2 Crónicas
29 Ezequiasca 25 huatacunata charishpami rey tucurca. Paica 29 huatacunatami Jerusalenpi mandarca. Paipaj mamaca Zacariaspaj ushushi Abías shutimi carca. 2 Ezequiasca paipaj ñaupa yaya David rurashca shinami Jehová Diospaj ñaupajpica allicunata ruraj carca. 3 Ezequiasca pai mandacushca punta huatapaj punta quillapimi Jehová Diospaj huasi pungucunataca pascashpa allichirca. 4 Qꞌuipaca sacerdotecunata, levitacunata pushamushpami inti llujshin ladopi caj plazapi tandachirca. 5 Chashna tandachishpaca paicunamanca Ezequiasca cashnami nirca: “Levitacuna, caita uyaichij. Cunanca cancunaca chuyayarishpa jucha illaj tucuichij. Cancunapaj ñaupa yayacunapaj Jehová Diospaj huasitapish chuyayachichij. Shinallataj Diospajlla chꞌicanyachishca lugarpi tiyaj millanana dioscunatapish anchuchichij. 6 Ñucanchij ñaupa yayacunaca ñucanchij Jehová Diospaj ñaupajpica mana allicunata rurashpami paita mana cazurcacuna. Paicunaca Diosta saquishpami paimanta caruyarcacuna. Jehová Diospaj carpa huasitapish mana respetarcacunachu. 7 Shinallataj paicunaca Diospaj huasiman yaicuna corredorpi caj pungucunatami huichcarcacuna. Lamparacunatapishmi huañuchircacuna. Inciensotapish rupachinatami saquircacuna. Diospajlla chꞌicanyachishca lugarpi rupachishca sacrificiocunata israelitacunapaj Diosman cunatapishmi saquircacuna. 8 Chaimi Jehová Diosca Judapi causajcunahuan, Jerusalenpi causajcunahuan pꞌiñarishpa paicunaman llaquicunata cacharca. Gentecunaca chaita ricushpa, uyashpaca achcatami chujchushpa mancharircacuna. Shinallataj paicunamantami burlarircacuna. Chaitaca cancunapaj ñahuicunallahuantajmi ricunguichij. 9 Chaimantami ñucanchij ñaupa yayacunaca espadahuan huañuchishca carcacuna. Shinallataj ñucanchij churicuna, ushushicuna, huarmicunapish prezu shina apashcami carcacuna. 10 Cunanca ñucaca israelitacunapaj Jehová Dioshuanmi ari ninacunata ñuca shungupi munani. Chashna rurajpimi paica ñucanchijhuan yallitaj pꞌiñarinata saquinga. 11 Ñuca huahuacunalla, cunanca samarina tiempoca mana canchu. Jehová Diosca cancunataca paipaj ñaupajpi cachun, paita sirvichun, sacrificiocunatapish rupachishpa cushnichichunmi cancunataca agllarca” nircami.
12 Chashna nijpimi levitacunaca trabajai callarircacuna. Cohatitacunamantaca Amasaipaj churi Máhat, Azariaspaj churi Joelmi carca. Meraritacunamantaca Abdipaj churi Quis, Jehalelelpaj churi Azariasmi carca. Guersonitacunamantaca Zimapaj churi Joá, Joapaj churi Edenmi carca. 13 Elizafanpaj churicunamantaca Simripish, Jeuelpishmi carca. Asafpaj churicunamantaca Zacariaspish, Mataniaspishmi carca. 14 Hemanpaj churicunamantaca Jehielpish, Simeipishmi carca. Jedutunpaj churicunamantaca Semayapish, Uzielpishmi carca. 15 Paicunapaj huauquicunata tandachishpami chuyayarircacuna. Paicunaca rey mandashca shinami Jehová Diospaj huasita chuyayachingapaj shamurcacuna. Chaitaca reyca Jehová Dios nishca shinami mandarca. 16 Cutin sacerdotecunaca Jehová Diospaj huasita chuyayachingapajmi yaicurcacuna. Chaiman yaicushpaca Jehová Diospaj huasi ucupi yanga dioscunata adorangapaj tiyashca cosascunatami tucuita surcurcacuna. Surcushpaca Jehová Diospaj huasi patiomanmi aparcacuna. Cutin levitacunaca chaimanta llujshichishpami Cedrón pugru pambaman aparcacuna. 17 Chashnami punta quillapaj punta punllapica Diospaj huasita chuyayachi callarircacuna. Chai quillallapitajmi pusaj punllapica Jehová Diospaj huasiman yaicuna corredorman chayarcacuna. Jehová Diospaj huasitapish pusaj punllacunapimi chuyayachircacuna. Chuyayachinataca punta quillapaj 16 punllapimi tucuchircacuna.
18 Qꞌuipamanca paicunaca rey Ezequiaspajman rishpami cashna nircacuna: “Jehová Diospaj huasitaca ñami chuyayachishcanchij. Rupachishca ofrendata cuna altartapish, chaipi tiyaj tucui cosascunatapish, montonashca tandacunata* churana mesatapish, chaipi tiyaj tucui cosascunatapishmi chuyayachishcanchij. 19 Rey Acaz pai mandacushpa Diosta mana cazushpa tucui cosascunata anchuchishcatami chuyayachishpa allichishcanchij. Cunanca Jehová Diospaj altar ñaupajpimi can” nircacunami.
