1 Reyes
15 Nebatpaj churi rey Jeroboán 18 huatacunata mandacujpimi Abiyamca Judapi mandai callarirca. 2 Paica Jerusalenpica quimsa huatacunatami mandarca. Paipaj mamaca Abisalompaj nieta Maacá shutimi carca. 3 Abiyamca paipaj yaya rurashca juchacunallatatajmi rurarca. Jehová Diostaca paipaj ñaupa yaya David shinaca mana tucui shunguhuan sirvircachu. 4 Chashnapish Jehová Diosca Davidta llaquishcamantami Jerusalenpi shuj lámpara tiyashpa catichun, Jerusalén ama chingarichun Abiyampaj churita rey cachun churarca. 5 Davidca Jehová Diospaj ñaupajpica allicunatami rurarca. Paipaj tucui causaipimi Diospaj mandashcacunamantaca mana caruyarca. Hititacunapuramanta Urías runata huañuchishpallami mana allita rurarca. 6 Rehoboamca paipaj tucui causaipimi Jeroboanhuan macanacuj carca.
7 Abiyampaj causaipish, pai tucui imalla rurashcapish Judá llajtamanta reycunapaj causaimanta parlaj libropimi quillcashca tiyacun. Abiyamhuanpish, Jeroboanhuanpishmi macanacujcuna carca. 8 Qꞌuipaca Abiyamca huañurcami.* Paitaca Davidpaj Llajtapimi pambarcacuna. Chaimantaca paipaj churi Asami catij rey tucurca.
9 Rey Jeroboán Israel llajtata 20 huatacunata mandacujpimi Asaca Judá llajtapi mandai callarirca. 10 Jerusalenpica 41 huatacunatami mandarca. Paipaj abuelaca Abisalompaj nieta Maacá shutimi carca. 11 Rey Asaca paipaj ñaupa yaya David shinami Jehová Diospaj ñaupajpica allicunata rurarca. 12 Paica templopi huainayaj cꞌaricunatami chai llajtamanta llujshichishpa cacharca. Shinallataj paipaj ñaupa yayacuna rurashca millanana* tucui rurashcalla dioscunatami anchuchirca. 13 Paipaj abuela Maacapish adorana posteta* adorangapajmi shuj millanana rurashcalla diosta rurashca carca. Chaimantami paitaca reina canamanta anchuchirca. Asaca chai millanana rurashcalla diosta urmachishpami Cedrón pugru pambapi rupachirca. 14 Pero adorana lugarcunataca* mana anchuchircachu. Shinapish Asaca paipaj tucui causaipimi* Jehová Diostaca tucui shunguhuan sirvirca. 15 Asaca pai chꞌicanyachishca cosascunata, paipaj yaya chꞌicanyachishca cosascunatami Jehová Diospaj huasiman apamurca. Paica cullquita, orota, shujtaj cosascunatapishmi apamurca.
