Éxodo
3 Moisesga paibu suegro Jetrobu llamagunada michijmi tucurca, Jetroga Madián llactabu sacerdotemi garca, shuj funchami sitashca pambabi oeste ladomun llamagunada apash Dios verdaderobu Horeb urcumun chayarca. 2 Chaibimi Jehová Diosbu angelga zarza yurabi nina shina rricurirca, Moisés chai zarza yurada alli rricushmi, chai yura ninaun gashash na rrupajujta rricurca. 3 Chaimi Moisesga nirca: “Chai zarza yura imamunda na rrupajushcada rricungabumi ashtaun cuchuyasha”. 4 Jehová Diosga pai ashtaun rricungabu cuchuyajujtami rricurca, chaimi Diosga zarza yuramunda cayash cashna nirca “¡Moisés! ¡Moisés!” nijpimi paiga contestarca: “Caibimi gani”. 5 Diosga nirca: “Ama ashtaun cuchuyamuillu, sandaliagunada llujchi can sarujushca allpaga santo, limpiomi gan”. 6 Jipaga nirca: “Ñucaga canbu taitabu Dios, Abrahanbu Dios, Isaacbu Dios, y Jacobbu Diosmi gani”. Chaimi Moisesga Dios verdaderoda rricunada manchashcamunda paibu ñahuida taparca. 7 Jehová Diosga ashtaun nirca: “De verasmi ñuca pueblo Egipto llactabi demas llaquida apajujta rricushcani. Shinalladi esclavogunada shina llaquichishcamunda paigunabu quejagunada uyashcani. Paigunabu sufrimientogunadaga allimi rrijsini. 8 Shinaga Egipto llactamunda cacharichish, alli jatun allpamun huichiyachingabu uriyamusha chai allpabiga ashca leche y mishquimi tiyan, chai allpagunaga cananeogunabu, hititagunabu, amorreogunabu, perizitagunabu, heveogunabu, y jebuseogunabumi gan. 9 Rricui Israelitagunabu quejagunadaga ñucaga allimi uyashcani, shinalladi egipcioguna demas maltratash llaquichishcadashmi rricushcani. 10 Cununga shamui faraonbu ñaupujmunmi cachasha, canmi Egipto llactamunda ñuca pueblo Israelitagunadaga llujchingui.