Bautizakarqa, kusala achka bendicionkunata aypanki

Jesús yaĉhachikushannu kawsanapaqqa bautizakaypaq (liyiy Mateo 28:19, 20). Pero, ¿imataq bautizakayqa? ¿Imatataq rurankiman bautizakayta puytinaykipaq?

1. ¿Imataq bautizakayqa?

Griego rimaypiqa bautizakay rimaytaqa kaynu intrakanchik: “chinqachiy” nir. Chayrayku, bautizakaqkunataqa limpula yakuman chinqachinllapa. Jesús bautizakatinqa Juanqa río Jordanpa rurinman Jesustaqa chinqachiran, chayrayku chaymantaqa ʻyakumanta lluqshimuranʼ (Marcos 1:9, 10). Chaymi Diosta servinaqkunatapis bautizarqa limpula yakuman chinqachir bautizanllapa.

2. ¿Imapaqtaq bautizakankiman?

Uk runa “Diosta tukuy tiempo servishushaq” nishana karqa, bautizakayta puytin. ¿Imanutaq Jehová Diostaqa tukuy tiempo servishushaq niyta puytinki? Chaynu ruranaykipaqqa, Diosta mañay shunquykimanta-pacha tukuy tiempo servishushaq nir. Chayta ruranchik manaraq bautizakayar. Chay oracionta rurarqa, Diosninchiktaqa willanchik qamlata adorashushaq, qam munashaykilata tukuy tiempo rurashaq ima nir. Chaynullapis, Jesús yupay kawsanki Jesús yaĉhachikushankunata rurashaq ima nir arnikunkina, chaymi Jesusqa niran: ‘mayqanpis nuqapa yaĉhakuqniy kanarqami amana vidanllapapaqqa llakinqallapanachu [...] ama manchakurchu nuqalapi yarpur shachinakunqallapa’ nir (Mateo 16:24). Diosta tukuy tiempo servishushaq nir mañar bautizakarnaqa, paypa mas amigon tikrakanki, chaynullapis wakinkunawan adorayta puytinkina ima.

3. ¿Imatataq rurankiman bautizakayta puytinaykipaq?

Qam bautizakanarqa, naypaqtaqa allita Jehová Diosmanta yaĉhakuy, allita paypi creyiy ima (liyiy Hebreos 11:6). Jehová Diosta allita riqsirqa mas paypi creyishunllapa, mas munashunllapa ima. Chaykunata rurarqa, paymanta wakinkunata yaĉhachiyta munanki, chaynullapis pay mandakushankunata kasunki ima (2 Timoteo 4:2; 1 Juan 5:3). Jehová Dios munashannu kawsayarnaqa, qamqa Diosta tukuy tiempo servishushaq nir mañar bautizakayta puytinkina (Colosenses 1:9, 10).a

MAS INTRAKASHUNLLAPA

4. Jesús bautizakashanmanta yaĉhakushun

Jesús bautizakashanmanta mas yaĉhakunaykillapapaqqa, liyiyllapa Mateo 3:13-17. Chaymantaqa kaykunamanta parlayllapa:

• ¿Jesustaqa itisitutachu bautizaranllapa?

• Jesusta bautizarqa, ¿yakuta umanman itaranllapalachu? Chayqa, ¿imanutaq bautizakaran?

Jesús bautizakarqa, Dios mandashanta ruraq qallariran. Liyiyllapa Lucas 3:21-23; Juan 6:38 ima, chaymantaqa kaykunamanta parlayllapa:

• Bautizakarnaqa, ¿imatataq Jesusqa ruraq qallariran?

5. Bautizakaytaqami puytinki

Diosta qamlata servishushaq, bautizakashaq ima nir yarpurqa naypaqtaqa manchakunkiman. Pero, Jehová Diosmanta mas yaĉhakur mas riqsirqa qamqa chaytaqa rurayta munanki. Achka runakuna bautizakaytaqa puytishallapa, VIDEOTA rikayllapa.

VIDEO: Fortalece tu amistad con Jehová (1:11)

Liyiyllapa Juan 17:3; Santiago 1:5 ima, chaymantaqa kaykunamanta parlayllapa:

• Bautizakanaqqa, ¿imatataq ruranman bautizakayta puytinanpaq?

1. Diosta oracionta rurar willanchik qamlata tukuy tiempopaq servishushaq nir.

2. Wakinkunapa naypanpi bautizakarqa, Diostaqa tukuy tiempo servishushaq nir intrachinchik.

6. Bautizakarqa, Diospa pueblonpa ayllun tikrakanchik

Bautizakarqa, entero pachapi kaq hermanonchikkunawanqa uk ayllula yupayna kanchikllapa. Maymanta karpis chayllata creyinchikllapa, Dios mandakushankunata kasur kawsanchikllapa ima. Liyiyllapa Salmo 25:14; 1 Pedro 2:17 ima, chaymantaqa kaykunamanta parlayllapa:

• Kay textokuna niyashannu, ¿imanutaq bautizakayqa yanapamayninchikta puytin?

KAYKUNATA YAĈHAKUSHANCHIK

Jesusqa niran cristianokuna kanapaqqa bautizakaypaq nir. Bautizakayta puytinapaqqa, allita Jehová Diospi creyiypaq, kasuypaq, qamlata tukuy tiempo servishushaq ima nir willaypaq.

¿Imataq ninkiman?

• ¿Imataq bautizakayqa? ¿Imapaqtaq kusala allin bautizakayqa?

• Jehová Diosta qamlata servishushaq nir willayqa bautizakaywanqa, ¿chayllachu kanqa?

• ¿Imakunatataq naypaqtaqa rurankiman bautizakayta puytinaykipaqqa?

MAS YAĈHAKUNAYKIPAQ

Liyiy imatataq wakinkunaqa bautizakaymanta yarpunllapa, liyiypis imanutaq nuqanchikkuna intrakashunmanllapa nir.

“¿Qué es el bautismo?” (Artículo de jw.org)

Liyiy imatataq rurankiman bautizakayta puytinaykipaq nir.

“El amor y la gratitud a Jehová conducen al bautismo” (La Atalaya, marzo de 2020)

Liyiy imanutaq uk runa shunqunmanta-pacha paylla bautizakanar bautizakaran nir.

“Querían que descubriera la verdad por mí mismo” (La Atalaya, 1 de febrero de 2013)

Liyiy imapaqtaq bautizakayqa kusala allin, imatataq bautizakanaykipaqqa rurankiman ima nir.

“¿Debería bautizarme ya?” (Lo que los jóvenes preguntan. Respuestas prácticas [volumen 2], capítulo 37)