Mateo
2 Judea llactabi saquirij Belén pueblobi Jesús huacharishca jipami, Herodes causashca funchabi inti llujshimuj ladomundami estrellada rricush adivinaj jariguna, Jerusalén llactamun shamunajurca, 2 y paiguna tapunajurca: “Judiogunabu rey tucuna huacharishca huahuaga, ¿maibidi gan? Inti llujshij ladomundami paibu estrellada rricurcanchi, y chaimundami paida adorangabu shamushcanchi”. 3 Caida uyashmi, rey Herodes y Jerusalenbi causaj tucui gentegunashmi preocuparinajurca. 4 Chaimi rey Herodes tucui importante sacerdotegunada y leyda yachachijgunada tandachish, Cristo maibi huacharina gashcada tapurca. 5 Paigunaga cashna nish contestarca: “Judea llactabi saquirij Belén pueblobi profeta escribishcaga cashnami nin: 6 ‘Judá llactamunda Belén pueblo, mandajgunaga candaga ña na yanga puebloda shina rricungallu, Judá llactamundami Israel puebloda michingabu shuj mandaj llujshinga’”. 7 Estrella ima hora y maibi rricurishcada yachangabumi, Herodesga estrellada rricush adivinaj jarigunada, pacalla cayash tapurca. 8 Belén pueblomunmi cashna mandash cacharca: “Tucui ladogunabi huahuada mascagrichi, ña tarishaga ñucamun huillangabu vueltamunguichi, chashnami ñucash paida adorangabu rri pudisha”. 9 Rey Herodesda uyashca jipami, estrellada rricush adivinaj jarigunaga rrircalla. Inti llujshimuj ladomunda rricushca estrellaga, paigunada ñaupash rrijujtami cuenta cunajurca. Chai estrellaga Jesús mai gajushca pushtubimi saquirirca. 10 Chai estrellada rricushaga, ashcadami contentarinajurca. 11 Huasimun yaicunajush huahuadaga mamandi gajujtami rricunajurca, cungurishmi huahuada adoranajurca. Shinalladi paiguna apashca cajada pascashmi, oro, olíbano y mirra nishcada convidanajurca 12 Pero Taita Diosmi shuj sueñobi, Herodesda ama cutindi rricugrillun paigunada advirtirca. Chaimundami paigunabu paismun cutishuj ñanda japish rrinajurca. 13 Estrellada rricush adivinaj jariguna rrishca jipami, Jehová Diosbu ángel Josebu sueñobi rricurish, cashna nirca: “Jatari, huahuada mamandi apash Egipto llactamun mitijui, y chaibimi ñuca ninagama saquirina gangui, Herodesmi huahuada huañuchingabu mascanga”. 14 Chaimi José tuta jatarish huahuada mamandi apash Egipto llactamun rrirca, 15 Y Herodes huañunagamami, chaibi saquirinajurca. Chashnami Jehová Dios profetamun nishca shimiguna fajtarirca: “Egiptomunda llujshillunmi ñuca huahuada cayarcani”. 16 Herodes estrellagunada rricush adivinaj jariguna engañashcada yachaj chayashaga ashcadami colerarca. Estrella ima hora y maibi rricurishcada yachashcamundami, Belenbi y chai ladobi saquirij pueblogunabimi, narij ishqui huatagunada charij tucui huahuagunada huañuchillun mandarca. 17 Chashnami profeta Jeremías nishca shimiguna fajtarirca: 18 “Ramá ciudadbiga ashcada caparish huacajushcami uyarirca. Raquelmi paibu huahuagunamunda huacajurca, paibu huahuaguna huañushca gashcamundami, pish paida ayudallunga na munarca”. 19 Herodes ña huañujpi, y José Egiptobi gajpimi Jehová Diosbu ángel sueñobi rricurish 20 cashna nirca: “Jatari, huahuada mamandi apash, Israel llactamun rri, porque huahuada huañuchisha nijgunaga ñami huañunajushca”. 21 Chashnami Josega jatarish huahuada mamandi apash Israel llactamun vueltarca. 22 Pero Arquelao paibu yaya Herodesmunda rrandi mandajushcada uyashaga, Judeamun rrinadami mancharca. Shinalladi shuj sueñobi, Taita Dios chaimun ama rrillun advertishcamundami Galilea ladomun rrinajurca. 23 Y Nazaret ciudadbimi causangabu saquirirca. Cashnami Taita Dios profetagunamun nishca shimiguna fajtarirca: “Nazareno nishcami ganga”.