Números

31 Chai qꞌuipami Jehová Diosca Moisestaca cashna nirca: 2 “Madianitacunataca israelitacunata ima shina llaquichishca shinallataj llaquichi. Chai qꞌuipami canca huañungui”* nircami.

3 Chaimi Moisesca israelitacunataca cashna nirca: “Madianitacunapaj contra macanacuchun cancunapuramanta huaquin runacunata allichichij. Madianitacunataca Jehová Diosmi llaquichinga. 4 Israelitacunapaj cada familiamantaca 1.000 runacunatami macanacuiman cachana canguichij” nircami. 5 Shinaca huaranga huaranga israelitacunamantaca 12.000 runacunatami macanacuiman richun allichircacuna. Cada familiamantami 1.000 runacunata allichircacuna.

6 Chaimi Moisesca chai runacunataca macanacuiman cacharca. Cada familiamantami 1.000 runacunata Eleazarpaj churi Finehás runahuan cacharca. Sacerdote Finehasca soldadocunahuanmi rirca. Paica Diospajlla chꞌicanyachishca cosascunata apashca, señalcunata cungapaj tocana trompetacunata apashcami rirca. 7 Paicunaca Jehová Dios Moisesman mandashca shinami madianitacunahuan macanacurcacuna. Tucui cꞌaricunatami huañuchircacuna. 8 Chai runacunata huañuchishca jahuapish madianitacunapaj reycunatami huañuchircacuna. Madianitacunapaj pichca reycunaca Eví, Réquem, Zur, Hur, Reba shuticunami carca. Shinallataj Beorpaj churi Balaamtami espadahuan huañuchircacuna. 9 Pero israelitacunaca Madianmanta uchilla huahuacunata, huarmicunataca prezumi aparcacuna. Shinallataj paicunapaj charina tucui animalcunahuan, huagracunahuan, shujtaj cosascunahuanpishmi saquirircacuna. 10 Madianitacuna maipi causacushca tucui llajtacunata, paicunapaj tucui carpa huasicunatami rupachircacuna. 11 Shinallataj tucui imalla quichushcatami aparcacuna. Gentecunatapish, animalcunatapishmi aparcacuna. 12 Qꞌuipaca prezu japishcacunatapish, tucui imalla quichushcatapish Moisespajman, sacerdote Eleazarpajman, tucui israelitacunapajmanmi aparcacuna. Paicunaca Moab chaquishca pambapimi carpa huasicunapi carcacuna. Chai chaquishca pambaca Jordán jatun yacu cꞌuchupi, Jericó llajta chꞌimbapurapimi carca.

13 Moisespish, sacerdote Eleazarpish, israelitacunata tucui pushajcunapishmi carpa huasicuna canllapi paicunata tupanaman llujshircacuna. 14 Pero Moisesca soldadocunata pushajcunahuanca achcatami pꞌiñarirca. 1.000 soldadocunata pushajcunahuan, 100 soldadocunata pushajcunahuanmi achcata pꞌiñarirca. Chai pushajcunaca macanacuimantami tigramurcacuna. 15 Moisesca paicunataca cashnami nirca: “¿Ima nishpataj huarmicunataca mana huañuchircanguichij? 16 ¡Ricuichij! Chai huarmicunami Balaam mandashcata catishpa Peor nishcapi yanga diosta adorachun inquitashpa israelitacunataca Jehová Diosmanta caruyachircacuna. Shinallataj paicunapaj culpamantami Jehová Diospaj puebloca huañuchij ungüihuan llaquichishca carca. 17 Shinaca tucui cꞌari huahuacunata, cꞌarihuan chayarishca tucui huarmicunatami huañuchina canguichij. 18 Pero cꞌarihuan mana chayarishca tucui joven huarmicunataca causashpa catichun saquichijlla. 19 Cancunaca carpa huasicuna canllamanmi canchis punllacunata saquirina canguichij. Maijan runata huañuchijpish, shuj huañushca cuerpota tuparijpish tercer punllapi, séptimo punllapimi chuyayarina can. Cancunapish, cancuna prezu apamushcacunapishmi chuyayarina canguichij. 20 Tucui ropata, carahuan rurashca tucui cosascunata, chivo millmahuan rurashca tucui cosascunata, maderahuan rurashca tucui cosascunatapishmi chuyayachina canguichij” nircami.

21 Chai qꞌuipami sacerdote Eleazarca macanacuiman rishca soldadocunataca cashna nirca: “Jehová Dios Moisesman mandashca leyca caimi can: 22 ‘Orollata, cullquillata, cobrellata, fierrollata, estañollata, plomollatami 23 ninapi rupachina canguichij. Chashnami chaicunaca chuya saquiringa. Ninapi mana yacuyajcunallatami ninapi rupachina canguichij. Chashna jahuapish chaicunataca chuyayachina yacuhuanmi chuyayachina canguichij. Ninapi rupashpa yacuyajllataca yacuhuanmi maillana canguichij. 24 Séptimo punllapica cancunapaj ropatami tajshana canguichij. Chashnami chuya saquiringuichij. Qꞌuipaca carpa huasicuna maipi cashcamanmi yaicui tucunguichij’” nircami.

