Hechos

27 Shinaga Sanedrinmun apashmi paibu ñaupujpi shayachinajurca. Chaibimi sumo sacerdotega tapui callarirca. 28 Cashna nirca: “Cai jaribu shutida ama yachachish catillun nishmi mandarcanchi. Pero cai yuyaigunadaga tucui Jerusalenbi yachachishcanguichi. Chai jari huañushcamundash culpangabumi decididos ganguichi”. 29 Pedro y cutishuj apostolgunaga cashnami contestanajurca: “Gentegunada cazunabu rrandiga mandaj Taita Diosdami cazuna ganchi. 30 Ñucunchi ñaupa taitamamagunabu Diosmi, canguna jatun rracu caspibi huañuchishca Jesusdami causachirca. 31 Diosmi, Lider Principal y Salvador shina gallun paibu alli ladobi paidaga churarca, shinalladi Israelitaguna paigunabu juchagunamunda arrepintirijpi perdonallunmi cacharca. 32 Ñucunchibish espíritu santobish caimunda testigosmi ganchi, Diosmi gobernante shina cazujgunamun cushca”. 33 Paiguna caida uyashaga demas colerashmi “huañuchishun” ninajurca. 34 Pero Diosbu leymunda alli yachaj, tucui pueblo respetashca Fariseo Gamaliel jariga Sanedrinbi jatarishmi chai jarigunada shuj rratoda llujchillun ordenarca. 35 Jipaga tucuigunamun cashna nirca: “Israelmunda jariguna, cai jarigunada imada narij rrurrashtimi alli yuyana ganguichi. 36 Por ejemplo, shuj tiempobiga Teudasmi importante gani nish rricurirca, chaimi 400 jarigunaga paiun tandanajurca. Pero paida huañuchijpimi tucui paibu catijguna chaimunda mitijujpi tucui chaibi chingarirca. 37 Chai jipaga censo funchagunabimi Galilea llactamunda Judas rricurica, paibish huaquin catijgundami charirca, cai jaribish huañurcami y paibu catijgunashmi chingarinajurca. 38 Shina pasajujta rricushmi cashna nini, chai jarigunada ama molestash tranquilos saquichi porque cai obra gentegunamunda gajpiga chingaringallami. 39 Pero, Diosmunda shamujpiga, chingarillunga cangunaga nimada na rrurrai pudinguichillu. Cuidado Taita Diosbu contra tucujunguichimun” nircami. 40 Shina nijpimi paida cazunajurca. Chai apostolgunada cayash Jesusbu shutibi ama parrlallun ordenash tacash cacharinajurca. 41 Apostolguna Jesusbu shutimunda sufrijushcada, y Taita Dios alli rricujujta yachashmi Sanedrinmunda contentos llujshinajurca. 42 Y tucui funchagunami na samarish, Cristo Jesusmunda alli noticiagunadaga templobi y huasin huasin rrish yachachinajurca.