswan demonionkunamanta washakayta puytinki. Liyiyllapa Santiago 4:7, chaymantaqa kaykunamanta parlayllapa:

• ¿Imanutaq Satanaswan demonionkunamanta washakayta puytinki?

KAYKUNATA YAĈHAKUSHANCHIK

Angelkuna Diosta kasuqkunaqa yanapamanchikllapa, pero Satanaswan demonionkuna-shuypaqa Jehová Diosta kabalta ĉhiqninllapa, nuqanchikkunatapis engañamanchikllapa brujokunawan, sorteakuqkunawan ima.

¿Imataq ninkiman?

• ¿Imatataq angelkuna Diosta kasuqkunaqa rurayanllapa achka runakuna Diosta riqsinanllapapaq?

• ¿Pikunataq Satanaswan demonionkunaqa?

• ¿Imapaqtaq ama rinkimanchu brujokunaman, sorteakuqkunaman, sakawan pichakuqkunaman ima?

MAS YAĈHAKUNAYKIPAQ

Liyiy imapaqtaq Jesusqa shutin arcángel Miguel nir.

“¿Quién es el arcángel Miguel?” (Artículo de jw.org)

Wakinkunaqa diabloqa mana kanchu ninllapa. Pero, ¿chaynuchu kanqa? Kaypi liyiy.

“¿Existe el Diablo?” (Artículo de jw.org)

Liyiy imanutaq uk warmisitaqa demoniokunamanta washakayta puytiran nir.

“Halló propósito en la vida” (La Atalaya, 1 de julio de 1993)

Liyiy imanutaq Satanasqa runakunata engañayan brujokunawan, sorteakuqkunawan ima nir.

“La verdad acerca de la magia, la hechicería y la brujería” (¿Ha encontrado usted el camino a la vida eterna?, parte 5)