1 Samuel

25 Samuel huañujpiga, tucui israelitagunami huacanajurca, Ramá pai causashca pueblobimi pambanajurca, y Davidga Parán sitashca pambamunmi rrirca. 2 Maón pueblobiga, shuj rico jarimi causarca, Carmelo pueblobimi huagragunada 3.000 llamagunada y mil chivogunada charirca. Carmelo pueblobimi llamagunabu millmada rrutujurca. 3 Paiga, Calebbu familiamunda, Nabal shutimi garca, paibu huarmi juila, alli yuyaj, Abigail shutimi garca, pero Nabalga malo y na allida rrurraj garca. 4 David sitashca pambabi gashmi, Nabal llamagunabu millmagunada rrutujushcada uyarca. 5 Chaimi David paibu 10 jarigunamun nirca: “Carmelo pueblomun rrichi, Nabalda mascash ¿allillallu gangui? nish ñuca partemunda tapuichi. 6 Jipaga cashna nichi: ʹCan canbu familia y tucui can charishcaguna alli rrishca gallun. 7 Canbu llamagunabu millmagunada rrutujushcadami uyashcani. Canbu llamagunada michijguna ñucunchiun gajpiga, na molestarcanchillu, y Carmelo pueblobiga nimada na quichurcanchillu. 8 Chaidaga canbu sirvijgunada tapunguilla paigunaga huillangallami. Ñuca sirvijgunada alli chasquillun rogani, jatun fiestaguna tiyashca tiempobi chayashcanchi. Canbu sirvijgunamun y canbu churi Davidmun can munashcada convidabai’”. 9 Chaimi Davidbu sirvijguna Nabalmun rrish David ima nishcada ninajurca. 10 Chai jipami, Nabalga Davidbu sirvijgunada cashna nirca: “¿Davidga pidi gan? ¿Jesebu churiga imadadi munan? Cununga ashca sirvientegunami paigunabu dueñogunamundaga mitijun. 11 ¿Ñuca llamagunabu millmagunada rrutujuj jarigunamun preparashca, tandada, yacuda y aichadaga ima nishti na rrijsishca jarigunamunga convidashari?”. 12 Davidbu sirvijguna vueltash rrishmi Nabal ima nishcada tucuida huillarca. 13 Chai rratomi, Davidga paibu sirvijgunada cashna ordenarca: “¡Cangunabu espadada japichi!”. Chaimi David y paibu sirvijgunaga espadada japinajurca. 400 jarigunami Davidhuan rrirca, y 200 jarigunaga ima charishcada cuidangabu saquirinajurca. 14 Ashtaunsh shuj sirvijmi Abigailmun cashna nirca: “Davidmi paibu sirvijgunada sitashca pambamunda ñucunchi amoda felicitallun cacharca, pero paiga fiñarishmi camirca. 15 Chai jarigunaga ñucunchigunaun alli comportarish na molestanajurcallu y chai tiempobiga nipi imadash na shuhuanajurcallu. 16 Ñucunchi llamagunada michijujpiga, paigunaga tuta funchami jatun pirca shinami cuidanajurca. 17 Cunun imada rrurrana gashcadaga alli decidi. Caimundaga tucuigunami sufrishun. Nabalga demas millai jarimi gan, paiunga na parrlai pudinchillu”. 18 Chaimi Abigailga 200 tandagunada, ishqui jarra vinogunada, pishca llamagunada, chaupi quintal granogunada, pasasgunaun rrurrashca 100 pastelgunada, higogunaun rrurrashca 200 pastelgunada burrobi apachirca. 19 jipa paibu sirvijgunamun cashna nirca: “Ñaupash rrichi, ñucaga catishallami”. Paibu cusamunga nimada na huillarcallu. 20 Paiga shuj burrobi tiyarishmi pish ama rricullun urcuda pacalla uriyajurca, David y paibu sirvijgunash chai ñanlladimi rrinajurca, Abigailga paigunaunmi tuparca. 21 Davidga cashnami nijurca: “Ñucami sitashca pambabi pai charishcagunadaga yangamunda cuidashcani. Nipi imadash na shuhuarcallu, ayudashca jahuami paiga na alli tratan. 22 Caya tutamunda Nabalbu jarigunada na tucuchishca gajpiga, Dioslladi Davidbu contragunada tucuchillun. 23 Abigail Davidta rricushaga, rratomi burromunda uriyash paibu ñaupujpi cungurirca. 24 Davidbu ñaupujpi cungurishaga cashnami nirca: “Ñuca amitolla, tucui cai llaquigunaga ñucabu culpamundami gan. Canun parrlallun saquihuai. Ñuca canda sirvij ima nishcada uyabai. 25 Ñuca amitolla Nabal ima nishcada ama crillu. Paibu shutiga Nabalmi gan, chai shutiga tonto nisha ninmi. Chai shutiga pai imashina gashcadami rricuchin. Pero ñuca, canda sirvij, can cachashca jarigunadaga na rricushcanillu. 26 Jehová Dios y can causajushcadaga crinimi, shinalladi de seguro Jehová Dios can juchabi ama urmallun, canbu maquida yahurun de gana ama mapayachillunmi canda jarcallun ñucada cachashca. Canbu enemigoguna y canda llaquichisha nijguna Nabal shina tucullun. 27 Cununga, ñuca amitolla, ñuca canmun apamushca regaloda canbu sirvijguna chasquillun saquibai. 28 Ñuca canbu sirvij canda colerachishcamunda, perdonabai. Ñuca amitolla Jehová Dios canbu familiada bendiciana gashcadaga allimi yachani. Porque canmi Jehová Diosmunda peleangui y canbu causabiga ima malodash na rrurrashcanguillu. 29 Ñuca amitolla, majinbish canda huañuchisha nish catirajpiga, Jehová Diosmi canbu causaida shuj bolsabi huaquichishca shina chariranga. Pero canbu enemigogunabu causaidaga shuj catapulgabi rrumida churash sitaj shinami carubi sitanga. 30 Y Jehová Dios canmun ima promitishcada fajtachijpi Israel llactabi rey shina churajpiga, 31 canlladi justiciada rrurrashcamunda canbu maquida yahurun de gana mapayachishcamundaga na llaquibish arrepintiringuillu. Ñuca amitolla Jehová Dios canda bendiciajpiga, ñuca canbu sirvijmunda yuyaribangui”. 32 Chaimi Davidga Abigailmun cashna nirca: “¡Jehová Israelbu Dios, pai ñucada jarcallun cachashcamunda, jatunyachishca gallun! 33 Ñuca juchabi ama urmallun, ñuca maquida yahurun de gana ama mapayachillun alli yuyash jarcashcamunda Dios bendiciallun. 34 Jehová Israelbu Dios causashcadaga, seguromi crini, paimi ñucada jarcallun canda ama llaquichillun cachashca, si can ñucaun na parrlangabu shamushca gajpiga, cayaga Nabalbu tucui sirvijgunadami huañuchimun garcani”. 35 Chaimi David tucui pai ima apamushcada chasquish cashna nirca: “Canbu huasimun tranquila rrilla, candaga uyashcanimi y can mañashcadami rrurrasha”.