YAĈHAKUNA 31
¿Diosqa gobiernoyjunchu?
Bibliaqa Diospa Gobiernonmanta riman. Jehová Diosqa tukuy imakunata kay pachapi ruranayashantaqa gobiernonwan ruranqa. ¿Diosqa gobiernoyjunchu? ¿Imanutaq yaĉhanchik Diospa Gobiernonqa mandakuyanna nir? ¿Imakunatataq rurasha? ¿Imakunatataq shamuq tiempopiqa ruranqa? Kaykunamanta yaĉhakushun kay yaĉhakunapi, ishkay shamuq yaĉhakunakunapipis mas yaĉhakur siguishun.
1. ¿Diosqa gobiernoyjunchu? ¿Pitaq mandakunqa?
Jehová Diosqa uk gobiernota ĉhurasha kay pachaman mandakamunanpaq. Chay gobiernopiqa Jesús cielomanta-pacha mandakamunqa (Mateo 4:17; Juan 18:36). Jesuspaq Bibliaqa nin: ʻPay mandakunqa tukuy tiempopaqʼ (Lucas 1:32, 33). Jesusmi Diospa Gobiernonpi Mandakuq kanqa, chayrayku kay pachaman mandakamunqa.
2. ¿Pikunawantaq Jesusqa mandakunqa?
Jesusqa mana paylachu mandakunqa. Bibliaqa nin: ʻTukuy ayllukunamanta, ukman rimaykunapi rimaqkunamanta, tukuy pueblokunamanta ima. Chaynulla uklaw nacionmanta kaqkunapis […] mandakunqallapaʼ (Apocalipsis 5:9, 10). ¿Michkataq Jesuswanqa mandakunqallapa? Jesús kay pachapi kawsashanmanta-pacha kabal achka runakuna siguiq qallarishallapa. Pero 144.000 runakunala cieloman rinqallapa Jesuswan pulla mandakunanllapapaq (liyiy Apocalipsis 14:1-4). Tukuy cristianokuna kay pachapi quedaqkunaqa Jesús mandakuyatinnaqa apoyanqallapa (Salmo 37:29).
3. ¿Imapaqtaq Diospa Gobiernonqa mas allin runakunapa gobiernonmantaqa?
Achka mandakuqkuna allin imakunata ruranayan, pero mana poderniyjunchu chaykunata rurananpaqqa. Wakinkunaqa mana achka tiempota mandakunllapachu, ishkay manaqa kimsa añomantaqa ukkuna mandakuq yaykun. Pero Jesusta-shuypaqa mana pipis Diospa Gobiernonmantaqa urqunqachu. Chaymi Bibliaqa nin: “Chay gobiernoqa mana tukukanqachu” nir (Daniel 2:44, NTW). Jesús kay pachaman mandakamurqa tukuyta yanapamashun. Jesusqa kusala llakipakuq, kusalata munamanchik, kusala allin ima, chayrayku tukuy runakunata yaĉhachinqa paykunapis llakipakuq kananpaq, wakinkunata munananpaq, cuidananpaq ima (liyiy Isaías 11:9).
MAS INTRAKASHUNLLAPA
Yaĉhakushunllapa imapaqtaq Diospa Gobiernonqa mas allin runakunapa gobiernonkunamantaqa nir.
4. Jesusmi pachaman mandakamunqa
Jesucristoqa kusala poderniyjun, chayrayku pay mas allin mandakuq kanqa runakunamantaqa. Liyiyllapa Mateo 28:18, chaymantaqa kaykunamanta parlayllapa:
¿Imapaqtaq Jesuspa gobiernonqa mas allin kanqa runakunapa gobiernonmantaqa?
Runakunaqa mandakuyta puytinllapa uk nacionlapi, chaynullapis uk tiempolata mandakunllapa. Pero, ¿chaynuchu pasanqa Diospa Gobiernonwanqa? Liyiyllapa Daniel 7:14, chaymantaqa kaykunamanta parlayllapa:
Diospa Gobiernontaqa nipipis tukchinqachu, ¿imapaqtaq chayqa kusala allin nuqanchikpaq?
Diospa Gobiernonqa tukuy pachapi mandakunqa, ¿imapaqtaq chayqa kusala allin nuqanchikpaq?
