Lucas
2 Chai funchagunabiga, César Augustomi censobi tucui genteguna anotarillun mandarca. 2 (Cai punta censodaga Quirinio Siria llactada mandajujpimi rrurranajurca). 3 Y tucuigunami mai huacharishca ciudadbi anotaringabu rrinajurca. 4 Josega, Davidbu familiamunda gashcamundami, Galilea llactabi saquirij Nazaret pueblomunda Judea llactabi saquirij, David causashca Belén pueblomun rrinajurca. 5 José y María ña cazarashca gashcamundami, censobi anotaringabu rrinajurca. Mariaga ñami huijsaunga cerca garca. 6 Chaibi gajujpimi, Mariadaga huachana nanai japirca. 7 Y Mariaga paibu punta jari huahuadami charirca. Paiguna maibish puzanada na charishcamundami huahuadaga telagunaun pilluchish animalgunamun micunada carana pushtubi sirichirca. 8 Chai mayayabimi llamagunada michij jariguna paigunabu llamagunada tucui tuta cuidash pasanacujurca. 9 Y, de repentemi, Jehová Diosbu ángel rricurirca, y Jehová Diosbu luzmi paigunabu muyundijta brillarca, chaimundami ashcada mancharinajurca. 10 Pero chai angelga cashna nirca: “Ama manchaichillu, ñuca huillashca alli noticiagunada tucui genteguna uyashmi ashcada contentarinajunga. 11 Cununmi Davidbu llactabi shuj huahua huacharishca, paimi cangunadaga salvanga. Paiga Cristo ñucunchi amitomi gan. 12 animalgunamun micunada carana pushtubi telagunaun pilluchishca shuj huahua sirijujta rricushmi cuenta cunguichi”. 13 De repente chai angelhunmi ashca angelguna rricurish cashna Taita Diosda alabanajurca: 14 “Jahua cielobi Taita Diosga alabashca gallun, shinalladi cai allpabi paida alli sirvijguna alli causaida charillun”. 15 Angelguna jahua cielomun rrish chingarijpimi, llamada michij jarigunaga, paigunapura cashna nirca: “Jehová Dios huillashcada rricungabumi, imashina gashash Belén pueblomun rrina ganchi”. 16 Ucta rrinajushmi María y José huahuada animalgunamun micunada carana pushtubi sirichish charijujta tarinajurca. 17 Chaida rricushmi, angel huahuamunda parrlashcada huillanajurca. 18 Llamada michij jariguna parrlashcada uyashmi tucuiguna mancharishca saquirinajurca. 19 Mariaga, chaida uyashmi valishca gashcada yuyaringabu paibu shungubi huaquichirca. 20 Ángel huillashca, verdad gashcada rricunajushmi. Llamada michij jarigunaga Taita Diosda jatunyachish y agradicish vueltanajurca. 21 Ocho funchaguna jipami, huahuada circuncisionda rrurrash, Jesús shutida churanajurca, María narij huijsaun tucujpimi, chai shutida churallun angelga ña mandashca garca. 22 Moisesmun cushca leybi nishca shina, ishquindi limpio tucuna tiempo chayajpimi, Jerusalenmun rrinajurca, shinalladi huahuadaga Jehová Diosbu ñaupujpi rrijsichingabumi apanajurca. 23 Jehová Diosbu leybi escribishca shinalladimi rrurranajurca: “Tucui punta jari huahuami, Jehová Diosmun agllashca gana gan”. 24 Jehová Diosbu ley escribishca shinalladimi, ofrendata cunajurca. Leybiga nijurcami: “Ishqui urpigunada o ishqui huahua palomagunada cungui”. 25 Jerusalenbimi allida rrurraj y Taita Diosda alli sirvij jari causarca, paibu shutiga Simeonmi garca, paiga Taita Dios Israel llactada ayudanadami shuyajurca, y Taita Diosbu espíritu santodami charirca. 26 Shinalladi, Taita Diosbu espíritu santomi paimunga cashna nishca garca; narij huañushmi, Jehová Dios cachashca Cristoda rricungui. 