Taita Diosmi jahua cieloda y cai allpa pachada rrurrarca

Jehová Diosmi ñucunchigunadaga rrurrarca. Paimi, ñucunchi rricui pudina cosasgunada y na rricui pudishca cosasgunadaga rrurrarca. Narij imadash rrurrashmi puntabiga ashca angelgunada rrurrarca. Chai angelgunaga, ¿pigunadi gan? Chai angelgunaga Jehová Dios layami gan. Ñucunchiga Jehová Diosda y angelgunadaga na rricui pudinchillu. Jehová Dios rrurrashca punta angelga, estrellagunada, planetagunada y cutishuj cosasgunada rrurrashmi ayudarca. Ñucunchiga planeta tierra nishcabimi causanchi.

Jipaga, animalguna y genteguna causai pudillunmi, Jehová Diosga cai allpada prepararca. Intidami cai allpa pachada funchayachillun rrurrarca. Shinalladi urcugunada, playabi tiyaj yacugunada y larca yacugunadami rrurrarca.

Chai jipaga, ¿imadi pasarca? Jehová Dios nirca: “Jihuada, plantagunada y yuragunadami rrurrasha”. Chashnami cai allpabiga tucui laya frutaguna, verduraguna y sisaguna huiñai callarirca. Shinalladi Jehová Diosga tucui laya animalgunadami rrurrarca: jahua cielobi vuelaj animalgunada, yacubi tiyaj animalgunada y allpabi llucaj animalgunada. Conejo shina utila animalgunada y elefante shina jatun animalgunadami rrurrarca. Can munashca animalitoga, ¿majindi gan?

Shinalladi Jehová Dios pai rrurrashca punta angeldaga cashnami nirca: “Punta jarida rrurrashun”. Genteguna animalgunamundaga diferentemi gana garca. Gentegunadaga mushuj aparatogunada rrurrallun, parrlallun, asillun y Taita Diosda mañai pudillunmi rrurrarca. Shinalladi cai allpada y tucui animalgunadami cuidana garca. Taita Dios rrurrashca punta jari, ¿pi gashcadaga yachanguillu?