2 Crónicas
7 Salomón mañashpa tucuchincami jahua pachamanta nina uriyashpa rupachishca ofrendatapish, sacrificiocunatapish tucui rupachirca. Chai huasipica Jehová Diospaj sumaj achijnicujmi jundarca. 2 Jehová Diospaj sumaj achijnicuj Jehová Diospaj huasipi junda cashcamantami sacerdotecunaca Jehová Diospaj huasimanca mana yaicui tucurcacuna. 3 Tucui Israel pueblomi nina uriyamucujta ricurcacuna. Shinallataj huasi jahuapica Jehová Diospaj sumaj achijnicujmi ricurirca. Paicunaca pavimento pambacama cungurishpami cumurircacuna. Chashnami paicunaca “Diosca allimari, paipaj mana tucurij cꞌuyaica huiñai huiñaipajmari” nishpa Jehová Diosta pagui nircacuna.
4 Reypish, tucui pueblopishmi Jehová Diospaj ñaupajpi sacrificiocunata curcacuna. 5 Rey Salomonca 22.000 huagracunata, 120.000 ovejacunatami sacrificiocunata rurangapaj curca. Chashnami reypish, tucui pueblopish Diospaj huasitaca inagurarcacuna.* 6 Sacerdotecunapish paicuna sirvina puestopimi shayacurcacuna. Chashnallatajmi levitacunapish Jehová Diosta cantangapaj paicunapaj instrumentocunahuan carcacuna. (Rey Davidmi cai instrumentocunataca Jehová Diosta pagui ningapaj, “paipaj mana tucurij cꞌuyai huiñai huiñaipaj cashcamanta” cantocunahuan alabangapaj rurashca carca). Tucui israelitacuna shayacujpica sacerdotecunaca trompetacunatami sinchita levitacunapaj ñaupajpi tocajcuna carca.
7 Salomón cobremanta rurashca altarca rupachishca sacrificiocunata, grano ofrendacunata, huirata cungapajpish mana pajtarcachu. Chaimantami rupachishca ofrendacunatapish, Dioshuan alli tucungapaj sacrificiocunamanta huiratapish cungapaj Salomonca Jehová Diospaj huasi ñaupajpi caj patio chaupita chuyayachirca. 8 Chai punllacunapimi Salomonca tucui israelitacunandij canchis punllacunata shuj fiestata rurarca. Chai fiestamanca yallitaj carumantami shamurcacuna. Lebó-Hamatmantapish,* Egipto pugru pambamantapishmi achca gentecuna shamurcacuna. 9 Paicunaca altarta inagurashpaca canchis punllacunatami celebrarcacuna, shinallataj canchis punllacunatami fiestata rurarcacuna. Chaimantami pusaj* punllapica* shuj jatun tandanacuita rurarcacuna. 10 Séptimo quillapaj 23 punllapimi Salomonca tucui gentecunata minchacama nishpa paicunapaj huasiman cacharca. Paicunaca Davidman, Salomonman, paipaj pueblo Israelman Jehová Dios llaquij cashcata ricuchishcamantami achcata cushicushpa, shungupipish contentarishpa rircacuna.
11 Chashnami Salomonca Jehová Diospaj huasitapish, reypaj huasitapish* tucuchirca. Salomonca Jehová Diospaj huasita, paipaj propio huasitapish pai yuyashca shinami tucui alli tucuchirca. 12 Jehová Diosca Salomonmanca tutapi ricurishpami cashna nirca: “Cambaj mañashcataca uyashcanimi. Ñucaca cai huasitaca sacrificiocunata cuna lugar cachunmi agllashcani. 13 Shinallataj jahua pachacuna huichcarishpa mana tamyajpi, saltamontecunata cai allpapi tiyaj plantacunata micuchun mandajpi, mana cashpaca ñuca puebloman millai ungüita cachajpi, 14 ñuca shutita apaj ñuca puebloca humillarishpa mañajpi, ñucata mashcajpi, mana alli ñancunata saquijpica ñucaca jahua pachamantami uyasha. Paicunapaj juchacunatapish perdonasha, paicunapaj allpatapish cutinmi allichisha. 15 Cunanca ñuca ñahuicunaca pascashcami canga, ñuca rinrincunapish cai lugarpi mañashcacunataca siempremi uyanga. 16 Shinallataj ñuca shutita chaipi huiñaipaj jatunyachichunmi cai huasita agllashpa chꞌicanyachishcani. Cai huasitaca siempremi ricusha, siempremi cuidasha.
17 Cambaj yaya David rurashca shinallataj canpish ñuca ñancunapi catijpi, tucui ñuca mandashcacunata rurajpi, ñuca leycunata, ñuca imallata rurachun nishcacunata cazujpica 18 cambaj yaya Davidhuan ari nishca shinallatajmi ñucaca can mandangapaj tiyarinataca churasha. Pi mana cuyuchipajtapishmi rurasha. Davidmanca: ‘Cambaj huahua huahuacunamanta shujmi Israel llajtata mandangapajca siempre tiyanga’ nircanimi. 19 Shinapish cancuna caruyashpa ñuca cushca mandashcacunata, leycunata saquishpa, shujtaj dioscunata sirvishpa paicunapaj ñaupajpi cungurijpica 20 cancunaman cushca ñuca allpamantami israelitacunataca sapimanta surcusha. Ashtahuanpish ñuca shutita jatunyachingapaj shayachishca huasitapish shitashpami saquisha. Israelitacunataca tucui llajtacunamanta gentecuna pꞌiñachun, burlarichunmi saquisha. 21 Cai huasica rumi montonllami saquiringa. Cai huasi cꞌuchuta pasajcunaca tucuicunami mancharishpa ricushpa saquiringacuna. Paicunaca: ‘¿Jehová Diosca imamantashi cai allpatapish, cai huasitapish chashna rurarca?’ nishpami tapungacuna. 22 Chaipica: ‘Paicunaca paicunapaj ñaupa yayacunata Egipto llajtamanta llujshichij Jehová Diostami saquircacuna. Paicunaca shujtaj dioscunata catishpami, paicunapaj ñaupajpi cungurishpa sirvircacuna. Chaimantami paica tucui cai llaquicunata cachashca’ nishpami cutichingacuna” nircami.