Deuteronomio
33 Dios verdaderota sirvij Moisesca manaraj huañushpami israelitacunata bendiciarca. 2 Paica cashnami nirca:
“Jehová Diosca Sinaí urcumantami shamurca.
Paipaj pueblotaca Seír urcucunamantami achijyachirca.
Parán urcucunamantami paipaj sumaj achijnicujhuan achijyachirca.
Paihuanca huaranga huaranga jucha illaj angelcunami* carca,
paipaj alli ladopica paipaj macanacujcunami carca.
3 Paica paipaj pueblotaca cꞌuyarcami.
Tucui jucha illajcunaca cambaj maquipimi can.
Paicunaca cambaj chaquipimi tiyacurcacuna,
paicunaca can nishca shimicunatami uyai callarircacuna.
4 (Moisesca shuj mandashcata, shuj leytami curca.
Chaica Jacobpaj tandanacushca huahua huahuacunapajmi can).
5 Israelitacunata pushajcunapish,
Israelpaj tucui familiacunapish tandanacujpimi
Diosca Jesurunpi* rey tucurca.
6 Rubenca causashpa catichun, paica ama huañuchun,
paipaj familiamanta runacunaca ama ashallacuna cachun” nircami.
7 Chai qꞌuipaca Judata bendiciashpaca:
“Jehová Dioslla, Judá ima nishcata uyapai,
paitaca cambaj puebloman tigrachimupai.
Paipaj rigracunaca paipaj cashcatami difindishca,
paipaj contracunahuan macanacuchun paita ayudahuai” nircami.
8 Levimantaca cashnami nirca:
“Cambaj* Tumimpish, cambaj Urimpish canta cazuj runapajmi can,
paitaca Masá nishcapimi pruebapi churarcangui.
Canca Meribá yacucuna cꞌuchupimi paihuan macanacui callarircangui.
9 Levica paipaj yayatapish, paipaj mamatapish mana llaquircachu.
Paipaj huauquicunatapish mana ñuca huauquicunachu nircami,
paipaj huahuacunatapish mana uyarcachu.
Paicunaca can nishcatami cazurcacuna,
canhuan ari nishcatami pajtachircacuna.
10 Paicunaca can imallata rurachun nishcacunata Jacobman yachachichun,
Israelmanpish cambaj Leyta yachachichun.
Paicunaca mishquijllata ashnacuj inciensota canman cuchun,
tucui ofrendatapish cambaj altarpi cuchun.
11 Jehová Dioslla, fuerzata cushpa paita bendiciapai,
paipaj maquihuan imata rurashcatapish alli chasquipai.
Paipaj contra jatarijcunataca changacunata* pꞌaqui,
chashnami paita pꞌiñajcunaca cutinca mana jataringa” nircami.
12 Benjaminmantaca:
“Jehová Dios cꞌuyashcaca paipaj cꞌuchullapi imata mana manchashpa causachun.
Tucui punlla paita cuidajpica
paipaj rigracunapimi causanga” nircami.
13 Josemantaca cashnami nirca:
“Jehová Diosca paipaj allpataca
jahua pachamanta alli cosascunahuan bendiciachun.
Shulla tamyahuan, allpa ucumanta llujshij pugyu yacucunahuan bendiciachun.
14 Inti pꞌucuchishca alli cosascunahuan,
cada quilla pꞌucuj alli granocunahuan bendiciachun.
15 Ñaupa urcucunapi* tiyashca alli cosascunahuan,
huiñaipaj tiyaj lomacunapi caj alli cosascunahuan bendiciachun.
16 Allpapi tiyaj alli cosascunahuan, allpapi pꞌucushca cosascunahuan bendiciachun.
Zarza yurapi causajpaj ñaupajpi alli ricurichunpish bendiciachun.
Tucui cai bendicioncunaca Josepaj uma jahuapi cachun,
paipaj huauquicunamanta agllashca runapaj coronillapi cachun.
17 Paipaj fuerzaca punta huacharishca huagrapaj fuerza shinami,
paipaj gachucunapish* sacha huagrapaj gachucuna shinami.
Chai gachucunahuanmi pueblocunataca
tucuicunata tandachishpa allpa pacha lindecunacama tꞌanganga.
Paicunaca Efrainmanta huaranga huaranga runacunami,
shinallataj Manasesmanta huaranga huaranga runacunami” nircami.
18 Zabulonmantaca cashnami nirca:
“Zabulonlla, can llujshishpaca cushicui,
Isacarpish cambaj carpa huasicunapi cushicui.
19 Paicunaca gentecunataca urcumanmi cayangacuna.
Chaipimi chasquinalla sacrificiocunata cungacuna.
Paicunaca mama cuchamantami achca cosascunata llujshichingacuna,
arena allpamantapish pacalla tiyacuj valishca cosascunatami llujshichingacuna” nircami.
20 Gadmantaca cashnami nirca:
“Gadpaj allpa lindecunata mirachijca bendiciashca cachun.
Paica shuj león siririj shinami siririn,
rigratapish, uma coronillatapish cutsangapajca listomi can.
21 Paica alli allpatami paipajllataj agllanga,
chaitaca leyta cujmi chꞌicanyachirca.
Pueblota pushajcunaca tandanacungacunami.
Paica Jehová Diospaj shutipimi cashcata ruranga.
Dios imallata rurachun nishcacunatapishmi israelitacunahuan pajtachinga” nircami.
22 Danmantaca:
“Danca shuj huahua león shinami can.
Paica Basanmantami saltanga” nircami.
23 Neftalimantaca:
“Neftalica Jehová Diospaj ñaupajpi alli ricurishcamantami cushilla can,
paitaca achcatami bendiciashca.
Paica inti huashicun ladotapish, ura ladotapish mishashpa japichun” nircami.
24 Asermantaca cashnami nirca:
“Aserca huahuacunahuanmi bendiciashca cashca.
Paipaj huauquicunapaj ñaupajpica alli ricurichun,
paipaj chaquicunatapish aceitepi maillachun.
25 Cambaj pungucunapi churashca jatun aldabacunapish fierromanta, cobremanta rurashcami.
Cambaj tucui causaipimi tranquilo causangui.
26 Jesurunpaj Dios verdadero shinaca pi mana tiyanchu.
Paica canta ayudangapajmi jahua pachamanta shamun,
shuj amo shinami pꞌuyucunapi shamun.
27 Diosca ñaupa punllacunamantami shuj miticuna can.
Huiñaipaj caj paipaj rigracunahuanmi cantaca ayudan.
Cambaj contracunataca cambaj ñaupajmantami llujshichishpa cachanga.
Paica: ‘¡Paicunata tucuchichij!’ ningami.
28 Israelca imata mana manchashpami causanga,
Jacobpaj huahua huahuacunapish
granocuna tiyan, llullu vino tiyan allpapimi paicunalla causangacuna.
Chaipica jahua pachamantami shulla tamya urmanga.
29 ¡Israel, canca cushillami cangui!
¿Pitaj can shina
Jehová Dios quishpichishca pueblo canyari?
Paica jarcaj escudo shina,
shuj jatun espada shinami can.
Cambaj contracunaca cambaj ñaupajpimi cunguringacuna,
paicunataca huashapimi* sarungui” nircami.