Génesis

36 Shinaga Jacobga Labanhuan colerashmi tapurca: “¿imadadi na allida rrurrashcani? ¿Can catirash llaquichillunga imada na alli rrurrarcani? 37 Cununga illita ñuca cosasgunadami mascashcangui, ¿canbu ima pertenecishcada tarishcanguillu? Ñuca huauquigunabu canbu huauquigunabu ñaupujpi llujchilla, paiguna pi razonda charishcada rricullun. 38 Veinte huatagunadami canbu ladobi gashcani ni shuj llama ni shuj chita na shullurcallu, ni shuj carnerodash na micushcanillu. 39 Sacha animalguna tsugrichishca animaldabish nunca na aparcanillu. Ñucami chingajpibish cargo tucurcani. Tuta gajpi o funcha gajpi, shuj animalta shuhuajpish canga pagachircanguimi. 40 Funchaga rrupiun, tutaga tsiriunmi pasarcani. Na puñui pudircanillu. 41 20 huatagunadaga canbu huasibi: 14 huatagunadaga canbu ishqui ushushimunda, 6 huatagunadaga canbu animalgunamunda trabajashcani y 10 vecesmi sueldodash cambiarcangui. 42 Ñuca taitabu Dios, Abrahanbu, Isaacbu Dios ñucaun na gashca gajpiga, maqui chushajmi cachaimun garcangui. Pero Diosmi ñuca sufrimiento y shinchi trabajodaga rricurca. Chaimundami tutabiga canda rrimarca”. 43 Shina nijpimi Labanga Jacobta contestarca: “Cai huarmigunaga ñuca ushushigunami, cai huahuagunaga ñuca churigunami y cai animalgunaga ñucabumi. Caigunaga ñucabu y ñuca ushushigunabumi. ¿Imashinadi paigunadaga llaquichishari? 44 Jacu, shuj pactoda rrurrashun, y caiga shuj testigo shina ñucunchi ishquindiun gallun”. 45 Chaimi, Jacobga shuj rrumida japish pilarta shina shayachirca. 46 Jipaga Jacobga paibu huauquigunamunga nirca: “Rrumigunada tandachichi”. Y paigunaga rrumigunadami tandachish montonarca. Shinami chai rrumi montón jahuabi micunajurca. 47 Labanga Jegar-Sahadutadami shutichirca, cutin Jacobga Galeedtami shutichirca. 48 Y Labanga nirca: “Cai rrumi montonmi cununga ñucunchibu testigo saquiringa”. Chaimundami Galeedta shutichirca 49 shinalladi Atalaya, y Labanga nirca: “Canbish ñucabish na rricujujpiga Jehová rricurash cuidallun. 50 Ñuca ushushigunada maltratash cutishuj huarmigunaun cazarajpiga, aunque ñucunchipurabi shuj jari na tiyajpish Taita Dios ñucunchibu testigo gashcada yuyaringui”. 51 Labanga cashnami Jacobtaga nirca: “Rrumi montonbish, pilarbish caibimi ñucunchibu testigo shina gajun. 52 Cai rrumi montonbish, pilarbish testigogunami gan, ñucabish cai rrumi montonmunda canda ima dañoda rrurrangabuga na pasashallu, ni canbish cai rrumi montonmunda, pilarmundash ñucada ima dañoda rrurrangabuga na pasanguillu. 53 Ñucunchidaga Abrahanbu, Nacorbu, paigunabu taitabu Dios juzgallun”. Shinami Jacobga paibu taita Isaacbu Diosbu shutibi jurarca. 54 Jipami, Jacobga urcubi shuj sacrificioda rrurrash micungabu paibu huauquigunada invitarca. Chai tutaga urcubi micushmi pasanajurca. 55 Y Labanga madrugado jatarishmi paibu nietogunada, ushushigunada muchash bendiciarca. Chai jipami paibu huasimun vueltarca.