¿Jehová Diosbuga tucui fiestagunallu alli gan?

Jehová Diosga, genteguna huaquin fiestagunada rrurrash contento sintirillunmi munan. Pero, ¿Diosbuga tucui fiestagunallu alli gan? ¿Imashinadi pai munashca fiestagunada rrurrana ganchi?

1. ¿Jehová Diosbuga imamundadi huaquin fiestagunaga na alli gan?

Huaquin fiestagunaga panta religiongunaun tsagrurishca o Biblia yachachishca shinaga na ganllu. Por ejemplo, “huañushca jipa causash catinchi” nishcada crichingabumi fiestagunada rrurrana yachan. Cutishuj fiestagunadaga magiaun tsagrurishca o suerteda charingabumi rrurranajun (Isaías 65:11). Jehová Diosga paida sirvijgunamunga cai advertenciadami cun: “Chaimunda llujshish anchurichi [...] mapa tuparinada saquichi” (2 Corintios 6:17).a

2. ¿Jehová Diosga genteguna demas valichish rrurrashca fiestagunamundaga imadadi yuyan?

Jehová Diosga gentegunabi confiana shuj trampa gashcamundami, cashna advirtin: Huañunalla gentegunabi ama confiangui (Jeremías 17:5-da liyi). Huaquin fiestagunadaga gobiernogunada o gentegunada yuyarishmi rrurranajun. Shinalladi cutishujgunaga banderagunada, escudogunada o shuj llactabu importante fechagunada yuyaringabumi fiestagunadaga rrurranajun (1 Juan 5:21). Huaquingunaga politicogunada o shuj organizacionda apoyangabu o jatunyachingabumi fiestagunada rrurranajun. Taita Dios na munashca fiestagunabi tsagrurijpiga, Jehová Diosga ¿imashinadi sintiringa?

3. ¿Jehová Diosbu ñaupujpiga ima fiestagunadi na alli gan?

Bibliabiga “vinoda demas ubiana”, “na alli fiestagunada rrurrana” shinalladi “ubiangabu fiestagunada rrurranaga” na allillu gan nin (1 Pedro 4:3). Huaquin fiestagunabi, gentegunaga yuyaida chingachishmi na alli cosasgunada rrurranajun. Jehová Diosbu amigo tucush catisha nishaga, cai na alli fiestagunamundami caruyana ganchi.

CAI TEMAMUNDA MÁS YACHASHUNCHI

4. Jehová Diosda na respetaj fiestagunabiga na participanallu ganchi

Efesios 5:10-da liyish, chaimunda parrlaichi:

• ¿Shuj fiestada rrurragrijushaga imabidi yuyana ganchi?

• ¿Can causashca lugarbiga ima fiestagunadadi rrurran?

• ¿Chai fiestagunada Jehová Diosga allillu rricun?

Por ejemplo, ¿Taita Dios cumpleañosgunamunda imada yuyashcada tapurishcanguillu? Bibliabiga Taita Diosda sirvijguna cumpleañosgunada rrurrashcadaga na ninllu, pero Diosda na sirvij ishqui jariguna cumpleañosda rrurrashcadaga huillanmi. Génesis 40:20-22 y Mateo 14:6-10-da liyi. Jipaga chaimunda parrlaichi:

• ¿Cai ishqui cumpleañosgunamundaga imadadi yachajui pudinchi?

• Cai textogunada liyishca jipaga, Jehová Dios cumpleañosgunamunda ¿ima yuyashcadadi cringui?

Chaimunda, tapurishcanguillari “¿Ñuca shuj cumpleañosda rrurrajpi o Taita Dios na munashca fiestamun rrijpi paiga imashinashi sintiringa?” nish. Éxodo 32:1-8-da liyi. Jipaga VIDEODA rricush caimunda parrlaichi:

VIDEO: Taita Dios na munashca fiestaguna (5:07)

• ¿Jehová Dios ima munashcadaga imamundadi alli yuyana ganchi?

