1 Reyes
20 Siria llajtata mandaj rey Ben-Hadadca paipaj tucui soldadocunatapish, caishuj 32 reycunatapishmi paicunapaj caballocunandij, carretacunandij tandachirca. Chashna tandachishpami huichiyashpa, Samaria muyundijta shayarishpa chai llajtata llaquichirca. 2 Chai qꞌuipami Ben-Hadadca Israel llajtata mandaj rey Acab maipi cashcaman huillajcunata cacharca. Paicunaca Acabtaca cashnami nircacuna: “Ben-Hadadca caitami nin: 3 ‘Cambaj cullquipish, cambaj oropish ñucapajmi can. Cambaj alli huarmicunapish, cambaj alli churicunapish ñucapajmi can’ ninmi” nircacunami. 4 Israel llajtata mandaj rey Acabca: “Ñuca amito reylla, can nishca shinaca ñucaca cambajmi cani. Tucui ñuca cosascunapish cambajmi can” nircami.
5 Asha tiempo qꞌuipaca chai huillajcuna cutin tigrashpaca cashnami nircacuna: “Ben-Hadadca caitami nin: ‘Ñucaca: “Cambaj cullquita, cambaj orota, cambaj huarmicunata, cambaj churicunataca ñucamanmi cuna cangui” nishpa huillachunmi cacharcani. 6 Pero cayaca cai horas shinatami ñuca sirvijcunata cachasha. Paicunami cambaj huasipi, canta sirvijcunapaj huasicunapipish imalla tiyashcata mashcangacuna. Paicunaca cambaj valishca cosascunata quichushpami apangacuna’ ninmi” nircacunami.
7 Chaimi Israel llajtata mandaj rey Acabca chai llajtamanta tucui pushajcunata* cayashpaca: “Ricuichij. Cai runaca ñucanchijta llaquichina yuyaillami purin. Paica ñami ñuca huarmicunata, ñuca churicunata, ñuca cullquita, ñuca orota cuchun obligarca. Pai mañashcataca mana negarcanichu” nirca. 8 Chaimi tucui pushajcunapish, tucui israelitacunapish: “Paitaca ama cazuichu. Pai mañashcatapish ama cuichu” nircacuna. 9 Shina nijpimi Acabca Ben-Hadad cachashca runacunamanca: “Ñuca amito reytaca: ‘Canta sirvij ñucaca ñaupaman can imata mañashcataca tucuitami cusha. Pero caitaca mana rurai tucunichu’ ninguichij” nirca. Chaimi chai huillaj runacunaca pai ima nishcata huillanaman rircacuna.
10 Ben-Hadadca huillajcunata cutin cachashpaca: “¡Samariataca tucuchishatajmi. Ñuca soldadocunaman maqui junda allpata cungapajllapish mana pajtangachu. Chaita mana rurajpica dioscuna ñucata sinchita castigachun!” nishpa huillachunmi cacharca. 11 Chaimi Israel llajtata mandajca: “Paitaca: ‘Manaraj macanacuita mishashpaca ama ña mishashca laya jatunyarichu’ nichij” nirca. 12 Ben-Hadadpish, caishuj reycunapish paicunapaj carpa huasicunapi tragota ubyacujpimi Ben-Hadadman huillanaman chayarcacuna. Chaimi chai rato paita sirvijcunataca: “¡Macanacuipaj allichirichij!” nirca. Chaimi paicunaca Samaria llajtata llaquichingapaj allichirircacuna.
13 Pero Israel llajtata mandaj rey Acabpajman shuj profeta shamushpaca: “Jehová Diosca: ‘¿Cai achca soldadocunata ricunguichu? Cunanmi paicunataca cambaj maquipi churasha. Chaipimi ñucaca Jehová Dios cashcata yachangui’ ninmi” nircami. 14 Chaimi Acabca: “¿Pitaj macanacungari?” nishpa tapurca. Shina tapujpimi profetaca: “Jehová Diosca: ‘Provinciacunapi mandajcunapaj ayudajcunami macanacungacuna’ ninmi” nishpa cutichirca. Pero Acabca: “¿Pitaj macanacuitaca callarichingari?” nircami. Chaimi profetaca: “¡Canmi callarichingui!” nirca.
