1 Reyes
10 Saba llajtamanta reinaca Jehová Diospaj shutimanta Salomón ashtahuan rijsishca cashcatami uyarca. Chaimantami sinchi tapuicunata rurashpa yachaj cashcata ricungapaj shamurca. 2 Jerusalenmanca paita achca ayudajcunahuanmi shamurca. Shinallataj aceite balsamicota, achca orota, sumaj rumicunata camellocunapi apachishcami shamurca. Salomonpaj ñaupajman shamushpami pai ima yuyacushcata* tucuita tapurca. 3 Chaimi Salomonca pai tucui tapushcacunata cutichirca. Reypajca ima mana sinchi carcachu. Tucuitami alli intindichi tucurca.
4 Saba llajtamanta reinaca Salomón alli yachaita charishcata ricushpa, paipaj huasita shayachishcata ricushpa, 5 paipaj mesapi micunacuna tiyacujta ricushpa, paita sirvijcuna ima shina tiyacujta ricushpa, mesapi sirvijcuna ima laya sirvicujta ricushpa, paicuna ima shina churarishcata ricushpa, paipaj copata pasachijcunata ricushpa, Jehová Diospaj huasipi rupachishca sacrificiocunata punllanta pai cujta ricushpami mancharishca saquirirca. 6 Chaimantami reytaca cashna nirca: “Ñuca llajtapi cashpa can imallata rurashcata uyashcapish, can alli yachaj cashcata tucui uyashcapish ciertomari cashca. 7 Shinapish ñucallataj shamushpa ñuca propio ñahuicunahuan ricungacamaca manataj crircanichu. Ñucamanca manamari tucuita huillashcacunachu. Can alli yachaj cashcapish, cambaj achca charishca cosascunapish ñuca uyashcataca maihuan yallimari cashca. 8 ¡Cambaj pueblopish, canta sirvijcunapish cambaj alli yachaita uyangapaj siempre canhuan cashcamantami cushicuncuna! 9 Cambaj Jehová Diosca alabashca cachun. Paica canta cꞌuyashpami Israel llajtata mandachun jatun tiyarinapi tiyachishca. Jehová Diosca Israel llajtataca huiñai huiñaipajmi cꞌuyashca. Chaimantami cashcata rurashpa, allita rurashpa mandachun cantaca rey cachun nombrashca” nircami.
10 Chai qꞌuipami reymanca 120 talento* orota, achca aceite balsamicota, sumaj rumicunatapish curca. Saba llajtamanta reina achca aceite balsamicota rey Salomonman cushca shinaca cutinca pi mana apamurcachu.
11 Ofir llajtamanta orota apamuj Hirampaj achca barcocunaca chai llajtallamantatajmi achca sándalo caspicunata, sumaj rumicunata apamurca. 12 Reyca sándalo caspicunahuanca Jehová Diospaj huasipajpish, reypaj huasipajpishmi* barandacunata rurarca. Shinallataj cantajcunapaj arpacunata, cuerdata charij instrumentocunatami rurarca. Chashna laya sándalo caspicunataca cunancama pi manataj apamushcachu, cutinpish manataj ricurishcachu.
13 Rey Salomonpish Saba llajta reinamanca pai imata munashcata, pai mañashcatami curca. Shinallataj paipaj shungupi yuyarishca shinami shujtaj cosascunatapish curca. Chai qꞌuipami chai huarmica paita sirvijcunandij paipaj llajtaman tigrashpa rirca.
14 Rey Salomonca cada huatami 666 talento orota chasquij carca. 15 Chai jahuapish cꞌatushpa randishpa purijcuna, comerciantecuna, Arabiamanta tucui reycuna, llajtapi mandajcunapishmi impuestocunata apamujcuna carca.
16 Rey Salomonca chagrushca orohuanmi 200 jatun escudocunata rurarca (cada escudomi 600 siclo* orohuan rurashca carca). 17 Shinallataj chagrushca orohuanmi 300 uchilla escudocunata rurarca (cada escudomi quimsa mina* orohuan rurashca carca). Chashna rurashpami rey Salomonca Líbano Bosque nishca Huasipi chaicunataca churarca.
18 Shinallataj rey Salomonca marfilmantami shuj jatun tiyarinata rurarca. Chai tiyarinataca chuyayachishca orohuanmi jahuata churarca. 19 Jatun tiyarinaman huichiyangapajca sujta* gradacunami tiyarca. Chai jahuapica shuj uchilla redondo techo shinami tiyarca. Tiyarina cada ladomanca rigracunata samachinami tiyarca. Rigracunata samachina cada ladopica shuj leonmi shayacurca. 20 Sujta gradacunapica 12 leoncunami shayacurca. Chai sujta gradacunapica cada ladomanmi shuj león shayacurca. Chashna tiyarinataca ni maijan llajtamanta rey mana charircachu.
21 Rey Salomonpaj copacunaca tucuimi oromanta carca. Líbano Bosque nishca Huasipi tiyaj cosascunapish tucuimi oro purohuan rurashca carca. Cullquimanta rurashca cosascunaca mana tiyarcachu. Salomonpaj punllacunapica cullquica imapaj mana valircachu. 22 Rey Salomonca achca Tarsis barcocunatami* Hirampaj achca barcocunahuan tandalla mama cuchapi charirca. Cada quimsa huatami Tarsis barcocunaca orota, cullquita, marfilta, monocunata, pavo realcunata aparishca shamuj carca.
23 Rey Salomonca cai allpapi tiyaj tucui reycunamantaca paimi ashtahuan alli yachaj, achcata charij carca. 24 Salomonpaj shungupica Diosmi alli yachaita churashca carca. Chaimantami tucui llajtamanta gentecunaca chai alli yachaita uyangapaj paita ricunaman shamunata munajcuna carca. 25 Tucuicunami regalocunata apamujcuna carca. Paicunaca cullqui cosascunata, oro cosascunata, ropacunata, macanacunacunata, aceite balsamicota, caballocunata, mulacunatapishmi apamujcuna carca. Chaitaca cada huatami rurajcuna carca.
26 Salomonca carretacunata, caballocunatami ashtahuan mirachishpa catirca. Paica 1.400 carretacunata, 12.000 caballocunatami charirca. Chaicunataca carretacunata shayachina llajtacunapimi churarca. Shinallataj reypaj cꞌuchullapi, Jerusalenpimi churarca.
27 Rey Salomonca Jerusalenpica rumicunata shina yallitaj achca cullquitami tandachirca. Shinallataj Sefelapi tiyaj sicómoro* yuracuna shina yallitaj cedro caspicunatami tandachirca.
28 Salomón charishca caballocunaca Egiptomanta apamushcami carca. Reypaj cꞌatushpa randishpa purijcunami achca caballocunataca* shuj preciollapi randijcuna carca. 29 Egiptomanta apamushca cada carretaca 600 siclo cullquimi valirca. Caballocunapish cada unomi 150 siclo cullqui valirca. Chaicunatami hititacunapaj tucui reycunamanpish, Siria llajtamanta reycunamanpish cꞌatujcuna carca.