25 Chai qꞌuipami Jehová Diosca Moisestaca cashna nirca: 26 “Tucui quichushpa apamushcacunamantaca shuj inventariota* rurai. Gentecunamantapish, animalcunamantapish shuj inventariota rurai. Chaitaca sacerdote Eleazarhuan, yayacunapaj familiacunata pushajcunahuan rurai. 27 Quichumushcacunataca ishqui partepi chaupi. Shuj parteca macanacuiman rij runacunapajmi canga, caishuj parteca tucui israelitacunapajmi canga. 28 Macanacuiman rij soldadocunataca paicuna quichumushcacunamanta impuestota shina Jehová Diosman cuchunmi mañana cangui. Cada 500 gentecunamanta shujta, huagracunamanta shujta, burrocunamanta shujta, ovejacunamanta shujtami mañana cangui. 29 Chaitaca paicunaman cushca chaupimanta japishpami sacerdote Eleazarman cuna cangui. Chaica Jehová Diospaj shuj ofrenda shinami canga. 30 Israelitacunaman cushca chaupimantaca cada 50 gentecunamanta shujta, huagracunamanta shujta, burrocunamanta shujta, ovejacunamanta shujta, tucui shujtaj charina animalcunamantapish shujta japishpami levitacunaman cuna cangui. Paicunaca Jehová Diospaj carpa huasipimi trabajocunata rurancuna” nircami.

31 Chaimi Moisespish, sacerdote Eleazarpish Jehová Dios Moisesman mandashca shinallataj rurarcacuna. 32 Macanacuiman rij gentecuna quichushpa apamushcamanta saquirishcaca 675.000 ovejacunami carca. 33 Shinallataj 72.000 huagracunami carca. 34 Chashnallataj 61.000 burrocunami carca. 35 Cꞌarihuan manaraj chayarishca huarmicunaca 32.000 huarmicunami carca. 36 Macanacuiman rijcunaman chaupishpa cushca ovejacunaca 337.500 ovejacunami carca. 37 Jehová Diospaj chꞌicanyachishca impuestoca 675 ovejacunami carca. 38 Shinallataj 36.000 huagracunami carca. Chaicunamanta Jehová Diospaj chꞌicanyachishca impuestoca 72 huagracunami carca. 39 Shinallataj 30.500 burrocunami carca. Chaicunamanta Jehová Diospaj chꞌicanyachishca impuestoca 61 burrocunami carca. 40 Shinallataj 16.000 gentecunami carca. Chai gentecunamanta Jehová Diospaj chꞌicanyachishca impuestoca 32 gentecunami carca. 41 Chai impuestotami Moisesca sacerdote Eleazarman curca. Chaica Jehová Diospaj shuj ofrenda shinami carca. Moisesca Jehová Dios paiman mandashca shinami rurarca.

42 Moisesca macanacuiman rijcuna mishashpa quichumushcacunataca ishqui partepimi chaupirca. Shuj partetaca israelitacunamanmi curca. Israelitacunaman chaupishpa cushcaca caicunami carca. 43 Paicunaman chaupishpa cushca ovejacunaca 337.500 ovejacunami carca. 44 Paicunaman chaupishpa cushca huagracunaca 36.000 huagracunami carca. 45 Paicunaman chaupishpa cushca burrocunaca 30.500 burrocunami carca. 46 Paicunaman chaupishpa cushca gentecunaca 16.000 gentecunami carca. 47 Chashnami Moisesca israelitacunaman chaupishpa cushcataca cada 50 gentecunamanta shujta, cada 50 animalcunamanta shujta japishpa levitacunaman curca. Paicunaca Jehová Diospaj carpa huasipimi trabajocunata rurajcuna carca. Moisesca Jehová Dios paiman mandashca shinami rurarca.

48 Chai qꞌuipami 1.000 soldadocunata pushajcunapish, 100 soldadocunata pushajcunapish Moisespajman cꞌuchuyashpa 49 Moisestaca cashna nircacuna: “Canta sirvijcunaca ñucanchij mandachun churashca soldadocunatami cuentashcanchij. Paicunamantaca shujllapish mana faltanchu. 50 Shinaca cada uno imata japimushcata Jehová Diosman ofrendata shina cuchun saquipai. Orohuan rurashca cosascunata, chaquipi churarina uchilla cadenacunata, brazaletecunata, sellota churana anillocunata, aretecunata, shujtaj joyacunatapish paiman cuchun saquipai. Chashnami Jehová Diospaj ñaupajpica ñucanchij juchamanta perdonashca cashun” nircacunami.

51 Chaimi Moisespish, sacerdote Eleazarpish paicuna cushca orota, tucui joyacunata chasquircacuna. 52 Mil soldadocunata pushajcunapish, cien soldadocunata pushajcunapish ofrendata shina Jehová Diosman cushca tucui oroca 16.750 siclomi* carca. 53 Macanacuiman rij cada soldadomi imalla tiyashcacunata quichumushca carca. 54 Moisespish, sacerdote Eleazarpish 1.000 soldadocunata pushajcuna, 100 soldadocunata pushajcuna cushca orotaca tandanacuna carpa huasi ucumanmi aparcacuna. Chai oroca israelitacuna Jehová Dios ima shina ayudashcata yuyarichunmi carca.*