1 Reyes
22 Siria llajtahuan Israel llajtahuanca quimsa huatacunatami mana macanacurcacuna. 2 Ña quimsa huata tucujpimi Judá llajtamanta rey Jehosafatca Israel llajtamanta rey Acabta ricunaman uriyarca. 3 Chaimi Israel llajtata mandaj rey Acabca paita sirvijcunataca: “Ramot-Galaad ñucanchijpaj cashcataca yachanguichijmi ¿nachu? Chashnapish Siria llajtata mandajtaca mana quichushcanchijchu” nirca. 4 Chai qꞌuipaca Jehosafattaca: “¿Ramot-Galaadpi macanacunaman ñucahuan ringuichu?” nircami. Chaimi Jehosafatca Israel llajtata mandaj rey Acabtaca: “Ñucaca canhuanmi casha. Ñuca pueblopish cambaj pueblohuanmi canga. Ñuca caballocunapish cambaj caballocunahuanmi canga” nirca.
5 Pero Jehosafatca Israel llajtata mandaj rey Acabtaca: “Puntaca, Jehová Dios ima nishcata tapuhuai” nircami. 6 Chaimi Israel llajtata mandajca casi 400 profetacunata tandachishpaca: “¿Ramot-Galaad llajtahuan macanacunaman rishachu o mana?” nirca. Paicunaca: “Rilla, Jehová Diosca reypaj maquipimi entreganga” nircacunami.
7 Chai qꞌuipami Jehosafatca: “¿Manachu caipica Jehová Diospaj shuj profeta tiyan? Dios ima nishcata yachangapajca paitapish tapushunchij” nirca. 8 Israel llajtata mandaj reyca Jehosafattaca: “Shuj profeta tiyanrajmi. Jehová Dios ima nishcata yachangapajca paitami tapui tucunchij. Pero paica ñucamantaca allicunataca mana nunca huillanchu, mana allicunallatami huillan. Chaimantami paitaca pꞌiñani. Paica Imlá runapaj churi Micayami can” nircami. Pero Jehosafatca: “Reyca mana chashna rimanachu can” nircami.
9 Israel llajtata mandaj reyca palaciopi achca autoridadta charijcunamanta shujta cayashpami: “Utca rishpa Imlapaj churi Micayata pushamugri” nirca. 10 Israel llajtamanta reypish, Judá llajtamanta rey Jehosafatpish Samariaman yaicuna pungupimi shuj trillana pambapi carcacuna. Paicunaca reycuna churarina ropata churarishcami cada uno paicunapaj jatun tiyarinapi tiyacurcacuna. Paicunapaj ñaupajpica tucui profetacunami huillacurcacuna. 11 Chaimantaca Kenaanapaj churi Sedequiasca fierro gachucunata rurashpami: “Jehová Diosca: ‘Cai gachucunahuanmi siriocunataca tucuchingacama llaquichingui’ ninmi” nirca. 12 Tucui caishuj profetacunapishmi chashnallataj huillacurcacuna. Paicunaca: “Ramot-Galaadman huichiyailla, mishanguimi. Jehová Diosca reypaj maquipimi entreganga” nicurcacunami.
13 Micayata pushanaman rij runaca: “Ricui, tucui profetacunami reymanca allicunallata nishca. Canpish paicuna nishca shinallataj allicunallata huillapai” nircami. 14 Pero Micayaca: “Causaj Jehová Diospaj shutipimi jurani. Jehová Dios nishcallatami huillasha” nircami. 15 Chaimantaca Micayaca reypaj ñaupajmanmi rirca. Chaimi reyca: “Micaya, ¿Ramot-Galaad llajtahuan macanacungapaj huichiyashunchu o mana?” nirca. Chai ratomi Micayaca: “Huichiyailla, mishanguimi. Jehová Diosca reypaj maquipimi entreganga” nirca. 16 Chaita uyashpami reyca: “¿Mashna cutintaj Jehová Diospaj shutipi verdad cashcallata huillachun jurachina cani?” nirca. 17 Chaimi Micayaca: “Tucui israelitacunatami michij illajlla ovejacuna shina urcucunapi caita chaita puricujta ricuni. Jehová Diosca: ‘Paicunaca dueñota mana charincunachu. Chaimanta cada uno paicunapaj huasiman tranquilo tigrachunllacuna’ nircami” nirca.
