2 Crónicas

30 Ezequiasca tucui Israelpi, Judapi causajcunamanmi huillajcunata cacharca. Efrainpaj, Manasespaj gentecunamanpish cartacunata quillcashpami cacharca. Paicunataca Jerusalenpi caj Jehová Diospaj huasiman shamuchun, chaipi israelitacunapaj Jehová Diospaj Pascua fiestata rurachunmi huillaj cacharca. 2 Reypish, paipaj pushajcunapish, Jerusalenpi tucui tandanacushcacunapishmi Pascua fiestata segundo quillapi ruranata decidircacuna. 3 Tucui sacerdotecuna mana chuyayarishcamanta, Jerusalenpipish tucui gentecuna manaraj tandanacushcamantami paicunaca Pascua fiestata punta quillapica mana rurai tucushcacuna carca. 4 Pascua fiestata rurana decisionca reypajpish, tucui chaipi tandanacushcacunapajpish allimi carca. 5 Chaimi paicunaca tucui Israel llajtapi, Beer-Sebamanta Dancama chaita huillachinata decidircacuna. Gentecuna israelitacunapaj Jehová Diospaj Pascua fiestata Jerusalenpi ruranaman shamuchunmi chashna huillanaman cacharcacuna. Paicunaca Pascua fiestata quillcashcapi nishca shinaca tandanacushpaca mana rurashcacunachu carca.

6 Chaimi huillajcunaca* rey mandashca shina reypaj cartacunahuan, pushajcunapaj cartacunahuan tucui Israel llajtata, tucui Judá llajtata rishpa cashna nircacuna: “Israel llajtapi causaj gentecuna Jehová Diospajman tigraichij. (Paica Abrahanpaj, Isaacpaj, Israelpaj Diosmi can). Chashna rurajpica paipish Asiria llajtamanta reycunapaj maquimanta quishpirijcunapajmanmi tigranga. 7 Cancunapaj ñaupa yayacuna shina, cancunapaj huauquicuna shinaca ama caichijchu. Paicunaca paicunapaj ñaupa yayacunapaj Jehová Diostami mana cazurcacuna. Chaimantami Diosca paicunata tucuchirca. Chashna tucuchishcataca cancunallatajmi ricucunguichij. 8 Cancunapaj ñaupa yayacuna shina ama rumi shungucuna caichijchu. Ashtahuanpish Jehová Diosta cazuichij, paipaj huasiman shamuichij. Paica paipaj huasitaca huiñai huiñaipajmi chuyayachishca. Cancunapaj Jehová Diosta sirvichij. Chaimi paica cancunahuan yallitaj pꞌiñarishca canataca saquinga. 9 Cancuna Jehová Diospajman tigrajpica cancunapaj huauquicunata, cancunapaj huahuacunata prezuta shina charicujcunaca llaquij cashcatami ricuchingacuna. Chashnami prezuta shina charicujcunaca cai allpaman tigrachun paicunataca saquingacuna. Cancunapaj Jehová Diosca alli shungu, llaquij cashcamantami paipajman tigrajpica cancunataca manataj saquinga”* nircacunami.

10 Chai huillajcunaca llajtan llajtanta rishpami tucui Efrainpaj allpapi, Manasespaj allpapi causajcunaman huillarcacuna. Zabulonpaj allpacamami chashna tucui llajtacunata huillashpa rircacuna. Shinapish gentecunaca paicunamanta asishpami burlarircacuna. 11 Shina cajpipish Aserpaj familiamanta, Manasespaj familiamanta, Zabulonpaj familiamanta huaquin gentecunaca humillarishpami Jerusalenman shamurcacuna. 12 Diospaj maqui Judá llajtapi causajcunahuan cashcamantami Diosca paicunata tandachirca. Chashnami rey mandashcatapish, pushajcuna mandashcatapish pajtachi tucurcacuna. Chaitaca Jehová Dios mandashca shinami rurarcacuna.

