Lucas
19 Jesusga Jericó llactamun yaicushmi chaida pasarca. 2 Chai llactabiga Zaqueo shuti shuj jarimi causarca. Paiga impuestogunada cobrajgunabu jefemi garca. Y paiga millonariomi garca. 3 Chai jariga Jesús pi gashcada rricunadami munarca. Pero, ashca gentegunami tiyarca y pai uchilla gashcamundami Jesusda na rricui pudirca. 4 Chaimunda Jesusda rricungabu ñaupash rrish jatun higo yuramun huichiyarca. Porque ñallami chaida pasana garca. 5 Jesús chaimun chayashaga, huichi rricushmi cashna nirca: “Zaqueo, ligero uriyamui, cununga canbu huasibimi saquirina gani”. 6 Jesús shina nijpimi Zaqueoga ligero uriyamush paibu huasibi contento puzachirca. 7 Chaida rrurrajta rricushaga, tucuigunami murmurai callarirca: “Juchayuj rrunabu huasibimari saquirin nish rrimanajurca”.