Abdías
1 Tucuita Mandaj Amito Jehová Diosca Edommantami shuj muscuipi shina Abdiasmanca:*
“Jehová Diosmantami shuj huillaita uyashcanchij.
Llajtacunaman huillangapajmi shuj huillajta cachashca. Chai huillajca:
‘Jatarichij, Edomhuan macanacungapaj allichirishunchij’ ninmi” nin.
2 “¡Ricui! Llajtacunapaj chaupipimi cantaca yangallata rurani.
Canca yallitaj pꞌiñashcami cangui.
3 Canca jatun pata rumi jutcucunapi causaj cashpa,
yallitaj jahuaman causaj cashpami,
cambaj umachij jatun tucushca shungupica:
‘¿Pitaj caimantaca uriyachingari?’ ningui.
4 Cambaj causana aguilapaj shina yallitaj jahuaman cajpipish,
cambaj tazinta estrellacunapaj chaupipi churajpipish,
chaimantami cantaca uriyachisha” ninmi Jehová Diosca.
5 “Shuhuacuna canta tuta shuhuanaman shamushpaca,
¿manachu paicuna munashcallata shuhuanmancuna?
Uvacunata cosechajcuna cambajman shamushpaca,
¿manachu can chꞌalashpa catichunca imallatapish saquinmancuna?
(¡Shinapish cantaca, canta pꞌiñajcunami tucui chingachinga!).
6 ¡Aij paicunaca Esautaca tucui layami mashcashcacuna!
¡Paipaj pacashca valishca cosascunatapishmi mashcashcacuna!
7 Cantaca paicunapaj llajtamantami llujshichishpa cachashcacuna.
Tucui canhuan ari ninacujcunapish cantaca umashcami.
Canhuan alli caj cꞌaricunapishmi cantaca mishashcacuna.
Canhuan tandata micujcunapishmi shuj trampata churashcacuna,
shinapish mana cuentata cunguichu”.
8 Jehová Diosca cashnapishmi nin: “Chai punllapica,
¿manachu Edompaj yachaj tucushcacunata,
Esaupaj urcucunamanta alli yuyaiyujcunataca tucuchisha?
9 Aij Temán llajtalla, cambaj tucui macanacujcunami yallitaj mancharingacuna,
Esaupaj urcupi cajcunaca tucuicunami huañuchishca cangacuna.
10 Cambaj huauqui Jacobta yallitaj llaquichishcamantami,
pingachishca cangui.
Shinallataj canca huiñaipajmi chingachishca cangui.
11 Mana rijsishca cajcuna paipaj soldadocunata prezu shina apajpica
canca ricushpallami saquirircangui.
Shujtaj llajtamanta cajcuna puebloman yaicujpi Jerusalenmantapish suertecunata rurajpica
canpish paicuna shinallatajmi rurarcangui.
12 Cambaj huauqui llaquita apacui horaspish mana cushicunachu carcangui.
Judapi caj gentecuna huañui horaspish mana cushicunachu carcangui.
Paicuna llaquihuan cai horaspish mana jatun tucushpa rimanachu carcangui.
13 Paicuna llaquihuan cai horasca ñuca pueblopaj pungucunataca mana yaicunachu carcangui.
Paicuna llaquihuan cai horasca paicunapaj llaquicunamantaca mana cushicunachu carcangui.
Paicuna llaquihuan cai horasca paicunapaj charishca cosascunatapish mana shuhuanachu carcangui.
14 Miticushpa rijcunata huañuchingapajca ñancunapipish mana saquirinachu carcangui.
Paicunapaj llaqui punllapica huañunamanta quishpirishcacunatapish paicunapaj contracunamanca mana entreganachu carcangui.
15 Jehová Diospaj punllaca ñallami chayamucun. Paica tucui llajtacunapaj contrami tucunga.
Diosca can imatami rurarcangui chaillatatajmi ruranga.
Can ima shinami gentecunata tratarcangui, chashnallatajmi cantapish tratanga.
16 Ima shinami ñuca jucha illaj urcupi cancunaca vinota ubyarcanguichij,
chashnallatajmi tucui llajtacunaca ñuca pꞌiñarishcata vinota layallataj siempre ubyacungacuna.
Shinami paicunaca ñuca pꞌiñarishcataca ubyangacuna, millpungacuna.
Paicunaca mana nunca tiyashca layami chingaringacuna.
17 Shinapish quishpirijca Sion urcupimi canga,
cai urcuca jucha illajmi canga,
Jacobpaj huahua huahuacunaca paicunapaj herenciallatatajmi cutin japingacuna.
18 Jacobpaj huahua huahuacunaca nina shinami canga,
Josepaj huahua huahuacunapish nina shinami canga.
Shinapish Esaupaj huahua huahuacunaca ujsha shinami canga.
Paicunami ninata japichishpa tucuchingacuna,
Esaupaj huahua huahuacunamantaca mana pi causashpa catingachu.
Caitaca Jehová Diosllatajmi chashna nin.
19 Négueb llajtatami mishashpa japingacuna. Esaupaj urcutami mishashpa japingacuna,
Sefelá llajtata, filisteocunapaj allpatami mishashpa japingacuna.
Efrainpaj, Samariapaj campocunatami mishashpa japingacuna,
Benjaminpish Galaad llajtatami mishashpa japinga.
20 Chai sinchi pircacunamanta prezu shina apashca
israelitacunaca cananeocunapaj allpamanta Sarepta allpacamami japingacuna.
Shinallataj Jerusalenmanta prezu shina apashcacunaca Sefarad lugarpimi carcacuna. Paicunami Négueb llajtacunata japingacuna.
21 Sion urcumanca quishpichijcunami llujshingacuna.
Chaipimi Esaupaj urcupi cajcunata juzgangacuna,
Jehová Diosmi shuj rey shina mandanga” ninmi.