Cuerpo Gobernantemunda carta

Juyashca huauquipaniguna:

Jehová Diosda sirvijgunaga Bibliadaga ashcadami valoranchi. Ñaupa tiempobi ima pasashcada, alli consejogunada y Jehová Dios gentegunada de verdad juyashcadami Bibliabiga yachai pudinchi (Salmo 119:105; Lucas 1:3; 1 Juan 4:19). Tucui genteguna Bibliamunda verdadta yachallunmi munanchi, chaimundami “Bibliabi Taita Diosda sirvijgunamunda yachashunchi” nishca libroda llujchishcanchi. Cai libro imabu rrurrashca gashcadami, ashallada parrlasha ninchi.

Cai librodaga utila huahuagunabi yuyashmi rrurrashcanchi. Shinalladi Bibliamunda más yachasha nijgunami cai librodaga estudiai pudinajun. Bibliaga tucui gentegunabumi gan, cai librobi tiyaj lecciongunada estudiashaga, ñucunchilladi beneficiarishmi alli causai pudinajushun.

Cai librobiga genteguna imashina tiyai callarishcadaga Bibliamunda rricushmi, intindirinalla y jahualla shimigunabi escribingabu esforzarishcanchi.

Cai librobiga, Bibliamunda japishca historiagunaga na solo letragunalladallu charin, ima yachajushcada intindi pudingabuga fotogunadashmi charin.

Bibliabiga Jehová Diosda sirvijguna cazushcada y na cazushcadami parrlan, chaidami cai librobiga escribishcanchi. Paigunabu ejemplomunda yachashmi imada rrurrana gashcada o na rrurrana gashcada yachashun (Romanos 15:4; 1 Corintios 10:6). Cai libroga 14 partegunadami charin. Cada partebimi imada yachagrijushcada intindingabuga shuj resumen tiyan.

Huahuagunada charishaga shuj leccionda liyishmi fotogunamunda parrlai pudinguichi. Jipaga chai leccionbi rricurij tucui textogunadashmi liyi pudinguichi. Huahuagunamunga cai librobi tiyaj yuyaigunaga Bibliamunda japishca gashcada intindillun ayudai. Shinalladi cada leccionmunda imada intindishcada cuenta japillunmi ayudana gangui. Tucuigunami cai librodaga cashna estudiai pudinajun.

Alli shunguda charij, tucui gentegunami cai libroda estudiash, Bibliada liyish, paigunabu causaibi fajtachillun munanchi. Chashnami Jehová Diosbu familiapura tucush paida adorai pudinajunga.