Josué
15 Judapaj familiaman, paicunapaj cada familiacunaman cushca* allpacunaca caicunami carca. Paicunapaj allpacunaca Edom lindecunacama, Zin nishca chaquishca pambacama, Négueb ura ladocamami carca. 2 Paicunapaj ura lado allpa lindecunaca mar Salado* ladomantami callarirca. 3 Chai lindeca Acrabim nishca huichi ura ladocamami carca. Shinallataj Zin nishca chaquishca pambacamami carca. Cutin Cadés-Barnea ura ladomanta huichi rishpaca Hezroncama chayashpa, Addar llajtata huichi catishpa, Carcá lugartami muyurca. 4 Chai lugarmantaca Azmonta pasashpa Egipto pugru pambacamami chayarca. Paicunapaj lindeca Jatun mama cuchapimi* tucurirca. Caicunami ura ladoman caj lindecuna carca.
5 Inti llujshin ladoman caj lindeca mar Saladomanta callarishpaca Jordán jatun yacu tucuringacamami carca. Cutin janaj lado esquinapi caj lindeca mar Salado puntapimi carca. Cai puntapimi Jordán jatun yacuca tucurin. 6 Chai lindeca Bet-Hoglá llajtamanmi huichiyarca. Chaimantaca Bet-Arabá janaj ladotami pasarca. Shinallataj chai lindeca Rubenpaj churi Bohanpaj rumicamami huichiyarca. 7 Chai lindeca Acor pugru pambapi saquirij Debirtami huichiyarca. Chaimantaca janaj ladoman caj Guilgaltami vueltata curca. Guilgalca Adumim huichi chꞌimba ladopimi saquirin. Adumim huichica pugru pamba ura ladopimi saquirin. Shinallataj chai lindeca En-Semes yacucunata catishpaca En-Roguel pugyucamami carca. 8 Chai lindeca Hinón pugru pambacamami huichiyarca. Chaica jebuseocunapaj ura ladoman caj quinrimi carca, chaica Jerusalenmi carca. Chai lindeca urcu puntacamami huichiyarca. Chai urcuca inti huashicun ladoman caj Hinón pugru pambacamami carca. Refaimpi saquirij pugru pamba janaj ladocamami carca. 9 Shinallataj chai lindeca urcu puntamantaca Neftóah pugyu yacucunacamami carca. Chaimantaca Efrón urcupi saquirij llajtacunacamami carca. Shinallataj chai lindeca Baalacamami carca. Baalá llajtataca Quiryat-Jearim nishpapishmi rijsincuna. 10 Chai lindeca Baalá llajtata muyushpaca inti huashicun ladopi saquirij Seír urcucamami chayarca. Chaimantaca janaj ladopi saquirij Jearim urcu quinricamami catirca. Jearim urcutaca Kesalón nishpapishmi rijsincuna. Chai lindeca Bet-Semesta uriyashpa Timnacamami catirca. 11 Chai lindeca janaj lado Ecrón quinricamami carca. Shinallataj Sikerón lugarmantaca Baalá urcucamami catirca. Chaimantaca Jabneel lugarcamami chayarca. Chai lindeca mama cuchacamami carca.
12 Inti huashicun ladoman caj lindeca Jatun mama cucha* urimi carca. Chai lindecunami Judapaj huahua huahuacunamanta cada familiapaj allpa muyundijta carca.
13 Josueca Jehová Dios mandashcata uyashpami Jefunepaj churi Calebmanca Judapaj huahua huahuacunapurapi shuj allpata curca. Chai allpaca: Quiryat-Arbami carca, Quiryat-Arbataca Hebrón nishpapishmi rijsincuna. (Arbá runaca Anacpaj yayami carca). 14 Chai allpamantaca Calebca Anacpaj huahua huahuacunamanta quimsa churicunatami llujshichishpa cacharca. Paicunaca: Sesái, Ahimán, Talmaimi carca. 15 Chaimantaca Calebca Debir llajtapi causajcunahuan macanacungapajmi llujshirca. (Debir llajtataca ñaupaca Quiryat-Séfer nishpami rijsijcuna carca). 16 Calebca: “Maijan runa Quiryat-Séfer llajtata macanacushpa, mishashpa japijmanca ñuca ushushi Acsá shutitami paipaj huarmi cachun cusha” nircami. 17 Calebpaj huauqui Quenazpaj churi Otnielmi chai llajtata mishashpa japirca. Chaimi Calebca paipaj ushushi Acsataca paipaj huarmi cachun curca. 18 Paicuna huasiman ña ricushpami Acsá huarmica paipaj yaya Calebta shuj allpata mañachun paipaj cusa Otnielta rogarca. Chaimi Acsá huarmica pai tiyarishpa ricushca burromanta uriyarca.* Chaipimi Calebca: “¿Imatataj ningui?” nishpa tapurca. 19 Chashna nijpimi paica: “Ñucaman shuj regalota cuhuai. Ura ladopica* ñami shuj allpata curcangui. Pero Gulot-Maim* llajtatapish cuhuai” nirca. Chaimantami Calebca Gulot Altotapish, Gulot Bajotapish paiman curca.
