2 Reyes

5 Naamán runaca Siria llajtata mandaj reypaj soldadocunata mandajmi carca. Paica tucuicuna rijsishca, paipaj amopajpish respetashcami carca. Jehová Diosca paihuanmi Siria llajtapi causajcunataca paicunapaj contracunamanta quishpichishca carca. Naamanca lepra ungüita charishpapish* sinchi macanacuj runami carca. 2 Shuj cutinca siriocuna Israel llajtapi macanacunaman rishpami chaimanta shuj huarmi huahuata prezu aparcacuna. Chai huahuaca Naamanpaj huarmita sirvijmi tucurca. 3 Cai huahuami paipaj patronataca: “¡Ñuca amitopajca Samariapi saquirij profetata ricunaman rinachari alli canman! Paimi cai lepra ungüimantaca alliyachi tucun” nirca. 4 Chaimi paica* reypaj ñaupajman rishpaca israelita huahua ima nishcata parlarca.

5 Chashna nishcata uyashpami Siriamanta reyca Naamantaca: “¡Cunanllataj ri! Israel llajtata mandaj reypajmi shuj cartata cachagrini” nirca. Chashna nijpimi Naamanca chunga talento* cullquitapish, 6.000 siclo orotapish, chunga parada ropacunatapish apashpa rirca. 6 Shinallataj Naamanca Israel llajtata mandajpajmanmi shuj cartata apashpa rirca. Chaipica: “Cai cartatapish, ñucata sirvij Naamantapish lepra ungüimanta jambichunmi cachani” nircami. 7 Israel llajtamanta reyca cartata liyishpaca paipaj churanata lliquirishpami: “¿Ñucaca Dioschu cani pitapish huañuchingapaj o causaihuan saquingapaj? ¡Lepra ungüita charij runata ñuca jambichunmi cachashca! Cancunallatajmari ricucunguichij, paica ñucahuan macanacunatami mashcacun” nirca.

8 Pero Diosta sirvij Eliseoca Israel llajtata mandaj rey paipaj churanata lliquirishcatami yachaj chayarca. Chaimantami chai rato reymanca: “¿Imamantataj cambaj churanata lliquirircangui? Ñucata Naamán ricunaman shamuchun saquihuai. Chashnami Israel llajtapica shuj profeta tiyashcata yachaj chayanga” nichun cacharca. 9 Chaimi Naamanca paipaj caballocunahuan, macanacuna carretacunahuan rishpa Eliseopaj huasi yaicunpi shayarishpa saquirircacuna. 10 Ashtahuanpish Eliseoca shuj huillajtami: “Jordán jatun yacuman rishpa chaipi canchis cutin pambarigri. Chashnami cambaj lepra ungüimanta jambirishpa cambaj aicha carapish sano saquiringa” nishpa huillachun cacharca. 11 Chaita uyashpami Naamanca pꞌiñarishpa cashna nishpa ri callarirca: “Ñucaca, ‘Paica ñucata chasquishpa, paipaj maquita ñuca lepra ungüi jahuapi caiman chaiman cuyuchishpa, paipaj Jehová Diospaj shutita nishpami mañanga’ nishpami yuyarcani. 12 ¿Manachu Damascopi tiyaj Abaná, Farpar jatun yacucunaca Israel llajtapi tiyaj yacucunatapish ashtahuan yalli alli can? ¿Manachu chai yacucunapi pambarishpa ñucaca alliyai tucuni?” nircami. Chashna nishcahuanmi pꞌiñarishpa tigrashpa rircalla.

13 Naamanpaj sirvijcuna paipajman cꞌuchuyashpaca: “Ñuca yayitu, profeta ima sinchita rurachun mandashca cajpica ruranguimanmi carca ¿nachu? Ashtahuancarin paica cantaca ‘Pambarishpa tucui limpio saquiri’ nishcallami” nircacunami. 14 Chaimi Naamanca Diosta sirvij runa nishca shina Jordán jatun yacuman rishpa canchis cutin chaipi pambarirca. Chashna rurajpimi paipaj aichapish shuj huahuapaj aicha shina tucushpa limpio saquirirca.