• Chaidaga ¿imashinadi rrurranchi?

¿Jehová Dios shuj fiestada munashcada o na munashcadaga imashinadi yachai pudinchi?

• ¿Chai fiestagunaga Biblia yachachishcagunada apoyanllu? Cai fiesta, imashina tiyai callarishcada yachangabuga shuj informacionda liyi.

• ¿Chai fiestagunaga gentegunada, organizaciongunada, banderagunada o imagengunada jatunyachingabullu gan? Ñucunchigunabuga Jehová Diosda jatunyachinami más importante gan, chaimundami pailla tucui problemagunada tucuchinabi confianchi.

• ¿Chai fiestabiga Biblia na yachachishcadallu rrurranajun? Ñucunchi yuyaigunaga limpiomi gana gan.

5. Canbu crishcagunada respetallun esforzari

VIDEO: Ñucunchi crishcagunadaga respetoun parrlashunchi (2:01)

Mateo 7:12-da liyish, chaimunda parrlaichi:

• Cai textobi rricushca shina, Diosda na sirvij familia huaquin fiestada rrurrajpiga, cai fiestada na rrurranallu gangui ¿ninallu ganchi?

• ¿Familiagunaun huaquin fiestagunada na rrurrashash, imashinadi paigunada juyashcada rricuchi pudingui?

6. Jehová Diosga contentos causallunmi munan

Jehová Diosga ñucunchi familiagunaun y amigogunaun contentos pasallunmi munan. Eclesiastés 8:15-da liyish, chaimunda parrlaichi:

• Jehová Dios ñucunchiguna contento causallun munashcada, cai textoga ¿imashinadi rricuchin?

Jehová Diosga paibu sirvijguna cushilla, tandalla pasallunmi munan. Cai shimiguna asamblea internacionalesgunabi imashina fajtarishcada yachangabuga cai VIDEODA rricui.

VIDEO: Asambleas internacionalesgunabiga juyaiunmi chasquinajun (5:40)

Gálatas 6:10-da liyish, chaimunda parrlaichi:

• ¿Cutishujgunada juyashcada rricuchingabuga fiestagunadallu rrurrana ganchi?

• ¿Quiquinga imamundadi shuj regaloda convidanada munangui: obligacionmunda o juyaimunda?

• Huaquin Testigo taitamamagunaga huahuagunada juyashcamundami, fiestagunada y regalogunada cun. Can huahuagunada charishaga juyaida rricuchingabuga, ¿imadadi rrurranguimun?

RESUMEN

Jehová Diosga familiagunaun, amigogunaun contento alli pasallunmi munan, pero pai na munashca fiestagunabi participallunga na munanllu.

Repaso

• ¿Jehová Diosbu ñaupujpi shuj fiesta alli gashcada yachangabuga ima tapuigunadadi rrurrana ganchi?

• ¿Ñucunchiguna huaquin fiestagunabi na participai pudishcadaga imashinadi familiagunamun, amigogunamunga intindichina ganchi?

• ¿Jehová Dios huaquin fiestagunabi participash contento sintirillun munashcadaga imashinadi yachanchi?

ASHTAUN YACHAI

Diosda sirvijgunaga ima fiestagunabi na participana gashcada liyi.

“¿Por qué los testigos de Jehová no celebran ciertas fiestas?” (Artículo de jw.org)

Taita Dios cumpleañosgunada na chasquishcada yachangabuga cai chuscu yuyaigunada rricui.

“¿Por qué los testigos de Jehová no celebran los cumpleaños?” (Artículo de jw.org)

Huahuagunaga Jehová Diosda ashcada juyashcamundami malo fiestagunabi na participanajun, shinami paida contentachin.

Para Jehová, eres especial (11:35)

Taita Diosda sirvij ashca millón gentegunaga Navidad fiestabi na participanllu. Chai decisionda agllashcamundaga, ¿contentollu sintirinajun?

“Encontraron algo mejor” (La Atalaya, 1 de diciembre de 2012)