Josué
12 Israelitacunaca Jordán jatun yacu inti llujshin ladopi saquirij chai mandajcunatami misharcacuna. Paicunaca chai mandajcunapaj allpacunata mishashpami japircacuna. Chai allpacunaca Arnón pugru pambamanta Hermón urcucamami carca. Inti llujshin ladomanpish tucui Arabá pugru pambatami japircacuna. Cai mandajcunaca caicunami can. 2 Shuj mandajca amorreocunapuramanta Sehón shutimi carca. Paica Hesbón llajtapimi causarca. Paica Aroer llajtatami mandarca. Chai llajtaca Arnón pugru pamba uripimi saquirirca. Shinallataj Arnón chaupi pugru pambamanta callarishpaca Jabocpaj pugru pambapi saquirij allpacunacamami mandarca. Galaad* chaupi llajtatapishmi mandarca. Amonpaj churicunapaj lindero allpacunaca Jabocpaj pugru pambami carca. 3 Shinallataj paica Arabá pugru pamba inti llujshin ladotami mandarca. Paica Kinéret mama cuchamantaca* mar Salado* nishca Arabá mama cuchacamami mandarca. Chai mama cucha ladopi caj Bet-Jesimotta chꞌimbashpa, ura ladoman caj Pisgá quinricunacamapishmi mandarca.
4 Shinallataj paicunaca Basán llajtamanta rey Ogpaj allpacunatami japircacuna. Paica refaimcunapaj familiapuramanta saquirij shujmi carca. Shinallataj paica Astarot llajtapi, Edréi llajtapimi causaj carca. 5 Paica Hermón urcuta, Salecá llajtata, tucui Basán llajtatapishmi mandaj carca. Basán llajtaca guesuritacunapaj, maacatitacunapaj linderocunacamami carca. Shinallataj paica Galaad chaupi llajtamanta Hesbón llajtata mandaj rey Sehonpaj allpacamami mandaj carca.
6 Jehová Diosta sirvij Moisespish, israelitacunapish cai reycunatami mishashpa tucuchirca. Qꞌuipaca Jehová Diosta sirvij Moisesca rubenitacunaman, gaditacunaman, Manasespaj chaupi familiamanmi chai allpacunataca herenciata shina curca.
7 Josuepish, israelitacunapish Jordán jatun yacu inti huashicun ladopi caj allpamantaca achca reycunatami misharcacuna. Líbano pugru pambapi caj Baal-Gadmantaca Halac urcucamami mishashpa japircacuna. Halac urcuca Seír chꞌimbapimi carca. Qꞌuipaca Josueca Israelpaj familiamanta cada familiamanmi allpacunata maipi japina cashcata herenciata shina curca. 8 Cai allpacunaca urcucunapi, Sefelapi, Arabá pugru pambapi, quinricunapi, chaquishca pambapi, Négueb allpapimi carca. Cai allpacunaca hititacunapaj, amorreocunapaj, cananeocunapaj, perizitacunapaj, heveocunapaj, jebuseocunapajmi carca. Paicunaca cai llajtacunapaj reycunatami misharcacuna:
9 Jericó llajtamanta reyta, Betel cꞌuchupi caj Hai llajtamanta reyta,
10 Jerusalén llajtamanta reyta, Hebrón llajtamanta reyta,
11 Jarmut llajtamanta reyta, Lakís llajtamanta reyta,
12 Eglón llajtamanta reyta, Guézer llajtamanta reyta,
13 Debir llajtamanta reyta, Guéder llajtamanta reyta,
14 Hormá llajtamanta reyta, Arad llajtamanta reyta,
15 Libná llajtamanta reyta, Adulam llajtamanta reyta,
16 Maquedá llajtamanta reyta, Betel llajtamanta reyta,
17 Tapúah llajtamanta reyta, Héfer llajtamanta reyta,
18 Afec llajtamanta reyta, Lasarón llajtamanta reyta,
19 Madón llajtamanta reyta, Hazor llajtamanta reyta,
20 Simrón-Merón llajtamanta reyta, Acsaf llajtamanta reyta,
21 Taanac llajtamanta reyta, Meguidó llajtamanta reyta,
22 Quedes llajtamanta reyta, Carmelopi saquirij Jocneam llajtamanta reyta,
23 Dor quinri ladocunapi saquirij Dor llajtamanta reyta, Guilgalpi saquirij Goyim llajtamanta reyta,
24 Tirzá llajtamanta reytami misharcacuna. Tucuica 31 reycunami carca.