2 Crónicas
13 Rey Jeroboán 18 huatacunata mandacujpimi Abiasca Judapi mandai callarirca. 2 Paica Jerusalenpica quimsa huatacunatami mandarca. Paipaj mamaca Guibeamanta Urielpaj ushushi Micaya shutimi carca. Abiashuanpish, Jeroboanhuanpish macanacujcuna carca.
3 Chaimi Abiasca macanacuimanca 400.000 sinchi macanacujcunahuan, macanacunata alli yachaj* soldadocunahuan rirca. Cutin Jeroboanca Abiaspaj contra macanacungapajca 800.000 sinchi macanacujcunata, macanacunata alli yachajcunatami churarca. 4 Chaimi Abiasca Efraín urcucunapi caj Zemaraim urcu jahuapi shayarishpa cashna nirca: “¡Jeroboanpish, tucui israelitacunapish uyaichij! 5 ¿Israelitacunapaj Jehová Dios Davidta huiñai huiñaita mandachun churashcataca manachu yachanguichij? ¿Manachu Diosca huiñai huiñaipaj ari nishpa* Davidman, paipaj churicunamanpish mandanata curca? 6 Shinapish Nebatpaj churi Jeroboanca Salomonta sirvijmi carca. Salomonca Davidpaj churimi carca. Jeroboanca reypaj contra shayarishpami cꞌariyarca. 7 Paihuanca imata mana ruranata yachajcuna, mana alli runacunami tandanacujcuna carca. Rehoboamca jovenraj, manchaj huambrami carca. Paica macanacungapajpish fuerzata mana charircachu. Chaimi paicunaca Salomonpaj churi Rehoboamta cꞌariyashpa mana cazurcacuna.
8 Cancunaca achcacuna cashcamantami Davidpaj churicunapaj maquipi caj Jehová Diospaj mandanahuan chꞌimbapurangapajca fuerzata charinchijmi nishpa yuyanguichij. Shinallataj Jeroboán rurashca oro bizicunata cancunapaj dioscuna cachun charishcamantami chashna yuyanguichij. 9 ¿Manachu cancunaca Aaronpaj huahua huahuacunamanta Jehová Diospaj sacerdotecunata, levitacunatapish llujshichishpa cacharcanguichij? ¿Manachu cancunaca shujtaj llajtacuna shina cancunapaj propio sacerdotecunata nombrashcanguichij? Shuj malta torohuan, canchis carnerocunahuan maijanpish shamushpaca yanga dioscunapaj sacerdotemi cai tucurca. 10 Cutin ñucanchijpajca Jehová Diosmi ñucanchij Dios can. Paitaca mana saquishcanchijchu. Aaronpaj huahua huahuacunamanta ñucanchij sacerdotecunapish Jehová Diostami sirvicuncuna. Levitacunapish paicunata ayudashpami trabajancuna. 11 Paicunaca cada tutamanta, cada chishimi rupachishca ofrendacunatapish, mishquijllata ashnacuj inciensotapish cushnichishpa Jehová Diosman cuncuna. Montonashca tandacunapish* oro purohuan rurashca mesa jahuapimi can. Shinallataj cada chishimi orohuan rurashca candelerotapish, lamparacunatapish japichincuna. Ñucanchij Jehová Dios imata rurachun nishcatami ñucanchijca pajtachicunchij. Pero cancunaca paitamari saquishcanguichij. 12 ¡Ricuichij! Diosca ñucanchijhuanmari. Paica cancunapaj contra macanacuchunmi sacerdotecunataca trompetapi tocachishpa pushacun. Israelmanta cꞌaricuna, Jehová Diospaj contraca ama macanacuichijchu. Cancunapaj ñaupa yayacunapaj Diostaca mana mishanguichijchu” nircami.
13 Pero Jeroboanca shuj grupo soldadocunataca llaquichingapaj pacalla chapashpa paicunapaj huasha ladomanta shamushpa paicunahuan macanacuchunmi cacharca. Chashnami Jeroboanpaj soldadocunaca Judá llajta soldadocunapaj ñaupajpipish, huasha ladopipish carcacuna. 14 Judá llajtamanta soldadocunaca huasha ladota ricushpaca paicunapaj ñaupaj ladopi caj soldadocunahuan, paicunapaj huasha ladoman caj soldadocunahuanpish macanacuna cashcatami ricurcacuna. Chaimantami Jehová Diosta mañai callarircacuna. Chai ratomi sacerdotecunapish trompetacunapi sinchita tocacurcacuna. 15 Judamanta soldadocunaca macanacuipajmi caparircacuna. Paicuna sinchita caparirijpimi Diosca Jeroboantapish, tucui israelitacunatapish Abiaspaj, Judapaj ñaupajpi misharca. 16 Dios paicunata Judapaj maquipi cushcata ricushpami israelitacunaca miticushpa rircacuna. 17 Abiaspish paihuan caj soldadocunapish achca israelitacunatami huañuchircacuna. Israelitacunamantaca 500.000 macanacunata alli yachaj soldadocunami huañurcacuna. 18 Chashnami Israelmanta soldadocunataca misharcacuna. Pero Judamanta soldadocunaca paicunapaj ñaupa yayacunapaj Jehová Diospi confiashcamantami misharcacuna. 19 Abiasca Jeroboantaca catirashpami cai llajtacunata quichurca: Betel llajtata, chai cꞌuchulla pueblocunandij, Jesaná llajtata, chai cꞌuchulla pueblocunandij, Efrén llajtata, chai cꞌuchulla pueblocunandijmi quichurca. 20 Abías mandacujpica Jeroboanca ña mana ñaupa laya achca poderta charircachu. Jehová Diosca Jeroboantami castigarca. Qꞌuipaca paica huañurcami.
21 Shinapish Abiasca ashtahuan poderyujmi tucurca. Tiempohuanca 14 huarmicunata, 22 churicunata, 16 ushushicunatami charirca. 22 Abiaspaj causaipish, pai imalla rurashcapish, pai nishcacunapish profeta Idopaj quillcashcapimi registrashca tiyacun.