Esdras
5 Chai qꞌuipaca profeta Ageopish, Idopaj nieto profeta Zacariaspish Judapi, Jerusalenpi caj judiocunamanmi israelitacunapaj Diospaj shutipi huillarcacuna. Diosca paicunahuanmi carca. 2 Chaipimi Sealtielpaj churi Zorobabelpish, Jehozadacpaj churi Jesuapish Jerusalenpi saquirij Diospaj huasita cutinllataj shayachi callarircacuna. Diospaj profetacunapish paicunatami animashpa catircacuna. 3 Chai punllacunapica Éufrates jatun yacu inti huashicun ladopi mandaj Tatenaipish, Setar-Bozenaipish, paipaj compañerocunapish paicunapajman rishpami: “¿Cai huasita shayachichun, cai trabajota* tucuchichunca pitaj mandarca?” nishpa tapurcacuna. 4 Shinallataj: “¿Cai huasita shayachishpa trabajaj runacunapaj shuticunaca maijantaj can?” nishpami tapurcacuna. 5 Judiocunata pushajcunata* Dios cuidacushcamantami Tatenaipish, caishuj runacunapish mana jarcai tucurcacuna. Pero paicunaca imalla ruracushcatami rey Darioman huillanaman cacharcacuna. Chashnami paicunaca rey Darío shuj cartapi imata cutichingacama shuyana carcacuna.
6 Éufrates jatun yacu inti huashicun ladopi mandaj Tatenaipish, Setar-Bozenaipish, chai llajtacunata qꞌuipa mandaj caishuj compañerocunapishmi rey Dariomanca cartapaj shuj copiata cacharcacuna. 7 Chai cartapica cashna nishpami escribircacuna:
“Rey Darío:
¡Sumaj causaita charingui! 8 Judá provinciapi saquirij jatun Diospaj huasiman rishcatami reymanca huillanchij. Jatun rumicunahuan chai huasita cutin shayachicujtami ricushcanchij. Shinallataj patacunapipish jatun caspicunatami churacuncuna. Chai pueblopi causajcuna tucui shunguhuan sinchita trabajacushcamantami chai trabajoca ashtahuan utca ruraricun. 9 Chaimi judiocunata pushajcunataca: ‘¿Cai huasita shayachichun, cai trabajota tucuchichunca pitaj mandarca?’ nishpa tapurcanchij. 10 Chai obrata ricujcunapaj shuticunata quillcashpa quiquinman yachaj chayachingapajpishmi paicunapaj shuticunata tapurcanchij.
11 Chashna nijpimi paicunaca cashna cutichircacuna: ‘Ñucanchijca jahua pachatapish, cai pachatapish mandaj Diosta sirvijcunami canchij. Achca huatacuna huashamanmi Israel llajtamanta shuj jatun rey shuj huasita rurashpa tucuchirca. Chai huasillatatajmi cutin shayachicunchij. 12 Ñucanchij yayacunaca jahua pacha Diostami pꞌiñachircacuna. Chaimi paica Babiloniata mandaj caldeocunapuramanta* Nabucodonosorpaj maquipi urmachun saquirca. Chai mandajca cai huasita tucuchishpami gentecunatapish Babilonia llajtaman prezu shina aparca. 13 Shinapish Babilonia llajtamanta rey Ciro ña shuj huatata mandacushpaca shuj mandashcatami llujshichirca. Chai mandashcapica Yaya Diospaj huasi urmashcata cutin shayachichunmi mandarca. 14 Shinallataj rey Ciroca Diospaj huasimanta apamushca orohuan, cullquihuan rurashca copacunata, tazoncunata, shujtaj cosascunatapishmi Babiloniapaj dioscunata adorana huasimanta llujshichichun mandarca. Chaicunataca Nabucodonosormi Jerusalenpi caj Diospaj huasimanta apamushca carca. Paica Babiloniapaj dioscunata adorana huasipimi churashca carca. Chai cosascunataca Sesbazar* shuti runamanmi curcacuna. Paitaca rey Ciromi mandaj cachun nombrashca carca. 15 Ciroca paitaca: “Tucui caicunata Jerusalenpi caj Diospaj huasiman apai. Diospaj huasipish maipimi ñaupa shayachishca carca, chaillapitaj cutin shayachishca cachun” nircami. 16 Sesbazar chayashpami Jerusalenpi caj Diospaj huasipica cimientocunata churarca. Chai punllamanta cunancamami shayachishpa caticunchij. Shinapish manaraj tucuchishcanchijchu’ nircacunami.
17 Can reypaj alli cajpica Babiloniapi reypaj achca valij cosascunata huaquichinapi investigachunmi mañanchij. Chashnami rey Ciro Jerusalenpi caj Diospaj huasita cutin shayachichun mandashcata o mana mandashcata ricungui. Shinallataj rey ima decisionta agllashcata huillachunmi roganchij” nircacunami.