Josué

22 Chaimi Josueca rubenitacunata, gaditacunata, Manasespaj chaupi familiata tandachishpaca 2 cashna nirca: “Cancunaca Jehová Diosta sirvij Moisés mandashcatami tucuita rurashcanguichij. Shinallataj tucui ñuca mandashcatapishmi cazushcanguichij. 3 Tucui cai tiempopi cancunapaj huauquicunataca mana saquishcanguichijchu. Cunan punllacunacamami paicunahuan cashcanguichij. Shinallataj cancunapaj Jehová Dios mandashcatapishmi pajtachishcanguichij. 4 Cunanca ñucanchij Jehová Diosca cancunapaj huauquicunamanca pai nishca shinami tranquilo causaita cushca. Chaimantami cancunapaj carpa huasicunata shayachishca allpaman tigrai tucunguichij. Chaitaca Jehová Diosta sirvij Moisesmi Jordán caishuj ladopi* cancunaman cushca carca. 5 Pero Jehová Diosta sirvij Moisés cancunaman cushca Leytapish, mandamientocunatapish tucuita alli pajtachinguichij. Cancunapaj Jehová Diosta cꞌuyashpa, paipaj tucui ñancunapi purishpa, paipaj mandashcacunata cazushpa, paimanta manataj caruyashpa, cancunapaj tucui shunguhuan, tucui almahuan* sirvinguichij” nircami.

6 Chai qꞌuipaca Josueca paicunata bendiciashpami minchacama nishpa cacharca. Chaimi paicunaca paicunapaj carpa huasicunaman rircacuna. 7 Moisesca Manasespaj chaupi familiamanca Basanpimi herenciata cushca carca. Cutin Manasespaj caishuj chaupi familiamanca Josueca Jordán jatun yacu inti huashicun ladopimi paicunapaj huauquicunapaj cꞌuchupi causachun allpacunata cushca carca. Josueca paicunapaj carpa huasicunaman tigra cachacushpaca paicunatami bendiciarca. 8 Shinallataj paicunataca: “Cancuna tucui imalla charishca cosascunata, achca animalcunata, cullquita, orota, cobreta, fierrota, achca ropacunatapish apashpa tigraichij. Shinallataj cancunapaj contracunata quichushca cosascunata apashpa cancunapaj huauquicunahuan chaupinguichij” nircami.

9 Chai qꞌuipaca rubenitacunapish, gaditacunapish, Manasespaj chaupi familiapish caishuj israelitacunamanta chꞌicanyarishpami Siló llajtamanta rircacuna. Siló llajtaca Canaán allpapimi carca. Chaimantaca paicunaca Galaad allpamanmi cutin tigrarcacuna. Galaad allpataca Moisesman Jehová Dios mandashca shinami paicunapaj allpa cachun japishcacuna carca. Paicunaca ñami chai allpapi causacushcacuna carca. 10 Paicunaca Canaán allpapi caj Jordán jatun yacu cꞌuchumanmi chayarcacuna. Chai Jordán cꞌuchupimi rubenitacuna, gaditacuna, Manasespaj chaupi familiapish shuj altarta shayachircacuna. Chai altarca yallitaj jatun mancharinami carca. 11 Qꞌuipaca shujtaj israelitacunaca: “¡Ricui! Rubenitacuna, gaditacuna, Manasespaj chaupi familiapish Jordán jatun yacu cꞌuchupi, Canaán linderopimi shuj altarta shayachishcacuna. Paicunaca ñucanchij allpa ladopimi chashna rurashcacuna” nishcatami uyarcacuna. 12 Chaita yachaj chayashpami tucui israelitacunaca* paicunahuan macanacunaman ringapaj Siló llajtapi tandanacurcacuna.

13 Chaimi israelitacunaca sacerdote Eleazarpaj churi Finehastaca Galaad allpaman cacharcacuna. Chai allpapica rubenitacuna, gaditacuna, Manasespaj chaupi familiami causajcuna carca. 14 Finehashuanca 10 pushajcunami tiyarca. Chai runacunamanta cada unomi Israelpi tiyaj cada familiata pushajcuna carca. Paicunamantaca cada unomi Israelpaj huaranga huaranga israelitacunapuramanta pushajcuna carca. 15 Paicunaca Galaad allpapi caj rubenitacunapajman, gaditacunapajman, Manasespaj chaupi familiapajman chayashpaca cashnami nircacuna:

16 “Jehová Diospaj tucui puebloca cashnami nin: ‘Maitataj israelitacunapaj Diospaj ñaupajpica cai juchataca rurarcanguichijyari. Cunanca chai altarta shayachishpaca Jehová Diosta catinatami saquishcanguichij. Chashnami Jehová Diospaj contra tucushcanguichij. 17 ¿Peor llajtapi juchata rurashcataca manachu yuyarinchij? Chai juchamantami Jehová Diosca paipaj pueblotaca ungüihuan castigarca. Shinapish chai juchamantami cunancama sufricunchij. 18 ¡¿Shinaca cancunaca Jehová Diosta saquinatachu munanguichij?! Cunan, cancuna Jehová Diospaj contra tucujpica cayaca paica tucui israelitacunahuanmi pꞌiñaringa. 19 Pero cancuna japishca allpa mapa cajpica Jehová Diospaj allpaman pasaichij. Chai allpapimi Jehová Diospaj carpa huasi can. Chaipi ñucanchijpurapi causashpa saquirichij. Pero Jehová Diospaj contraca ama jatarichijchu. Ñucanchij Jehová Diospaj altar tiyashca jahua, shujtaj altarta rurashpa ñucanchijtaca mana cazujcuna shina cachunca ama ruraichijchu. 20 Zerahpaj churi Acanca tucuchishca canapaj cosascunamanta shuhuashpami shuj juchata rurarca. ¿Manachu chaimanta Diosca tucui tandanacushca israelitacunahuan pꞌiñarirca? Acán chai juchata rurashcamantaca mana paillachu huañurca’ ninmi” nircacunami.