5. Runakunapa gobiernonta tukchinqa
¿Imapaqtaq Diospa Gobiernonqa runakunapa gobiernonkunata tukchinqa? VIDEOTA rikayllapa, chaymantaqa kaykunamanta parlayllapa:
Runakunapa gobiernonkunaqa, ¿ima saqra imakunatataq rurasha?
Liyiyllapa Eclesiastés 8:9, chaymantaqa kaykunamanta parlayllapa:
¿Diospa Gobiernonqa runakunapa gobiernonta tukchinqachu? ¿Imapaqtaq?
6. Cieloman rinanpaq akrakashakunaqa Jesuswan pulla kusala allin mandakuqkuna kanqallapa
Jesusqa uk runa yupay kay pachapi kawsaran. Chayrayku, allita riqsimanchik “imanula kashamapis llakipamayninchikta puytin” ima (Hebreos 4:15). Jehová Diosqa akraran 144.000 ullqukunawan warmikunata Jesuswan pulla mandakunanllapapaq. Paykunaqa ʻtukuy ayllukunamanta, ukman rimaykunapi rimaqkunamanta, tukuy pueblokunamanta […] uklaw nacionmantaʼ ima (Apocalipsis 5:9).
Cieloman rinanpaq akrakashakunaqa Jesuswan kay pachapi kawsaranllapa nir yaĉharqa, ¿imanutaq sintinki? ¿Imapaqtaq?
Jehová Diosqa akrasha runakunawan warmikunata riqchaq tiempokunamanta, riqchaq pueblokunamanta ima Jesuswan pulla mandakunanllapapaq.
7. Jehová Diospa leyninqa shumaq kawsanapaq yanapamanchik
Gobiernokunaqa runakunata leykunata qusha allinta kawsananllapapaq. Chaynulla, Diosninchikpis leyninta qumashanchik payta kasurqa shumaqta kawsanapaq. Liyiyllapa 1 Corintios 6:9-11, chaymantaqa kaykunamanta parlayllapa:
¿Imanutaq kawsashunllapa tukuy runakuna Diosta kasur kawsatinllapaqa?a
¿Tukuy runakuna Diospa leyninta kasuypaqllapachu? ¿Imapaqtaq chaynu yarpunki?
¿Imanutaq yaĉhanchikllapa mana Diosta kasuqkunapis Diostaqa kasuyta puytinllapa nir? (Rikayllapa versículo 11).
Gobiernokunaqa runakunata leykunata qusha allinta kawsananllapapaq. Chaynulla, Diosninchikpis allin leyninta qumashanchik payta kasurqa shumaqta kawsanapaq.
WAKINKUNAQA KAYNU YARPUNLLAPA: “Tukuyla cieloman rishunllapa Jesuswan pulla kanapaq”.
¿Ima textowantaq allita intrachinkiman 144.000 runakunala cieloman rinqallapa Jesuswan mandakunanllapapaq nir?
KAYKUNATA YAĈHAKUSHANCHIK
Diospa Gobiernonqa cielopi, entero pachapi ima mandakunqa.
¿Imataq ninkiman?
¿Pikunatataq Jehová Diosqa akrasha cielomanta-pacha mandakamunanllapapaq?
¿Imapaqtaq Diospa Gobiernonqa mas allin runakunapa gobiernonmantaqa?
Jesús mandakutin tukuy tiempo kawsanapaq, ¿imatataq ruraypaqllapa?
MAS YAĈHAKUNAYKIPAQ
Liyiy Jesús rimashanmanta maypitaq Diospa Gobiernonqa kanqa nir.
“¿Es el Reino de Dios algo que se lleva en el corazón?” (Artículo de jw.org)
¿Imapaqtaq Jehová Diospa testigonkunaqa Diospa Gobiernonta kasunllapa runakunapa gobiernonta kasunanllapamantaqa? Rikay videota.
Liyiy imataq Bibliaqa nin 144.000 runakuna cieloman rinanpaq akrakashakunamanta.
Uk warmi carcelpi kaqta, ¿imataq yanaparan Jehová Diosla yanapamayninchikta puytin nir cuentata qukananpaq? Liyiy.
“Aprendí cómo se solucionarán las injusticias” (¡Despertad!, noviembre de 2011)
a Parte 3-pi mas intrakashunllapa Diospa leyninmanta.