Génesis

39 Ismaelitagunami Josedaga Egiptomun aparca. Chaibimi faraonda sirvish, ayudaj y soldadogunada mandaj Potifar jarimun jatunajurca. 2 Pero Jehovami Josedaga cuidash ayudajpi paidaga alli rrirca. Egiptomunda paibu amomi, paibu huasida cuidallun mingarca. 3 Paibu amomi Jehová Joseda cuidajushcada y Jehovalladi tucuibi alli rrillun ayudajushcada cuenta curca. 4 Josemi Potifarbu confianzada ganarca, shinami paibu ayudante tucurca. Potifarga paibu huasida y tucui pai charishcadami cuidallun saquirca. 5 Chai funchamundami Jehová Diosga chai egipciobu huasida y tucui pai charishcagunada Josemunda bendiciai callarirca. Jehovami huasibi tucui charishcagunada y tarpushcagunada bendiciarca. 6 Potifarga tucui pai charishcadami Josebu maquibi saquirca, nimamunda na preocuparinallu garca, paiga solo micunalladami yuyarina garca. Shinalladi, Josega alto, guapo solteromi tucurca. 7 Chaimi Potifarbu huarmi Joseda munashcamunda cashna nirca: “Ñucaun puñushun”. 8 Pero paiga na munarcallu, chaimundami amobu huarmidaga cashna nirca: “Rricui, ñuca amoga huasida y tucui pai charishcadami ñucamun confiashca. 9 Chaimundami paiga na preocuparin. Cai huasibiga ñucami tucuigunamunda autoridadta charini. Paimi tucuida ñuca maquibi entregashca, pero candaga na. Porque paibu huarmimi gangui. Chaimunda ¿imamundadi ñucaga cai jatun llaquida rrurrash Taita Diosdaga llaquichishari?”. 10 Pero huarmiga paiun puñullunga cada funchami molestaj garca, pero Josega paimun mayayanada ni puñunada na munarcallu. 11 Pero, shuj funchami Josega huasi ucubi trabajangabu yaicurca y chaibiga nipi na garcallu. 12 Chaimundami chai huarmiga ropamunda japish nirca: “¡Ñucaun puñushun!”. Pero Josega paibu ropada chai huarmibu maquibi saquishmi mitijush corrirca.