15 Chai qꞌuipaca tucui paipaj soldadocunahuanmi Diosta sirvij runata cutinllataj ricunaman rirca. Naamanca paipaj ñaupajpi shayarishpami: “Cunanmi yachani shujtaj llajtacunapica Israel llajtapi tiyaj Dios shina mana tiyashcata. Canta sirvij apamushca regalota* chasquipai” nirca. 16 Shinapish Eliseoca: “Causaj Jehová Diospaj shutipimi jurani. Ñucaca paitami sirvini.* Can cushca regalotaca mana japishachu” nishpami cutichirca. Naamán cutin cutin japichun nijpipish paica manataj japircachu. 17 Chaimi Naamanca: “Shinashpaca cai llajtamanta ishqui mula carga allpata apachun saquihuai. Canta sirvijca rupachishca ofrendacunata, sacrificiocunataca shujtaj dioscunaman ña mana cutin cungachu. Jehová Diosllamanmi cunga. 18 Shinapish Jehová Dios canta sirvijtaca caillata perdonachun: Rimón diospaj huasiman ñuca amito rey rishpaca chaipi cunguringapajmi ñuca rigrapi charirashpa cungurin. Chaimi ñucapish Rimón diospaj huasipica cungurini. Rimón diospaj huasipi cungurijpica Jehová Dios ñucata perdonachun” nircami. 19 Chashna nijpimi Eliseoca: “Ama preocuparishpa rilla” nirca. Shina nijpimi Naamanca chaimanta rirca. Naamán chaimanta ña ashata rishca qꞌuipami 20 Diosta sirvij Eliseo runata sirvij Guehazica: “Ñuca amitoca Siria llajtamanta Naamantaca pai apamushcata mana chasquishpami richunlla saquishca. Causaj Jehová Diospaj shutipimi jurani. Ñucaman imallatapish cuchunmi paita catishpa risha” nishpa yuyarca. 21 Chashnami Guehazica Naamanta cati japingapaj callpashpa rirca. Naamanca shuj runa callpashpa shamucujta ricushpami paipaj carretamanta uriyashpa, tupanaman rishpaca: “¿Tucuichu alli?” nishpa tapurca. 22 Chashna tapujpimi Guehazica: “Ari, tucuimi alli. Shinapish ñuca amitoca caitami ninaman cachan: ‘Riqui, Efraín urcucunamantami ñucata ricunaman ishqui jovencuna shamushca. Paicunaca profetacunapaj churicunami can. Paicunaman shuj talento cullquita, ishqui parada ropacunata cushpa mingui tucui’ nin” nirca. 23 Chaimi Naamanca: “Cai ishqui talento cullquita jaica” nirca. Paica cutin cutin japichun nishca qꞌuipami ishqui talento cullquita, ishqui parada ropacunata ishqui sacocunapi churashpa paipaj ishqui sirvijcunaman curca. Cai ishqui sirvijcunami aparishpa Guehazita ñaupashpa rircacuna.

24 Ofelman* chayashpaca chai sirvij runacuna apamushca sacocunatami Guehazica japishpa paipaj huasipi churarca. Chai qꞌuipaca paicunataca tigrachishpami cacharca. Chai runacuna rijpica 25 Guehazica paipaj amito maipi cashcaman yaicushpami paipaj cꞌuchupi tiyarirca. Chaipimi Eliseoca paitaca: “¿Guehazí, maimantataj shamungui?” nishpa tapurca. Chashna tapujpimi paica: “Canta sirvijca maiman mana rishcanichu” nishpa cutichirca. 26 Shinapish Eliseoca: “¿Chai runata catishpa rishcataca mana yachashcatachu yuyangui? ¿Chai runa paipaj carretamanta uriyashpa, canta tupashcatapish mana yachashcatachu yuyangui? ¿Cunanca cullquita, ropata, olivo chagracunata, uva chagracunata, ovejacunata, vacacunata, sirvij cꞌaricunata, sirvij huarmicunata chasquina tiempochu can? 27 Cunanca Naamanpaj lepraca canman, cambaj huahua huahuacunamanmi huiñaipaj pasanga” nircami. Chashna nincami Guehazica Eliseopaj ñaupajmanta llujshirca. Paica ñami lepra ungüihuan carca. Chai lepraca rasu shina yuraj nicujmi carca.