15 Chaimi Acabca provinciacunapi mandajcunapaj ayudajcunata yuparca. Paicunaca 232-mi carcacuna. Qꞌuipaca tucui cꞌari israelitacunatami yuparca. Paicunaca 7.000 cꞌaricunami carca. 16 Paicunaca Ben-Hadad paita ayudaj caishuj 32 reycunahuan carpa huasicunapi machacujpimi chaupi punllata llujshircacuna. 17 Provinciacunapi mandajcunata ayudajcunami puntaca llujshircacuna. Chaimi Ben-Hadadca chai rato huillajcunata cacharca. Paicunami: “Samariamanta runacunami llujshishca” nishpa huillarcacuna. 18 Shina huillajpimi Ben-Hadadca: “Alli tucunata mashcashpa shamushca cajpipish causajta japichij. Macanacunaman llujshishca cajpipish causajta japichij” nirca. 19 Shinapish provinciacunapi mandajcunata ayudajcunapish, paicunata caticuj soldadocunapish llajtamanta llujshishpaca 20 cada unomi paicunapaj contracunata huañuchircacuna. Chaimi siriocunaca miticushpa rircacuna. Cutin israelitacunaca paicunata japingapajmi catishpa rircacuna. Shinapish Siria llajtata mandaj rey Ben-Hadadca caballopi purij caishuj runacunandijmi caballopi miticushpa rirca. 21 Israel llajtata mandaj rey llujshishpaca caballocunapi purij contracunata, carretacunapi caj contracunatapishmi llaquichicurca. Siriocunataca achcacunata huañuchishpami misharca.
22 Tiempohuanca profetaca Israel llajtata mandaj reypajman rishpaca: “Ri, allichirishpa sinchi tucugri. Imata ruragrishcatapish alli yuyari. Shamuj huata callaritami Siria llajtata mandaj reyca canta llaquichingapaj huichiyanga” nircami.
23 Siria llajta reyta sirvijcunaca cashnami nircacuna: “Paicunapaj Diosca urcucunapimi causan. Chaimantami ñucanchijtaca misharcacuna. Pero llano pambacunapi macanacushpaca ñucanchijmi mishashun. 24 Shinallataj caita rurai: tucui reycunata macanacuimanta llujshichi. Paicunapaj randica mandajcunata churai. 25 Chai qꞌuipaca macanacuipi pirdishca soldadocuna valillatataj shujtaj soldadocunata tandachi. Caballocunatapish, carretacunatapish chai valillatataj tandachi. Chaimantaca llano pambacunapi paicunahuan macanacushunchij, chaipica mishashuntajmi” nircacunami. Ben-Hadadca paicuna cushca consejota uyashpami chaitataj rurarca.
26 Ben-Hadadca huata callaripimi siriocunata tandachishpa Israel llajtahuan macanacungapaj Afec llajtaman huichiyarca. 27 Israelmanta gentecunapish macanacungapaj tandanacushpa, micunatapish japishpaca siriocunahuan macanacungapajmi llujshircacuna. Israelitacunaca siriocunapaj chꞌimbapurapi carpa huasicunata shayachishpaca ishqui uchilla grupo chivocuna shinallami ricurirca. Cutin siriocunaca tucui chai llajtapimi junda carcacuna. 28 Diosta sirvij runa Israel llajtata mandaj reypajman rishpaca: “Jehová Diosca: ‘Siriocunaca “Jehová Diosca urcucunapimi causan, mana llano pambacunapi causaj Dioschu can” nishcacunami. Chaimantami cai tucui achca soldadocunataca cambaj maquipi churasha. Chaipimi ñucaca Jehová Dios cashcata yachanguichij’ ninmi” nircami.
29 Canchis punllacunatami carpa huasicunapi caishuj chaishuj chꞌimbapura carcacuna. Ña canchis punlla tucujpimi macanacui callarircacuna. Israelitacunaca siriocunata mishashpaca shuj punllallapimi 100.000 soldadocunata huañuchircacuna. 30 Cutin saquirij soldadocunaca Afec llajtaman yaicushpami chaipi miticugrircacuna. Pero chai llajta pircacunaca 27.000 saquirij runacunapaj jahuapimi urmarca. Ben-Hadadpish miticushpami chai llajtaman yaicurca, paica ucujman caj shuj cuartopimi pacatucurca.