21 Chaimi rubenitacuna, gaditacuna, Manasespaj chaupi familiapish Israelmanta familiacunata pushajcunamanca cashna cutichircacuna: 22 “¡Jehová Diosca tucui dioscunamanta ashtahuan jatunmari! ¡Jehová Diosca tucui dioscunamanta ashtahuan jatunmari! Paica ñucanchij imamanta chaita rurashcataca allimi yachan. Israelpish chaitaca yachaj chayangallatajmi. Ñucanchijcuna Jehová Diosta mana cazushpa, juchata rurashca cajpica ñucanchij Dioslla, cunan punllaca ama quishpichichu. 23 Ñucanchijcuna Jehová Diosta catinata saquingapaj shuj altarta shayachishpa, chai altarpi rupachishca ofrendacunata, grano ofrendacunata, Dioshuan alli tucungapaj sacrificiocunata cujpica Jehová Dios chaimanta ñucanchijta castigachun. 24 Shamuj punllacunapi cancunapaj churicuna ñucanchij churicunata: “¿Cancunaca ñucanchijhuan israelitacunapaj Jehová Diosta adorangapajca ima derechotataj charinguichij?” nishpa tapunata preocuparishpami chai altartaca shayachircanchij. 25 Shinallataj paicunaca: “Jehová Diosca ñucanchijhuan, rubenitacunahuan, gaditacunahuan lindero cachunca Jordán jatun yacutami churashca. Chaimantami Jehová Diosta adorana derechotaca mana charinguichij” ningacunami. Cancunapaj churicunaca ñucanchij churicuna Jehová Diosta ama adorachunmi* jarcangacuna.

26 Chaimi ñucanchijca cashna nircanchij: ‘Ñucanchijpaj shuj altarta rurashunchij. Pero chai altarca rupachishca ofrendacunapaj, sacrificiocunapajca mana cangachu. 27 Ashtahuanpish cai altarmi cancunahuan, ñucanchijhuan, ñucanchij huahua huahuacunahuanpish* testigo canga. Ñucanchijca rupachishca ofrendacunahuan, ñucanchij sacrificiocunahuan, Dioshuan alli tucungapaj sacrificiocunahuanmi Jehová Diospaj ñaupajpi paita sirvishun. Chashna rurajpimi shamuj punllacunapica cancunapaj churicunaca ñucanchij churicunataca: “Cancunaca Jehová Diosta adorana derechotaca mana charinguichijchu” mana ningacuna’ nircanchijmi. 28 Chaimi ñucanchijca: ‘Paicuna shamuj punllacunapi ñucanchijmanpish, ñucanchij huahuacunamanpish chashna nijpica ñucanchijpish: “Ricuichij, ñucanchij yayacuna rurashca altarca Jehová Diospaj altar shinami can. Cai altartaca rupachishca ofrendacunata cungapaj, sacrificiocunata cungapajpish mana rurarcacunachu. Ashtahuanpish cancunahuan ñucanchijhuan shuj testigo cachunmi rurarcacuna” nishun’ nircanchij. 29 ¡Ñucanchijca Jehová Diospaj contraca mana nunca tucushunchu. Jehová Diosta saquishpa, sacrificiocunata cungapaj shujtaj altartapish mana rurashunchu. Ñucanchijca Jehová Diospaj carpa huasi ñaupajpi caj altarllapimi rupachishca ofrendacunata, grano ofrendacunata, shujtaj ofrendacunatapish cushun!” nircacunami.

30 Rubenpaj, Gadpaj, Manasespaj huahua huahuacuna chashna nijta uyashpami sacerdote Finehaspish, israelitacunata pushajcunapish, Israelpaj familiacunata pushajcunapish cushilla sintirircacuna. 31 Chaimi sacerdote Eleazarpaj churi Finehasca Rubenpaj, Gadpaj, Manasespaj huahua huahuacunamanca: “Cunanmi yachanchij, cancunaca Jehová Diospaj ñaupajpi ima juchata mana rurashcata. Chaimantami Jehová Diosca ñucanchijpurapi can. Cancunami Jehová Dios israelitacunata llaquichinamanta quishpichishcanguichij” nirca.

32 Chai qꞌuipaca sacerdote Eleazarpaj churi Finehaspish, pushajcunapish rubenitacunata, gaditacunataca Galaad allpapimi saquishpa rircacuna. Chaimantaca paicunaca caishuj israelitacunaman chaita huillangapajmi Canaán allpaman tigrarcacuna. 33 Israelitacunaca chai huillaita uyashpaca cushicurcacunami. Shinallataj paicunaca Diostami alabarcacuna. Ashtahuanpish paicunaca rubenitacuna, gaditacuna causashca allpacunata tucuchingapaj paicunapaj contra macanacunaman rinataca ña imata mana nircacunachu.

34 Chaimi rubenitacunapish, gaditacunapish “Jehová Diosca ñucanchijpurapi testigomi can” nishpa chai altartaca* shuj shutita churarcacuna.