18 Chaimi Israel llajtata mandaj rey Acabca Jehosafattaca: “¿Manachu ñucaca ‘Cai runaca ñucamantaca ima allicunataca mana huillangachu, mana allicunallatami huillanga’ nircani?” nirca.
19 Micayaca cashnami nirca: “Cunanca Jehová Dios nishca shimicunata uyai. Jehová Diostaca paipaj jatun tiyarinapi tiyacujtami ricurcani. Paipaj cꞌuchupipish alli ladoman, lluqui ladoman tucui angelcuna* shayacujtami ricurcani. 20 Chaipimi Jehová Diosca: ‘¿Ramot-Galaadman huichiyashpa chaipi huañuchunca Acabtaca pitaj umangayari?’ nirca. Chaimi shujca caita, caishujca chaita nicurcacuna. 21 Shuj ángel* cꞌuchuyashpa, Jehová Diospaj ñaupajpi shayarishpaca: ‘Ñucami umasha’ nircami. Chaimi Jehová Diosca: ‘¿Ima shinataj umanguiyari?’ nirca. 22 Shina nijpimi chai angelca: ‘Ñuca rishpami paipaj tucui profetacuna llullacunata nichun paicunata pandachisha’ nirca. Chaimi Diosca: ‘Ari, pandachinguimi. Tucuimi alli llujshinga. Rilla chaita ruragri’ nirca. 23 Chaimantami Jehová Diosca tucui cambaj profetacuna llullacunata huillachun shuj ángel pandachichun saquishca. Pero Jehová Diosca shuj llaquita can apana cashcatami huillashca” nircami.
24 Kenaanapaj churi Sedequiasca Micayapajman cꞌuchuyashpami quijadospi huajtarca. Paica: “¿Jehová Diospaj espirituca canhuan parlanaman ringapajchu ñucamanta anchurishca? ¿Maitataj rircari?” nircami. 25 Micayaca: “¡Ricui! Ashtahuan ucujman caj cuartopi pacatucunaman yaicui punllami yachaj chayangui” nishpami cutichirca. 26 Chai huashami Israel llajtata mandajca cashna nirca: “Micayata pushashpa llajtata mandaj Amonman, reypaj churi Joasman entregaichij. 27 Paicunataca: ‘Reyca: “Cai runataca prezupi churaichij. Macanacuipi ñuca mishashpa tigramungacamaca ashalla tandata, ashalla yacuta cunguichij” ninmi’ ninguichij” nircami. 28 Pero Micayaca: “Macanacuipi can mishashpa tigramujpica Jehová Diosca ñucahuanca mana parlashcachu canga” nircami. Shinallataj paica: “Tucui cancuna, tucui gentecuna caitaca yuyaipi charinguichij” nircami.
29 Chaimantaca Israel llajtata mandaj rey Acabpish, Judá llajtata mandaj rey Jehosafatpish Ramot-Galaadmanmi huichiyarcacuna. 30 Israel llajtata mandajca Jehosafattaca: “Ñucaca macanacuiman yaicungapajca shujtaj laya ropatami churarisha. Pero canca rey churarina ropata churaringui” nircami. Chashnami Israel llajtata mandajca shujtaj laya ropata churarishpa macanacuiman yaicurca. 31 Siria llajtata mandajca carretacunata pushajcunata mandaj 32 runacunataca: “Ama pihuan macanacunguichijchu. Uchillacunahuanpish, jatuncunahuanpish ama macanacunguichijchu. Israel llajtata mandajllahuan macanacunguichij” nishpami mandashca carca. 32 Carretacunata pushajcunata mandaj runacuna Jehosafatta ricushpaca: “Paimari Israel llajtata mandaj canga” nircacunami. Chaimantami paita llaquichingapaj cꞌuchuyarcacuna. Cutin Jehosafatca paita ayudachunmi caparirirca. 33 Carretacunata pushajcunata mandaj runacunaca mana Israel llajtata mandaj cashcata cuentata cushpami paita catinata saquircacuna.
