2 Crónicas
14 Qꞌuipaca Abiasca huañurcami.* Paitaca Davidpaj Llajtapimi pambarcacuna. Chaimantaca paipaj churi Asami catij rey tucurca. Asá mandai callarijpica chai llajtapica chunga huatacunatami tranquilo causai tiyarca.
2 Asaca paipaj Jehová Diospaj ñaupajpica allita, cashcatami rurarca. 3 Paica shujtaj llajtamanta dioscunapaj altarcunata, adorana lugarcunatami* anchuchirca. Shinallataj adorana pilarcunata, adorana postecunatami* ñutushpa tucuchirca. 4 Judá llajtapi causajcunatapish paicunapaj ñaupa yayacunapaj Jehová Diosta mashcachunmi mandarca. Shinallataj Leytapish, mandamientocunatapish cazuchunmi mandarca. 5 Chashnami tucui Judá llajtapi tiyaj llajtacunapica adorana lugarcunata, inciensota rupachina altarcunatapish tucui anchuchirca. Chaimantami Asá mandacujpica tucui chai llajtapica tranquilo causai tiyarca. 6 Judá llajtapi tranquilo causai tiyashcamantami Asaca chai llajtapica muyundijta pircashca llajtacunata shayachirca. Jehová Dios Asaman tranquilo causaita cushcamantami chai huatacunaca paipaj contra macanacuica mana tiyarca. 7 Asaca Judá llajtapi causajcunataca: “Jacuchij, cai llajtataca muyundijta sinchi pircacunahuan, torrecunahuan, pungucunahuan,* barracunahuan* shayachishunchij. Ñucanchij Jehová Diosta mashcashcamantami cai llajtapi mandashpa catingapaj poderta charinchijraj. Paita mashcashcamantami tranquilo causaitapish tucui ladocunapi charinchij” nircami. Pai shayachishca llajtacunaca tucuimi alli llujshirca.
8 Asaca Judapaj familiamanta 300.000 soldadocunatami charirca. Paicunaca jatun escudocunata, lanzacunatami charircacuna. Cutin Benjaminpaj familiamantaca 280.000 sinchi macanacujcunatami charirca. Paicunaca macanacungapajpish uchilla escudocunata, arcocunatami aparcacuna.
9 Tiempo qꞌuipaca Etiopiamanta Zérah runami Judahuan macanacungapaj 1 millón soldadocunahuan, 300 carretacunahuan shamurca. Zérah runa Maresaman chayajpica 10 Asaca Zerahhuan macanacungapajmi llujshirca. Paicunaca Maresá cꞌuchulla Zefata pugru pambapimi macanacungapaj allichirishca shayarircacuna. 11 Chaimi Asaca paipaj Jehová Diostaca: “Jehová Dioslla, cambajca poderta charijtapish, poderta mana charijtapish ayudanaca mana sinchichu. Ñucanchij Jehová Dioslla, canpimi ñucanchijca confianchij.* Cai tucui gentecunahuan macanacungapajca cambaj shutipimi shamushcanchij, ñucanchijta ayudahuai. Jehová Dioslla, canmi ñucanchij Dios cangui. Cai huañujlla runacuna canta mishachunca amataj saquihuaichu” nishpa rogarca.
12 Chaimi Jehová Diosca Asapaj, Judapaj ñaupajpi etíope soldadocunata misharca. Chashna mishajpimi etíope soldadocunaca miticushpa rircacuna. 13 Asapish, paipaj gentecunapish Guerar lugarcamami paicunataca catircacuna. Jehová Dios paipaj soldadocunahuan macanacushpa mishachijpimi etíope soldadocunaca asha asha huañurcacuna. Chashnami paicunamantaca shujllapish causajca mana saquirirca. Chai qꞌuipaca Judamanta runacunaca quichushca achca cosascunatami aparcacuna. 14 Shinallataj paicunaca Guerar cꞌuchupi caj llajtacunatami macanacushpa misharcacuna. Chai llajtacunapi cajcunaca Jehová Diostami yallitaj mancharcacuna. Chai llajtacunapica achca cosascunami tiyarca. Chaimantami Judá llajtapaj soldadocunaca tucui chai llajtacunapi tiyashcacunata quichushpa aparcacuna. 15 Shinallataj carpa huasipi caj michijcunatami llaquichircacuna. Chashnami paicunaca achca ovejacunahuan, camellocunahuan saquirircacuna. Chai qꞌuipami Jerusalenman tigrarcacuna.