1 Reyes
16 Jehová Diosca Hananipaj churi Jehumanmi Baasapaj contra huillachishpaca cashna nirca: 2 “Cantaca polvomanta jatarichij shina jatarichishpami ñuca pueblo Israelta pushaj cachun churarcani. Ashtahuanpish canca Jeroboanpaj ejemplota catishpami ñuca pueblo Israeltaca juchapi urmachishcangui. Chaimi paicunapaj juchacunahuan ñucata pꞌiñachircacuna. 3 Chaimantami Baasatapish, paipaj familiatapish tucui tucuchisha. Paipaj familiataca Nebatpaj churi Jeroboanpaj familiata shinallatajmi rurasha. 4 Baasapaj familiamanta cajcuna llajta ucupi huañujpica allcucunami micunga. Cutin campopi huañujcunataca jahuata volaj* animalcunami micunga” nircami.
5 Baasapaj causaipish, pai imalla rurashcapish, paipaj poderpish Israel llajtamanta reycunapaj causaimanta parlaj libropimi quillcashca tiyacun. 6 Qꞌuipaca Baasaca huañurcami.* Chaimi paitaca Tirzapi pambarcacuna. Chaimantaca paipaj churi Elami catij rey tucurca. 7 Jehová Diosca Hananipaj churi Jehumanmi Baasapaj contra, paipaj familiapaj contra imata ruragrishcata huillachirca. Jehová Diospaj ñaupajpi tucui millaita rurashcamanta, Nadabta huañuchishcamantami ima tucugrishcata huillachirca. Paica Jeroboanpaj familia shinallatajmi tucurca, paipaj ruraicunahuanmi Diostaca pꞌiñachirca.
8 Rey Asá Judá llajtata 26 huatacunata mandacujpimi Baasapaj churi Elaca israelitacunata Tirzapi mandai callarirca. Paica ishqui huatacunatami mandarca. 9 Elata sirvij Zimrica Elapaj macanacuna tucui carretacunamanta chaupita pushajmi carca. Paimi Tirzá llajtapi Arzapaj huasipi rey machacujpi paipaj contra jatarinata yuyarirca. Arzá runaca Tirzapica reypaj huasipimi mayordomo carca. 10 Rey Asá Judá llajtata 27 huatacunata mandacujpimi Zimrica yaicushpa rey Elata huañuchirca. Chai qꞌuipami paica catij rey tucurca. 11 Ña rey tucushpa paipaj jatun tiyarinapi tiyarishpaca Baasapaj tucui familiatami huañuchirca. Familiacuna cajpipish, amigocuna cajpipish tucui cꞌaricunatami huañuchirca. 12 Chashnami Zimrica Baasapaj tucui familiata tucuchirca. Paica Jehová Dios Baasapaj contra profeta Jehuman huillachishca shinami rurarca. 13 Baasapaj tucui juchacunamanta, paipaj churi Elapaj tucui juchacunamanta, israelitacunata paicuna juchapi urmachishcamantami chashna tucurca. Paicunaca mana vali rurashcalla dioscunata adorashpami israelitacunapaj Jehová Diosta pꞌiñachishcacuna carca. 14 Elapaj causaipish, pai tucui imalla rurashcapish Israel llajtamanta reycunapaj causaimanta parlaj libropimi quillcashca tiyacun.