27 Espíritu santo ayudajpimi, Taita Diosbu huasimun yaicurca. Shinalladi, leybi mandashca costumbreda fajtachingabu, José y María Jesushuan Taita Diosbu huasibi yaicujpimi, 28 Simeón huahuada marcash, Taita Diosda jatunyachirca: 29 “Jatun mandaj, Taita Dios can nishcadami fajtachishcangui, cununga tranquilomi huañui pudini, 30 ñuca ñahuiunmi gentegunada pi salvana gashcada ña rricushcani, 31 canga tucui genteguna paida rricullunmi cachashcangui. 32 Tucui llactagunadami shuj funchayachij luz shina ayudanga, Israelbuga shuj bendicionmi ganga”. 33 Huahuamunda cashna nijushcada yayamamaguna uyashaga, mancharishcami saquirinajurca. 34 Shinalladi, Simeonga, Taita Diosda paigunamunda mañashca jipami, Mariadaga cashna nirca: “Uyangui, cai huahuami Israel llactabi ashcaguna urmallun y jatarillun ayudanga y Taita Dios paiun gajushcada rricushash paidaga na rricunachishmi rrimanga 35 (y candaga shuj jatun espadami tsugrichinga) ashcagunami paigunabu shungu ucubi ima charishcada rricuchinajunga”. 36 Chaibiga, shuj yuyaj profetisa Ana shuti huarmimi gajurca. Paiga Fanuelbu ushushi y Aserbu familiamundami garca. Cazarashca jahuaga siete huatagunalladami paibu cusaun causashca garca. 37 Anaga ñami 84 huatagunada charirca y viudami garca. Siempremi tuta funcha Taita Diosbu huasibi ayunash y mañash pasaj garca. 38 Chai rratomi José y Mariamun mayayash, Taita Diosda agradicish, Jerusalenda salvallun shuyajujgunamun, chai huahuamunda parrlai callarirca. 39 Shinaga, Jehová Diosbu leyda fajtachishca jipami, paigunaga Galileabi paiguna causashca Nazaret llactamun vueltanajurca. 40 Chai huahuaga shinchi yachaisapa tucushmi huiñash catirca y siempremi Diosbu ñaupujpi alli rricurirca. 41 Cada huatami paibu yayamamagunaga Jerusalenbi tiyaj Pascua fiestamun rrina costumbreda charinajurca. 42 Pai 12 huatagunada charijpimi, fiesta costumbre gashcamunda Jerusalenmun huichiyanajurca. 43 Fiesta funchaguna tucurishca jipami, huasimun vueltash rri callarinajurca. Pero Jesusga Jerusalenbimi saquirirca. Chaidaga paibu taitamamaga na cuenta cushcallu garca. 44 Rrijsishca gentegunaun Jesús shamujujta yuyashmi, tucui funcha chaquiun tajtish huasimun vueltanacujurca. Chaibi na gajushcada cuenta cujushmi, familia y rrijsishcapurabi mascai callarinajurca. 45 Pero na tarishcamundami, Jerusalenmun vueltash tucui ladogunabi mascanajurca. 46 Quimsa funchaguna jipami, Taita Diosbu huasibi yachachijgunabu chaupibi, tapuigunada rrurrash y uyash tiyajujta tarinajurca. 47 Jesusda uyajgunaga pai yachashcada y tapuigunada imashina contestajta rricushmi, mancharish saquirinajurca. 48 Chaibi gajujta rricushmi, paibu yayamamaga ashcada mancharinajurca y paibu mama cashnami nirca: “Huahua, ¿imamundadi ñucunchida sustachircangui? Canbu yayaunga ashcadami mascajushcanchi”. 49 Pero paiga cashna nirca: “¿Imamundadi mascajurcanguichi? ¿Ñuca yayabu huasibi gajuna gashcadaga nallu yacharcanguichi?”. 50 Paigunaga Jesús nijushcadaga na intindinajurcallu. 51 Jesusga Nazaret pueblomunmi paibu yayamamagunaun vueltarca. Y paigunadaga cazushmi catirca. Y Mariaga tucui ima pasashcadaga paibu shungubimi huaquichij garca. 52 Y Jesusga, Taita Diosbu y gentegunabu ñaupujpiga yachaisapa tucush alli rricurishmi huiñash catirca.