34 Shuj runaca huairallapi flechata shitashpami Israel llajtata mandajtaca pechopi fierro churanata churarishca chaupipi chugrichirca. Chaimi Israel llajtata mandajca paipaj carretata pushajtaca: “Macanacuimanta* ñucata llujshichi, ñucataca achcatami chugrichishca” nirca. 35 Chai punllaca macanacuica sinchimi carca. Reytaca siriocunapaj ladota ricuchunmi carretapi shayachishpa charicurcacuna. Paipaj chugrimantaca yahuarca carreta ucupimi urmacurca. Paica chishi ladotami huañurca. 36 Ña inti huashicuna horas shinatami soldadocunapurapica: “¡Tucuicuna cancunapaj llajtaman tigraichij! ¡Tucuicuna cancunapaj allpacunaman tigraichij!” nishpa caparishca uyarirca. 37 Chashnami reyca huañurca. Paitaca Samariaman apamushpami chaipi pambarcacuna. 38 Macanacuna carretataca Samariapi saquirij jatun tanque yacu cꞌuchupimi maillarcacuna. Chaipimi Jehová Dios nishca shinallataj yahuartaca allcucuna lambirca. Huainayaj huarmicunapish chai jatun tanque yacupimi armarcacuna.*
39 Acabpaj causaipish, pai tucui imalla rurashcapish, marfil huasita* shayachishcapish, tucui llajtacunata shayachishcapish Israel llajtamanta reycunapaj causaimanta parlaj libropimi quillcashca tiyacun. 40 Qꞌuipaca Acabca huañurcami. Chaimantaca paipaj churi Ocoziasmi catij rey tucurca.
41 Rey Acab Israel llajtata chuscu huatacunata mandacujpimi Asapaj churi Jehosafatca Judapi mandai callarishca carca. 42 Jehosafatca 35 huatacunata charishpami mandai callarirca. Jerusalenpica 25 huatacunatami mandarca. Paipaj mamaca Silhí runapaj ushushi Azubá shutimi carca. 43 Jehosafatca paipaj yaya Asapaj ejemplotami alli catirca. Chai ñanmantaca mana caruyarcachu. Jehová Diospaj ñaupajpica allicunatami rurarca. Shinapish adorana lugarcunataca* mana anchuchircachu. Chaimantami gentecunaca chaicunapi sacrificiocunata ruranatapish, sacrificiocunata rupachishpa cushnichinatapish mana saquircacuna. 44 Jehosafatca Israel llajtata mandajhuanca mana pꞌiñanacurcachu. 45 Jehosafatpaj causaipish, macanacuicunata mishashcapish, ima laya macanacushcapish Judá llajtamanta reycunapaj causaimanta parlaj libropimi quillcashca tiyacun. 46 Shinallataj templopi huainayaj cꞌaricunatami chai llajtamanta llujshichishpa cacharca. Chai cꞌaricunaca paipaj yaya Asá causacushca punllacunamantami saquirishca carcacuna.
47 Chai punllacunapica Edom llajtapica shuj reyca mana tiyarcachu. Reypaj randica shuj comisariomi mandaj carca.
48 Jehosafatca Ofirpi orota mashcanaman ringapajmi Tarsis barcocunata* rurarca. Pero barcocunaca Ezión-Gueberpi pꞌaquirishcamantami mana rircacuna. 49 Acabpaj churi Ocoziasca Jehosafattaca: “Ñuca sirvijcuna cambaj sirvijcunahuan barcocunapi richun saquihuai” nircami. Pero Jehosafatca mana saquircachu.
50 Qꞌuipaca Jehosafatca huañurcami.* Paitaca paipaj ñaupa yaya Davidpaj Llajtapimi paipaj ñaupa yayacunahuan pambarcacuna. Chai qꞌuipaca paipaj churi Jehorammi catij rey tucurca.
51 Rey Jehosafat Judá llajtata 17 huatacunata mandacujpimi Acabpaj churi Ocoziasca Samaria llajtamanta Israelta mandai callarirca. Paica Israeltaca ishqui huatacunatami mandarca. 52 Ocoziasca Jehová Diospaj ñaupajpica mana allicunatami rurarca. Paica paipaj yayapaj, paipaj mamapaj, Nebatpaj churi Jeroboanpaj ejemplotami catirca. Jeroboanca israelitacunatami juchapi urmachishca carca. 53 Ocoziasca Baal diostami sirvirca. Paipaj ñaupajpimi cumurirca. Chashna rurashpami paipaj yaya shinallataj israelitacunapaj Jehová Diosta pꞌiñachirca.