16 Rey Asahuan, Israelta mandaj rey Baasahuanca siempremi macanacujcuna carca. 17 Israel llajtata mandaj rey Baasaca Judá llajtahuanmi macanacurca. Chashnami paica Judá llajtata mandaj rey Asá mandacushca allpacunaman ama pi llujshichun, ama pi yaicuchun Ramá llajtapica muyundijta pircacunata shayachirca. 18 Chaimantami rey Asaca Jehová Diospaj huasimanta, reypaj huasimanta* achca valij cosascunata huaquichina cuartocunapi saquirishca tucui cullquita, orota apashpa paita sirvijcunaman curca. Chai qꞌuipami rey Asaca Siria llajtata mandaj rey Ben-Hadadman cuchun paita sirvijcunata cacharca. Ben-Hadadca Tabrimonpaj churi, Hezionpaj nietomi carca. Paica Damascopimi causacurca. Rey Asaca Ben-Hadadmanca cashnami nirca: 19 “Canhuan ñucahuanca shuj tratotami* rurarcanchij, cambaj yayapish ñuca yayahuanca shuj tratotami rurarcacuna. Caipimi canmanca cullquitapish, orotapish shuj regalota shina cachani. Cunanca Israel llajtata mandaj rey Baasá ñucamanta caruyachun paihuan tratota rurashcata saqui” nircami. 20 Ben-Hadadca rey Asá nishcata uyashpami Israel llajtapi tiyaj llajtacunata llaquichichun soldadocunata mandajcunata cacharca. Paicunaca Ijón llajtata, Dan llajtata, Abel-Bet-Maacá llajtata, tucui Kinéret llajtata, Neftalipaj tucui allpacunatapishmi japircacuna. 21 Baasá chaita yachaj chayashpaca chai ratomi Ramá llajtapi pircacunata shayachinata saquirca. Paica Tirzapimi causashpa catirca. 22 Rey Asaca Judá llajta tucui gentecunatami tandachirca. Chashna tandachishpami Ramá llajtapi rey Baasá pircacunata shayachingapaj rumicunata, caspicunata tandachishcata apashpa rircacuna. Rey Asaca chaicunahuanmi benjaminitacunapaj allpapi saquirij Gueba llajtata, Mizpá llajtatapish cutin shayachirca.
23 Asapaj causaipish, tucui paipaj poderpish, pai tucui imalla rurashcapish, pai shayachishca* llajtacunapish Judá llajtamanta reycunapaj causaimanta parlaj libropimi quillcashca tiyacun. Pero ña yuyajyajpica paipaj chaquicunapimi ungüi japirca. 24 Chai qꞌuipami Asaca huañurca.* Paitaca paipaj ñaupa yayacunahuanmi paipaj ñaupa yaya Davidpaj Llajtapi pambarcacuna. Chaimantaca paipaj churi Jehosafatmi catij rey tucurca.
25 Judá llajtata rey Asá ishqui huatacunata mandacujpimi Jeroboanpaj churi Nadabca Israelpi mandai callarirca. Paica Israelpica ishqui huatacunatami mandarca. 26 Paica Jehová Diospaj ñaupajpica mana allicunatami rurarca. Paipaj yayapaj ejemplota catishpami paipaj yaya rurashca juchacunallatataj rurarca. Chai juchacunata rurashpami paipaj yayaca israelitacunata juchapi urmachirca. 27 Nadabpish, tucui israelitacunapish Guibetón llajtata llaquichingapajmi cꞌuchuyacurcacuna. Chaipimi Isacarpaj familiamanta caj Ahiyapaj churi Baasaca Nadabpaj contra jatarishpa Guibetonpi paita huañuchirca. Guibetón llajtaca filisteocunapajmi carca. 28 Rey Asá Judá llajtata quimsa huatacunata mandacujpimi Baasaca Nadabta huañuchishpa catij rey tucurca. 29 Pai ña mandai callarishpaca Jeroboanpaj tucui familiatami huañuchirca, shujllapish causashpa catichunca mana saquircachu. Silomanta paita sirvij Ahiyaman Jehová Dios huillachishca shinallatajmi paicunataca huañuchirca. 30 Jeroboán juchata rurashcamanta, israelitacunata pai juchapi urmachishcamanta, israelitacunapaj Jehová Dios yallitaj pꞌiñarishca cashcamantami chashna tucurca. 31 Nadabpaj causaipish, pai tucui imalla rurashcapish Israel llajtamanta reycunapaj causaimanta parlaj libropimi quillcashca tiyacun. 32 Israel llajtata mandaj rey Baasahuan, rey Asahuanca siempremi macanacujcuna carca.
33 Rey Asá Judá llajtata quimsa huatacunata mandacujpimi Ahiyapaj churi Baasaca tucui israelitacunata Tirzapi mandai callarirca. Paica 24 huatacunatami mandarca. 34 Pero Baasaca Jehová Diospaj ñaupajpica mana allicunallatami rurarca. Jeroboanpaj ejemplota catishpami pai rurashca juchacunallatataj rurarca. Chai juchacunata rurashpami Jeroboanca israelitacunata juchapi urmachirca.