31 Chaimi paita sirvijcunaca: “Ricui, Israel llajta reycunaca llaquij* reycuna cashcatami uyashcanchij. Ñucanchij cinturapi racu sacota* pillurishpa, umapipish huascacunata pillurishpa Israel llajtata mandaj reypajman richun saquihuai. Quizás cambaj causaita quishpichingapishchari” nircacuna. 32 Chai qꞌuipami cinturapi racu sacota pillurishpa, umapipish huascacunata pillurishpa Israel llajtata mandaj reypaj ñaupajman rircacuna. Paicunaca: “Canta sirvij Ben-Hadadca: ‘Ñuca causaita quishpichihuai’ ninmi” nircacunami. Shina nijpimi reyca: “¿Paica causacunrajchu? Paica ñuca huauquimari” nirca. 33 Shina nijpimi chai runacunaca chai shimicunata rey shungumanta nicushcata cuentata curcacuna. Chaimantami chai rato paicunaca: “Ari, Ben-Hadadca cambaj huauquimi can” nircacuna. Chaimi reyca: “Richij, paita pushamugrichij” nirca. Chaimantaca Ben-Hadadca rey Acab maipi cashcamanmi rirca. Chaimi Acabca paipaj carretaman huichiyachirca.
34 Ben-Hadadca reytaca: “Ñuca yaya cambaj yayata quichushca llajtacunatami tigrachisha. Canca Samariapi ñuca yaya plazacunata rurashca shinallatajmi Damascopi plazacunata rurai tucungui” nircami.
Acabca: “Cai tratota* ñucahuan rurajpica richun saquishallami” nircami.
Chashnami paihuan tratota rurashpaca richun saquircalla.
35 Chaimantaca Jehová Dios mandajpimi profetacunapaj churicunamanta* shujca paipaj compañerotaca: “Ñucata huajtai” nirca. Pero paipaj compañeroca mana huajtasha nircachu. 36 Chaimi paica: “Jehová Dios nishcata mana cazushcamantami caimanta can rijpica shuj león huañuchinga” nirca. Pai ña chaimanta rijpica shuj león ricurishpami paita huañuchirca.
37 Chai profeta shujtaj runahuan tupashpaca: “Ñucata huajtai” nircami. Chaimi chai runaca huajtashpa, chugrichishpa saquirca.
38 Profeta chaimanta rishpaca ñan cꞌuchullapimi reyta shuyashpa saquirirca. Paita ama rijsichunmi vendacunahuan ñahuita taparirca. 39 Rey chaita pasacujpica profetaca cashna nishpami caparirca: “Canta sirvijca macanacucun chaupimanmi yaicurca. Shuj runa chaimanta llujshishpaca caishuj runata apamushpami ñucataca: ‘Cai runata cuidangui. Pai miticushpa rijpica paipaj causaimantaca cambaj causaihuanmi pagangui, mana cashpaca shuj talento* cullquitami pagangui’ nirca. 40 Canta sirvij caita chaita rurashpa ocupado cajpimi chai runaca chingarirca” nircami. Chaimi Israel llajtata mandajca: “Canllatajmi chaita nishcangui. Chaimi cambaj castigo canga” nirca. 41 Profetaca ratomi ñahuicunamanta vendata anchuchirca. Chaimi Israel llajtata mandajca shuj profeta cashcata cuentata curca. 42 Chai profetaca reytaca: “Jehová Diosca: ‘Huañuchinami canguichij nishca runata cambaj maquimanta cacharishpa cachashcamantaca paipaj causaimantaca cambaj causaihuanmi pagangui. Paipaj pueblomantaca cambaj pueblomi paganga’ ninmi” nircami. 43 Chashna nijpimi Israel llajtata mandajca Samariapi caj paipaj huasiman llaquilla, pꞌiñarishca tigrashpa rirca.