Josué

8 Jehová Diosca Josuemanca: “Ama manchaichu, ama chujchuichu. Tucui cambaj soldadocunata pushashpa Hai llajtapi macanacunaman llujshi. Ricui, Hai llajtamanta reytapish, paipaj gentecunatapish, paipaj llajtatapish, paipaj allpatapish canmanmi cushcani. 2 Ima shinami Jericó llajtapish, chai llajtapaj reytapish rurarcangui, chashnallatajmi Hai llajtahuanpish, chai llajtapaj reyhuanpish rurana cangui. Pero quichushca cosascunatapish, huagracunatapish, ovejacunatapish cancunami japi tucunguichij. Shinallataj llaquichingapaj pacalla chapachun Hai llajta huasha ladopi soldadocunata allichingui” nircami.

3 Chaimi Josuepish, paipaj tucui soldadocunapish Hai llajtapaj contra macanacungapaj llujshircacuna. Josueca 30.000 sinchi macanacujcunata agllashpami paicunataca tuta Hai llajtaman cacharca. 4 Josueca cashna nishpami mandarca: “Ricuichij, chai llajtapaj huasha ladopi llaquichingapaj pacalla chapangapaj allichirichij. Chai llajtamantaca ama yallitaj caruyanguichij. Chai llajtahuan macanacungapajca tucuicuna allichirishca caichij. 5 Ñucapish, ñucahuan caj gentecunapish Hai llajtamanmi cꞌuchuyashun. Paicuna ñaupa shina ñucanchijta llaquichinaman llujshijpica ñucanchijca paicunamantami miticushpa rishun. 6 Hai llajtamanta runacuna ñucanchijta catingapaj llujchijpica paicunatami paicunapaj llajtamanta caruyachishun. Chaimi paicunaca: ‘Ñaupa shinami ñucanchijmanta cutin miticushpa ricuncuna’ nishpa yuyangacuna. Shinami ñucanchijca paicunamanta miticushpa rishun. 7 Chaimi cancunaca llaquichingapaj pacalla chapacushcamanta llujshishpa, chai llajtata mishashpa japina canguichij. Ñucanchij Jehová Diosca chai llajtata tucuchichunmi cancunaman cunga. 8 Cancuna chai llajtata japishpaca ninahuan rupachinguichij. Jehová Dios rurachun nishca shinami rurana canguichij. Caitami ñucaca cancunaman mandani” nircami.

9 Josué cachajpimi soldadocunaca llaquichingapaj pacalla chapana lugarman rircacuna. Paicuna chaimanta rishpaca Betel llajtapaj, Hai llajtapaj chaupipimi pacalla chapacurcacuna. Chai miticuna lugarca Hai llajta inti huashicun ladopimi carca. Chai tutaca Josueca chaishuj soldadocunahuanmi pasarca.

10 Cayandij tutamanta utca jatarishca huashaca Josueca soldadocunatami tandachirca. Cashnami paipish, israelitacunata pushajcunapish soldadocunata ñaupashpa Hai llajtaman rircacuna. 11 Josuehuan caj tucui soldadocuna huichiyashpaca Hai llajta chꞌimba ladopimi shayarircacuna. Paicunaca Hai llajta janaj ladopimi carpa huasicunata shayachircacuna. Paicunataca shuj pugru pamballami Hai llajtamantaca chꞌicanyachirca. 12 Chaicamaca Josueca 5.000 cꞌaricunatami Betel llajtapaj, Hai llajtapaj chaupipi llaquichingapaj pacalla chapachun churashca carca. Paicunaca Hai llajta inti huashicun ladopimi carcacuna. 13 Achca soldadocunaca chai llajtapaj janaj ladopimi carcacuna. Cutin caishuj soldadocunaca chai llajtapaj inti huashicun ladopimi carcacuna. Chai tutaca Josueca chaupi pugru pambacamami rirca.

14 Josué ña paicunapajman chayacujta ricushpami Hai llajtamanta reypish, chai llajtamanta runacunapish tutamanta lado jatarishpa utca israelitacunahuan macanacungapaj llujshircacuna. Paicunaca chaquishca pamba chꞌimbamanmi llujshircacuna. Pero Hai llajtamanta reyca chai llajtapaj huasha ladopi llaquichingapaj pacalla chapacuj soldadocuna tiyashcataca mana yacharcachu. 15 Hai llajtamanta runacuna paicunata llaquichi callarijpica Josuepish, tucui israelitacunapish chaquishca pamba ladoman rina ñantami miticushpa rircacuna. 16 Tucui chai llajtapi caj gentecunami israelitacunata catishpa ringapaj tandanacushcacuna carca. Hai llajtamanta runacunaca Josueta catishpa rishcamantami chai llajtamanta caruyarcacuna. 17 Hai llajtamantapish, Betel llajtamantapish israelitacunata catishpa rishcamantami chai llajtacunapica shuj runallapish mana saquirirca. Israelitacunata catishpa rishcamantami chai llajtapaj pungucunatapish pascashcata saquircacuna.

18 Jehová Diosca Josuemanca: “Chai llajtataca cambaj maquipimi cusha. Chaimanta cambaj maquipi charicushca lanzahuan Hai llajta ladota ricuchi” nircami. Chaimi Josueca paipaj maquipi charishca lanzataca Hai llajtapaj ladota ricuchirca. 19 Josué paipaj maquita chutashpa Hai llajta ladota ricuchijpica llaquichingapaj pacalla chapacuj soldadocunaca paicuna tiyacushca lugarmanta jatarishpami chai llajtaman callpashpa rircacuna. Chashnami chai llajtata mishashpa japircacuna. Chai ratomi paicunaca ninahuan chai llajtatapish rupachircacuna.

