2 Crónicas
9 Saba llajtamanta reinaca Salomón ashtahuan rijsishca cashcatami uyarca. Chaimantami Salomontaca sinchi tapuicunata rurashpa yachaj cashcata ricungapaj Jerusalenman shamurca. Paica achca ayudajcunahuanmi shamurca. Shinallataj aceite balsamicota, achca orota, sumaj rumicunata camellocunapi apachishcami shamurca. Salomonpaj ñaupajman shamushpami pai* ima yuyacushcata tucuita tapurca. 2 Chaimi Salomonca pai tucui tapushcacunata cutichirca. Salomonpajca ima mana sinchi carcachu. Tucuitami alli intindichi tucurca.
3 Saba llajtamanta reinaca Salomón alli yachaita charishcata ricushpa, paipaj huasita shayachishcata ricushpa, 4 paipaj mesapi micunacuna tiyacujta ricushpa, paita sirvijcuna ima shina tiyacujta ricushpa, mesapi sirvijcuna ima laya sirvicujta ricushpa, paicuna ima shina churarishcata ricushpa, paipaj copata pasachijcunata ricushpa, paicuna ima shina churarishcata ricushpa, Jehová Diospaj huasipi rupachishca sacrificiocunata punllanta pai cujta ricushpami mancharishca saquirirca. 5 Chaimantami reytaca cashna nirca: “Ñuca llajtapi cashpa can imallata rurashcata uyashcapish, can alli yachaj cashcata tucui uyashcapish ciertomari cashca. 6 Shinapish ñucallataj shamushpa ñuca propio ñahuicunahuan ricungacamaca manataj crircanichu. Ñucamanca can alli yachaj cashcataca manamari tucuita huillashcacuna. Canmanta ñuca uyashcaca maihuan yallimari cashca. 7 ¡Cambaj pueblopish, canta sirvijcunapish, cambaj alli yachaita uyangapaj siempre canhuan cashcamantami cushicuncuna! 8 Cambaj Jehová Diosca alabashca cachun. Diosca canta cꞌuyashpami paipaj jatun tiyarinapi cambaj Jehová Diospaj rey cachun tiyachishca. Cambaj Diosca Israel llajtata cꞌuyashpami huiñai huiñaipaj tiyachun munan. Chaimantami cashcata rurashpa, allita rurashpa mandachun cantaca rey cachun nombrashca” nircami.
9 Chai qꞌuipaca chai huarmica reyman 120 talento* orota, achca aceite balsamicota, sumaj rumicunatapishmi curca. Saba llajtamanta reina achca aceite balsamicota rey Salomonman cushca shinaca cutinca pi mana apamurcachu.
10 Shinallataj Hirampaj sirvijcuna, Salomonpaj sirvijcunaca Ofir llajtamantami orota, sándalo caspicunata, sumaj rumicunata apamurca. 11 Reyca sándalo caspicunahuanca Jehová Diospaj huasipajpish, reypaj huasipajpishmi* escaleracunata rurarca. Shinallataj cantajcunapaj arpacunata, cuerdata charij instrumentocunatapishmi rurarca. Chai laya caspicunaca Judá llajtapica mana nunca tiyashcachu carca.
12 Rey Salomonpish Saba llajta reinamanca pai imata munashcata, pai imata mañashcatami curca. Paimanca reyca pai apamushcatapish yallimi curca. Chai qꞌuipami chai huarmica paita sirvijcunandij paipaj llajtaman tigrashpa rirca.
13 Rey Salomonca cada huatami 666 talento orota chasquij carca. 14 Chai jahuapish cꞌatushpa randishpa purijcuna, comerciantecuna, Arabiamanta tucui reycuna, llajtapi mandajcunapish orota, cullquitami Salomonman apamujcuna carca.
15 Rey Salomonca chagrushca orohuanmi 200 jatun escudocunata rurarca (cada escudomi 600 siclo* chagrushca orohuan rurashca carca). 16 Shinallataj chagrushca orohuanmi 300 uchilla escudocunata rurarca (cada escudomi quimsa mina* orohuan rurashca carca). Chashna rurashpami rey Salomonca Líbano Bosque nishca Huasipi chaicunataca churarca.
17 Shinallataj rey Salomonca marfilmantami shuj jatun tiyarinata rurarca. Chai tiyarinataca oro purohuanmi jahuata churarca. 18 Jatun tiyarinaman huichiyangapajca sujta* gradacunami tiyarca. Chai jatun tiyarinapica orohuan rurashca chaquita churanapishmi tiyarca. Tiyarina cada ladomanca rigracunata samachinami tiyarca. Rigracunata samachina cada ladopica shuj leonmi shayacurca. 19 Sujta gradacunapica 12 leoncunami shayacurca. Chai sujta gradacunapica cada ladomanmi shuj león shayacurca. Chashna tiyarinataca ni maijan llajtamanta rey mana charircachu. 20 Rey Salomonpaj copacunaca tucuimi oromanta carca. Líbano Bosque nishca Huasipi tiyaj cosascunapish tucuimi oro purohuan rurashca carca. Cullquimanta rurashca cosascunaca mana tiyarcachu. Salomonpaj punllacunapica cullquica imapaj mana valircachu. 21 Reypaj barcocunaca Hirampaj sirvijcunahuanmi Tarsis llajtaman rijcuna carca. Cada quimsa huatami Tarsis barcocunaca* orota, cullquita, marfilta, monocunata, pavo realcunata aparishca shamuj carca.
22 Rey Salomonca cai allpapi tiyaj tucui reycunamantaca paimi ashtahuan alli yachaj, achcata charij carca. 23 Salomonpaj shungupica Diosmi alli yachaita churashca carca. Chaimantami tucui llajtamanta reycunaca chai alli yachaita uyangapaj paita ricunaman shamunata munajcuna carca. 24 Tucuicunami regalocunata apamujcuna carca. Paicunaca cullqui cosascunata, oro cosascunata, ropacunata, macanacunacunata, aceite balsamicota, caballocunata, mulacunatapishmi apamujcuna carca. Chaitaca cada huatami rurajcuna carca. 25 Salomonca paipaj caballocunapajmi 4.000 corralcunata charirca. Shinallataj achca carretacunata, 12.000 caballocunatapishmi* charirca. Chaicunataca carretacunata shayachina llajtacunapimi churarca. Shinallataj reypaj cꞌuchullapi, Jerusalenpimi churarca. 26 Shinallataj paica Éufrates jatun yacumanta callarishpaca filisteocunapaj allpacunacama, Egipto llajta lindecunacamami tucui reycunata mandacurca. 27 Rey Salomonca Jerusalenpica rumicunata shinami yallitaj achca cullquita tandachirca. Shinallataj Sefelapi tiyaj sicómoro* yuracuna shina yallitaj cedro caspicunatami tandachirca. 28 Salomonpajca Egiptomanta, tucui shujtaj llajtacunamantapishmi caballocunata apamurcacuna.
29 Salomonpaj causaimantaca callarimanta tucuringacamami profeta Natanpaj quillcashca shimicunapi, silonitacunapuramanta Ahiyapaj profeciacunapi, muscuipi shina ricushcata huillaj Idopaj quillcashcacunapi tiyacun. Idoca muscuipi shina ricushcacunata huillajmi carca. Paica Nebatpaj churi Jeroboanmantami huillashca carca. 30 Salomonca Jerusalenpica tucui Israeltami 40 huatacunata mandarca. 31 Chai qꞌuipaca Salomonca huañurcami.* Chaimantami paipaj yaya Davidpaj Llajtapi pambarcacuna. Chai huashaca paipaj churi Rehoboammi catij rey tucurca.