20 Judapaj familiamanta cada familia chasquina herenciaca caicunami.
21 Ura ladoman Edom llajta lindecunapi Judapaj familia japishca llajtacunaca caicunami carca: Cabzeel, Éder, Jagur, 22 Quiná, Dimoná, Adadá, 23 Quedes, Hazor, Itnán, 24 Zif, Télem, Bealot, 25 Hazor-Hadatá, Queriyot-Hezrón llajtacunami carca. (Queriyot-Hezrontaca Hazor nishpapishmi rijsincuna). 26 Shinallataj Amam, Sema, Moladá, 27 Hazar-Gadá, Hesmón, Bet-Pélet, 28 Hazar-Sual, Beer-Seba, Biziotías, 29 Baalá, Iyim, Ézem, 30 Eltolad, Kesil, Hormá, 31 Ziclag, Madmaná, Sansaná, 32 Lebaot, Silhim, Ain, Rimonmi carca. Tucuica 29 llajtacuna, chai uchilla pueblocunandijmi carca.
33 Sefelapi tiyaj llajtacunaca caicunami carca: Estaol, Zorá, Asná, 34 Zanóah, En-Ganim, Tapúah, Enam, 35 Jarmut, Adulam, Socó, Azecá, 36 Saaraim, Aditaim, Guederá, Guederotaimmi* carca. Tucuica 14 llajtacuna, chai uchilla pueblocunandijmi carca.
37 Shinallataj Zenán, Hadasá, Migdal-Gad, 38 Dileán, Mizpé, Jocteel, 39 Lakís, Bozcat, Eglón, 40 Cabón, Lahmam, Kitlís, 41 Guederot, Bet-Dagón, Naamá, Maquedami carca. Tucuica 16 llajtacuna, chai uchilla pueblocunandijmi carca.
42 Shinallataj Libná, Éter, Asán, 43 Iftá, Asná, Nezib, 44 Queilá, Aczib, Maresami carca. Tucuica iscun llajtacuna, chai uchilla pueblocunandijmi carca.
45 Paicuna japishca llajtacunaca Ecrón llajta, chai cꞌuchulla pueblocunandij, chai uchilla pueblocunandijmi carca. 46 Shinallataj Ecrón llajtamanta inti huashicun ladota rishpaca Asdod llajta cꞌuchullapi tiyaj tucui allpacuna, chai uchilla pueblocunandijmi carca.
47 Paicuna japishca llajtacunaca Asdod llajta, chai cꞌuchulla pueblocunandij, chai uchilla pueblocunandijmi carca. Shinallataj Gaza llajta, chai cꞌuchulla pueblocunandij, chai uchilla pueblocunandijmi carca. Chai llajtaca Egipto pugru pambacama, Jatun mama cucha uricunacamami carca.
48 Urcucunapi saquirij llajtacunaca Samir, Jatir, Socó, 49 Daná, Quiryat-Sanami carca. (Quiryat-Sanataca Debir nishpapishmi rijsincuna). 50 Shinallataj Anab, Estemó, Anim, 51 Gosén, Holón, Guilonmi carca. Tucuica 11 llajtacuna, chai uchilla pueblocunandijmi carca.
52 Shinallataj Arab, Dumá, Esán, 53 Janim, Bet-Tapúah, Afecá, 54 Humtá, Quiryat-Arbá, Ziormi carca. (Quiryat-Arbataca Hebrón nishpapishmi rijsincuna). Tucuica iscun llajtacuna, chai uchilla pueblocunandijmi carca.
55 Shinallataj Maón, Carmelo, Zif, Jutá, 56 Jezreel, Jocdeam, Zanóah, 57 Cayín, Guibeá, Timnami carca. Tucuica chunga llajtacuna, chai uchilla pueblocunandijmi carca.
58 Halhul, Bet-Zur, Guedor, 59 Maarat, Bet-Anot, Elteconmi carca. Tucuica sujta llajtacuna, chai uchilla pueblocunandijmi carca.
60 Quiryat-Baal llajta, Rabá llajtami carca. (Quiryat-Baaltaca Quiryat-Jearim nishpapishmi rijsincuna). Tucuica ishqui llajtacuna, chai uchilla pueblocunandijmi carca.
61 Chaquishca pambapi tiyaj llajtacunaca Bet-Arabá, Midín, Secacá, 62 Nibsán, Cachi Llajta, En-Guedimi carca. Tucuica sujta llajtacuna, chai uchilla pueblocunandijmi carca.
63 Jebuseocunaca Jerusalenpimi causacurcacuna. Judapaj familiamanta runacunaca paicunataca mana llujshichishpa cachai tucurcacunachu. Chaimantami jebuseocunaca Judamanta gentecunahuan Jerusalenpi cunan punllacama causashpa catincuna.