20 Hai llajtamanta runacuna huashaman tigrashpa ricujpica paicunapaj llajtamantaca jahua pachacama cushni huichiyacujtami ricurcacuna. Chaita ricushpami maita miticushpa ringapajpish fuerzata mana charircacuna. Chaimi chaquishca pambaman miticushpa ricuj israelitacunaca paicunata catijcunapaj contra macanacungapaj tigrarcacuna. 21 Llaquichingapaj pacalla chapacushca soldadocuna Hai llajtata japishcata ricushpa, chai llajtamanta cushni huichiyacujta ricushpami Josuepish, tucui israelitacunapish chai rato tigrarishcahuan Hai llajtamanta runacunata llaquichircacuna. 22 Hai llajtata mishaj israelitacunaca chai llajtamanta llujshishpami caishuj israelitacunahuan tupanacunaman rircacuna. Shuj ladoman, caishuj ladoman caj israelitacunapaj chaupipimi Hai llajtamanta runacunaca saquirircacuna. Israelitacunaca Hai llajtamanta runacunataca tucuicunatami huañuchircacuna. Shujllapish miticushpa richunca mana saquircacunachu. 23 Pero Hai llajtamanta reytaca causajta japishpami Josuepaj ñaupajman aparcacuna.

24 Chai qꞌuipaca israelitacunaca Hai llajta gentecunatami chaquishca pambapi espadacunahuan huañuchircacuna. Chai chaquishca pambapimi Hai llajtamanta runacunaca israelitacunata catishcacuna carca. Chaimi tucui israelitacuna Hai llajtaman tigrashpa chaipi saquirij gentecunataca espadahuan huañuchircacuna. 25 Chai punllapi Hai llajtamanta huañuj gentecunaca cꞌaricunapish, huarmicunapish tucuica 12.000-mi carcacuna. 26 Josueca Hai llajtapi tucui causajcunata tucuchingacamami paipaj maquipi charicushca lanzataca mana uriyachirca. 27 Ashtahuanpish israelitacunaca Josueman Jehová Dios mandashca shinami chai llajtamanta quichushca huagracunahuan, ovejacunahuan, tucui quichushca cosascunahuanpish saquirircacuna.

28 Josueca Hai llajtatami rupachirca. Chashnami huiñai huiñaipaj rumi montonllata saquirca. Chaimantami chai llajtaca cunan punllacama chashna catin. 29 Hai llajtamanta reypaj cuerpotaca shuj caspipimi* chishiyangacama huarcushpa churarca. Inti ña huashicugrijpimi Josueca chai huañushca cuerpotaca caspimanta uriyachichun mandarca. Chai qꞌuipaca chai cuerpotaca chai llajtapaj pungu yaicunpimi shitarcacuna. Huañushca cuerpo jahuapica achca rumicunatami montonashpa churarcacuna. Chaica cunan punllacamami chashna catin.

30 Chai qꞌuipaca Josueca israelitacunapaj Jehová Diospajmi Ebal urcupi shuj altarta shayachirca. 31 Chaitaca Jehová Diosta sirvij Moisés israelitacunaman mandashca shina, Moisesman cushca leyta quillcashca libropi nishca shinami shayachircacuna. Chai Leypica: “Fierromanta ima herramientacunahuan mana pꞌitishca entero rumicunahuan shuj altarta shayachinguichij” nircami. Chai altarpimi rupachishca ofrendacunatapish, Dioshuan alli tucungapaj sacrificiocunatapish Jehová Diosman curcacuna.

32 Israelitacunapaj ñaupajpi Moisés quillcashca Leymantami Josueca shuj copiata chai rumicunapi quillcarca. 33 Tucui israelitacunapish, ancianocunapish, autoridadta charijcunapish, paicunapaj juezcunapish Arcapaj ishqui ladomanmi shayacurcacuna. Paicunaca Jehová Dioshuan ari ninacushca arcata apaj levitacunapuramanta sacerdotecunapaj chꞌimbapurapimi shayacurcacuna. Chaipica shujtaj llajtamanta shamushca runacunapish, israelitacunapishmi carcacuna. Paicunamanta chaupica Guerizim urcu chꞌimba ladopimi carcacuna. Cutin caishuj chaupica Ebal urcu chꞌimba ladopimi carcacuna. Israelitacuna bendiciashca cachunmi chashna carcacuna. (Jehová Diosta sirvij Moisés mandashca shinami carcacuna). 34 Chai qꞌuipaca Josueca Leypi quillcachishcacunatami sinchita liyirca. Leyta quillcashca libropi tiyacuj shinami tucuita liyirca. Leypi quillcachishcacunata cazujcunaca imalla bendicioncunata chasquinata, cutin Leypi quillcachishcacunata mana cazujcunaca imalla maldicioncunata chasquinatami sinchita liyirca. 35 Josueca Moisés mandashcacunataca tucuitami tandanacushca israelitacunapaj ñaupajpi sinchita liyirca. Chaipica huarmicunapish, huahuacunapish, shujtaj llajtamanta shamushca paicunapurapi causaj runacunapishmi* paicunahuan carca.