15 Rey Asá Judá llajtata 27 huatacunata mandacujpimi Zimrica canchis punllacunata Tirzapi rey tucurca. Chai tiempopica Guibetón llajta gentecunahuan macanacungapajmi soldadocunaca carpa huasicunapi carcacuna. Guibetón llajtaca filisteocunapajmi carca. 16 Chaipimi soldadocunaca: “Zimrica reypaj contra jatarishpami paita huañuchishca” nishcata uyarcacuna. Chaimantami chai punllaca tucui soldadocuna Omrí runata Israelpi rey cachun nombrarcacuna. Omrí runaca soldadocunata mandajmi carca. 17 Omripish, tucui soldadocunapish Guibetonmanta huichiyashpami Tirzá llajta muyundijta shayarircacuna. 18 Zimrica soldadocuna Guibetón llajtaman yaicushcata ricushpaca reypaj huasipi* tiyaj sinchi torremanmi yaicurca. Paica chai huasipi ninata japichishpami chai ucupi saquirishpa huañurca. 19 Jehová Diospaj ñaupajpi mana allicunata rurashpa paillataj juchata rurashcamanta, Jeroboanpaj ejemplota catishcamanta, israelitacunatapish juchapi urmachishcamantami chashna tucurca. 20 Zimripaj causaipish, Elapaj contra jatarishcapish Israel llajtamanta reycunapaj causaimanta parlaj libropimi quillcashca tiyacun.
21 Israelitacunaca ishqui grupopimi chꞌicanyarircacuna. Shuj grupoca Guinatpaj churi Tibní runata catishpami paita rey cachun churashun nircacuna. Cutin caishuj grupoca Omrí runatami catircacuna. 22 Pero Omrita catijcunaca Guinatpaj churi Tibnita catijcunatami misharcacuna. Chai qꞌuipami Tibnica huañurca. Cutin Omrica reymi tucurca.
23 Rey Asá Judá llajtata 31 huatacunata mandacujpimi Omrica Israel llajtata mandai callarirca. Paica 12 huatacunatami mandarca. Tirzapica sujta huatacunatami mandarca. 24 Omrica Sémer runamanmi Samaria* urcuta ishqui talento* cullquipi randirca. Chai urcupimi shuj llajtata shayachirca. Chai llajtataca urcupaj dueño Semerpaj shutimantami Samariata* shutichirca. 25 Omrica Jehová Diospaj ñaupajpica mana allicunatami rurarca. Paica paipaj ñaupa mandaj tucui reycunatapish yalli millaimi carca. 26 Paica Nebatpaj churi Jeroboanpaj ejemplotami catirca. Shinallataj pai rurashca juchacunallatatajmi rurarca. Chai juchacunata rurashpami Jeroboanca israelitacunata juchapi urmachirca. Mana vali rurashcalla dioscunata adorashpami israelitacunapaj Jehová Diosta pꞌiñachirca. 27 Omripaj causaipish, pai imalla rurashcapish, macanacuicunata mishashcapish Israel llajtamanta reycunapaj causaimanta parlaj libropimi quillcashca tiyacun. 28 Qꞌuipaca Omrica huañurcami. Chaimi paitaca Samariapi pambarcacuna. Chaimantaca paipaj churi Acabmi catij rey tucurca.
29 Rey Asá Judá llajtata 38 huatacunata mandacujpimi Omripaj churi Acabca Israel llajtata mandai callarirca. Omripaj churi Acabca Samariamantami israelitacunataca 22 huatacunata mandarca. 30 Omripaj churi Acabca Jehová Diospaj ñaupajpica paipaj ñaupa mandaj tucui reycunatapish yalli millaimi carca. 31 Nebatpaj churi Jeroboán rurashca juchacunata rurashca jahuapish Sidón llajtata mandaj rey Etbaalpaj ushushi Jezabelhuanmi cazararca. Chashnami Baalta sirvi callarishpa paipaj ñaupajpipish cungurirca. 32 Shinallataj Samariapi Baalpaj shayachishca huasipimi Baalpaj shuj altarta rurarca. 33 Acabca adorana postetapishmi rurarca. Paica israelitacunapaj Jehová Diosta pꞌiñachingapajmi Israel llajtata paipaj ñaupa mandaj tucui reycunatapish yalli millai cosascunata rurarca.
34 Acab mandacui punllacunapimi Betelmanta Hiel shuti runaca Jericó llajtata cutin shayachirca. Jehová Dios Nunpaj churi Josueman huillachishca shinami cimientocunata churacujpica paipaj punta churi Abiram huañurca. Cutin pungucunata churacujpica paipaj qꞌuipa churi Segubmi huañurca.