20 Shinallataj rey Ezequiasca utca jatarishpami Jerusalén llajtapi tiyaj pushajcunata tandachirca. Qꞌuipamanca paicunaca Jehová Diospaj huasimanmi huichiyarcacuna. 21 Shinallataj juchamanta ofrendata cungapajmi canchis torocunata, canchis carnerocunata, canchis malta ovejacunata, canchis cꞌari chivocunatapish aparcacuna. Cai ofrendataca gobiernomanta, Diospaj huasipi tucui trabajajcunamanta, Judapi causaj gentecunapaj juchacunamanta cungapajmi aparcacuna. Ezequiasca Aaronpaj huahua huahuacunamanta sacerdotecunamanca Jehová Diospaj altarpi caicunata cuchunmi mandarca. 22 Chashnami torocunata huañuchircacuna. Sacerdotecunaca chai yahuarta tandashpami altar ñaupajpi tsiraparcacuna.* Qꞌuipaca carnerocunatapish huañuchishpami yahuartaca altar ñaupajpi tsiraparcacuna. Shinallataj malta ovejacunatapish huañuchishpami yahuartaca altar ñaupajpi tsiraparcacuna. 23 Chai qꞌuipaca cꞌari chivocunataca juchamanta ofrendata cungapajmi reypaj ñaupajman, tandanacushcacunapaj ñaupajman aparcacuna. Shinallataj paicunapaj jahuapimi maquicunata churarcacuna. 24 Sacerdotecunaca chai cꞌari chivocunata huañuchishpami chai yahuarhuanca altar jahuapi juchamanta ofrendata curcacuna. Chaitaca tucui israelitacunapaj juchacuna perdonashca cachunmi chashna rurarcacuna. Reyllatajmi rupachishca ofrendatapish, juchamanta ofrendatapish tucui Israel llajtapi causajcunamanta cuna cashcata nishca carca.
25 Chaicamaca Ezequiasca levitacunatami Jehová Diospaj huasipi cimbalocunahuan, cuerdata charij instrumentocunahuan, arpacunahuan churarca. Chaitaca David mandashca shina, muscuipi shina ricushcacunata reyman huillaj Gad runa mandashca shina, profeta Natán mandashca shinami rurarca. Chashna rurachunca Jehová Diosllatajmi paipaj profetacunahuan mandashca carca. 26 Chaimi levitacunaca Davidpaj instrumentocunahuan Diospaj huasipi shayacurcacuna. Shinallataj sacerdotecunapish trompetacunahuanmi* chaipi shayacurcacuna.
27 Qꞌuipaca Ezequiasca rupachishca sacrificiocunata altar jahuapi cuchunmi mandarca. Rupachishca ofrendata cui callarijpica Jehová Diospaj cantotami cantai callarircacuna. Shinallataj Israelmanta rey Davidpaj instrumentocunata, trompetacunatami tocai callarircacuna. 28 Chai cantota cantangacama, trompetapi tocashcapish uyaringacamaca tucui chaipi tandanacushca gentecunami adorangapaj cumurircacuna. Chaitaca rupachishca ofrendata tucui cungacamami chashna rurarcacuna. 29 Ofrendata cushca qꞌuipallami reypish, tucui chaipi cajcunapish cumurishpa, cungurishpa Diosta adorarcacuna. 30 Rey Ezequiaspish, pushajcunapish levitacunataca Davidpaj salmocunahuan, Asafpaj salmocunahuan Jehová Diosta alabachunmi mandarcacuna. Asaf runaca muscuipi shina ricushcacunata huillajmi carca. Chaimi Levitacunaca yallitaj cushicuihuan Diosta alabarcacuna. Shinallataj cumurishpa, cungurishpami Diosta adorarcacuna.
31 Chaimi Ezequiasca: “Cunanca cancunaca Jehová Diosta sirvingapajmi chꞌicanyachishca cashcanguichij. Jehová Diospaj huasiman shamuichij, sacrificiocunata cungapaj apamuichij, paita pagui ningapajpish ofrendacunata* apamuichij” nirca. Chaimi tucui tandanacushcacunaca sacrificiocunata cungapaj apamui callarircacuna. Shinallataj pagui ningapajpish ofrendacunatami apamui callarircacuna. Tucui shunguhuan cusha nijcunami rupachishca ofrendacunata cungapaj apamurcacuna. 32 Rupachishca ofrendacunata cungapajmi tucui chaipi cajcunaca 70 torocunata, 100 carnerocunata, 200 malta ovejacunata apamurcacuna. Jehová Diosman rupachishca ofrendata cushcaca caicunami carca. 33 Shinallataj Diospajlla chꞌicanyachishca ofrendacunapajca 600 torocunata, 3.000 ovejacunatami apamurcacuna. 34 Pero rupachishca ofrendacunapaj caj tucui animalcunata lluchungapajca mana achca sacerdotecuna tiyarcachu. Chaimi paicunapaj huauqui levitacunaca tucui animalcunata lluchungacama ayudarcacuna. Paicuna chashna ayudacujpimi sacerdotecunapish chuyayarishpa jucha illaj cai tucurcacuna. Levitacunaca sacerdotecunamantapish yallimi paicunaca chuyayarishca canataca ashtahuan preocuparijcuna carca. 35 Shinallataj rupachishca ofrendacunapish, Dioshuan alli tucungapaj sacrificiocunamanta cushca huirapish achcami tiyarca. Rupachishca ofrendacunata cungapajpish achca vino ofrendacunami tiyarca. Chashnami Jehová Diospaj huasipica cutinllataj Diospajta rurai callarircacuna. 36 Ezequiaspish, tucui chaipi caj gentecunapish Dios paicunata ayudashcamantami paicunaca yallitaj cushicurcacuna. Tucui chai ruraicunaca paicuna mana yuyashcapimi chashna tucurca.