Proverbios
7 Inocentegunallada rricujushmi, shuj yuyai illaj joven jarida rricurcani. 8 Paiga shuj huarmi causashca calle esquinabi pasarca y paibu huasimun rrina ñanbi purirca 9 ña funcha tucurish amsayajpimi y narij tutayash tucurijpimi, 10 chai huarmiga prostituta laya vistirishmi chai jovenda inquietangabu llujshijta rricurcani. 11 Paiga pelearinga, na pingaj. Huasibi na pasaj huarmimi gan. 12 Cununga callebi, jipaga plazagunabi; y cada esquinagunabimi inquietangabu shayarin. 13 Chai jovenda japish muchashmi, na pingash, cashna nin: 14 “Taita Diosbu ñaupujpi alli rricurina ofrendadami cunun ña cushcani. 15 Chaimundami canda mascangabu llujshircani, ¡y ñami tarishcani! 16 Ñuca camadaga llushcasha cobijaunmi arreglashcani, Egiptomunda lino tela juila colorgunaunmi rrurrashca gan. 17 Mirramunda, aloemunda y canelamundami mishqui perfumegunada ñuca camabi churashcani. 18 Shamui, funchayanagama juyarinajushun; ishquindi puñunajush amijta contentarishun. 19 Ñuca cusaga na huasibillu gan; paiga caru ladomunmi rrirca. 20 Paiga ashca cullquida aparishmi ña rrishca, y luna llena gajpimi vueltamunga”. 21 Paiga inquietashmi pantachirca. Mishqui shimiunmi engañajun. 22 Chai jovenga de repentemi huarmida catish rrin, shuj toroda huañuchingabu apajushca laya, shuj tonto shinami cepo nishca trampabi castigashca gangabu rrin, 23 paiga huañunadaga na yachashcamundami shuj flecha higadoda pasanagama, shuj pájaro trampabi urmashca laya, necio tucush rrin. 24 Shinaga, ñuca huahuagunalla, uyaichi; ñuca nishcagunada alli uyaichi. 25 Chai huarmi canbu shunguda pantachillunga ama saquillu. Pai rrishca ñanda catish ama pantarillu. 26 Chai huarmiga ashcagunadami llaquibi urmachishca; paiga ashcagunadami huañuchishca. 27 Paibu huasiga cementeriomun apaj ñanmi gan; huañushcagunabu fajna ucumunmi chayachin.