13 Chaimi segundo quillapica Jerusalenpi achcacuna tandanacushpa Levadura illaj tandata micuna fiestata rurarcacuna. Paicunaca yallitaj achcacunami carca. 14 Jerusalén llajtapi tiyaj tucui altarcunatami anchuchircacuna. Shinallataj tucui inciensota rupachina altarcunatami anchuchircacuna. Chaitaca Cedrón pugru pambapimi shitarcacuna. 15 Shinaca segundo quillapaj 14 punllapica Pascua fiestata rurangapajmi animalcunata huañuchircacuna. Sacerdotecunapish, levitacunapish pinganaihuan cashcamantami chuyayarishpa Jehová Diospaj huasiman rupachishca ofrendacunata apamurcacuna. 16 Diosta sirvij Moisesman cushca leypi nishca shinami sacerdotecunapish, levitacunapish paicuna charishca puestocunallatataj japircacuna. Chai qꞌuipami sacerdotecunaca levitacuna cushca animalcunapaj yahuartaca altar jahuapi tsirapajcuna carca. 17 Shinallataj tandanacushcacunapurapica achcacunami mana chuyayarishcacuna tiyarca. Chaimantami levitacunaca tucui mana chuyayarishcacunamanta Pascua fiestata rurangapaj animalcunata huañuchijcuna carca. Chashnami Jehová Diospaj ñaupajpica tucuicuna chuyayarishca carcacuna. 18 Efrainpaj familiamanta, Manasespaj familiamanta, Isacarpaj familiamanta, Zabulonpaj familiamanta achca runacunami mana chuyayarishcacuna carca. Mana chuyayarishca cashpapish quillcashcapi mandashcata mana cazushpami paicunaca Pascua micuita micurcacuna. Pero Ezequiasca paicunamanta mañashpami cashna nirca: “Jehová Diosca allimari, llaquijmari. 19 Cancunapaj ñaupa yayacunapaj Jehová Diosca paita tucui shunguhuan mashcajcunata llaquishcata ricuchichun. Jucha illaj cangapaj mandashca shina mana chuyayarishcacuna cajpipish llaquij cashcata ricuchichun” nircami. 20 Jehová Diosca Ezequiasta uyashpami tucui chaipi caj gentecunata perdonarca.*

21 Chaimi israelitacunaca Jerusalenpica Levadura illaj tandata micuna fiestata canchis punllacunata achca cushicuihuan rurarcacuna. Levitacunapish, sacerdotecunapish Jehová Diostami alabarcacuna. Paicunaca cada punllami paicunapaj instrumentocunapi sinchita tocashpa Jehová Diosta alabarcacuna. 22 Ashtahuanpish Ezequiasca Jehová Diosta alli yuyaihuan sirvij* tucui levitacunatami animarca.* Paicunaca chai fiestapaj canchis punllacunata micushpa, Dioshuan alli tucungapaj sacrificiocunatapish cushpami paicunapaj ñaupa yayacunapaj Jehová Diosta pagui nircacuna.

23 Shinapish tucui chaipi tandanacushcacunaca shujtaj canchis punllacunata chai fiestata ruranatami decidircacuna. Chaimi chai fiestataca canchis punllacunahuan cushicuihuan rurarcacuna. 24 Judá llajtamanta rey Ezequiasca 1.000 torocunata, 7.000 ovejacunatami chaipi tandanacushcacunaman curca. Shinallataj pushajcunapish 1.000 torocunata, 10.000 ovejacunatami chaipi tandanacushcacunaman curca. Achca sacerdotecunapishmi chaipi chuyayaricurcacuna. 25 Judá llajtamanta tucui tandanacushcacunapish, sacerdotecunapish, levitacunapish, Israelmanta shamuj tucui tandanacushcacunapish, Israel allpapi causaj shujtaj llajtamanta shamushca runacunapish, Judapi causaj shujtaj llajtamanta shamushca runacunapishmi achcata cushicurcacuna. 26 Jerusalenpica yallitaj cushicuimi tiyarca. Israel llajtata mandaj Davidpaj churi rey Salomonpaj punllacunamantaca Jerusalenpica chashna laya cushicuica mana tiyashcachu carca. 27 Chaimantami levitacunapuramanta sacerdotecunaca shayarishpa tucui chaipi tandanacushcacunata bendiciarcacuna. Diosca levitacuna nishcatami uyarca. Paicunapaj mañashcacunaca Diospaj jucha illaj causana jahua pachamanmi chayarca.