2 Crónicas

25 Amasiasca 25 huatacunata charishpami mandai callarirca. Paica 29 huatacunatami Jerusalenpi mandarca. Paipaj mamaca Jerusalenmanta Jehoadán shuti huarmimi carca. 2 Amasiasca Jehová Diospaj ñaupajpica allicunatami ruraj carca. Pero paica mana tucui shunguhuan Diosta sirvircachu. 3 Amasiasca ña tucuita mandai callarishpaca paita sirvijcunatami huañuchirca. Cai sirvijcunaca paipaj yaya reytami huañuchishca carcacuna. 4 Pero Amasiasca Leypi nishca shina, Moisés quillcashca libropi nishca shinami paita sirvijcunapaj churicunataca mana huañuchirca. Chai Leypimi Jehová Diosca: “Yayacunaca paipaj churicunapaj culpamantaca mana huañunachu can. Churicunapish paicunapaj yayacunapaj culpamantaca mana huañunachu can. Ashtahuanpish cada unomi paicunapaj juchacunamantaca huañuna can” nishpa mandarca.

5 Amasiasca Judapaj familiamanta runacunatami tandachirca. Chashnami Judapaj familiamanta tucui runacunata, Benjaminpaj familiamanta tucui runacunata grupocunapi shayarichun churarca. Paicunataca paicunapaj según cada yayapaj familiapimi shayarichun churarca. Amasiasca chai runacunataca paicunapaj 1.000 gentecunata pushajcunahuan, paicunapaj 100 gentecunata pushajcunahuanmi grupocunapi tandachirca. Amasiasca 20 huatacunata yalli charijcunatami tucuicunata registrarca. Chashna rurashpami 300.000 macanacunata alli yachajcuna* tiyashcata ricurca. Paicunaca macanacungapajmi listo carcacuna. Lanzacunatapish, jatun escudocunatapish alli utilizajcunami carca. 6 Shinallataj Amasiasca Israelmanta 100.000 sinchi macanacuj runacunatami 100 talento* cullquipi contratarca. 7 Shinapish Diosta sirvij shuj runa shamushpaca cashnami nirca: “Ñuca reylla, Jehová Diosca israelitacunahuanca mana canchu. Chaimanta israelita soldadocuna canhuan richunca ama saquichu. Diosca Efraín familiamantaca shujllahuanpish mana canchu. 8 Canlla ri, macanacucushpapish ama manchaichu. Diosca canta ayudangapajmi poderta charin. Can chashna mana rurajpica cambaj contracuna canta mishachunmi paica saquinga” nircami. 9 Chaimi Amasiasca Diosta sirvij runamanca: “Pero ¿israelita soldadocunamanta 100 talento cullquita ñuca cushcataca pitaj tigrachingayari?” nirca. Chashna nijpimi Diosta sirvij runaca: “Jehová Diosca canmanca chaitapish yallimari cunga” nirca. 10 Amasiasca Efrainmanta shamushca soldadocunataca minchacama nishpami paicunapaj huasiman tigrachun mandarca. Chaita rurajpimi paicunaca Judapaj familiamanta runacunahuan yallitaj pꞌiñarircacuna. Chashna pꞌiñarishcami paicunapaj huasiman tigrarcacuna.

11 Amasiasca mana manchashpami Cachi pugru pambaman paipaj soldadocunahuan rirca. Chaipimi Seirmanta 10.000 runacunata huañuchirca. 12 Shinallataj Judapaj familiamanta runacunaca 10.000 runacunatami causajta japishpa jatun pata rumi puntaman pusharcacuna. Chaimanta shitajpimi chai runacunaca pambaman urmashpa tucui ñuturircacuna. 13 Pero Amasiasca paihuan ama macanacunaman richunmi grupo soldadocunataca huasiman tigrachishpa cachashca carca. Chai grupo soldadocunami Judá llajtapi tiyaj llajtacunata llaquichi callarircacuna. Paicunaca Samariamantaca Bet-Horón llajtacamami llaquichircacuna. Shinallataj 3.000 gentecunata huañuchishpami chai llajtamanta achca cosascunata quichushpa aparcacuna.

14 Amasiasca Edom llajtata tucuchishpa tigramushpaca Seirmanta runacunapaj dioscunatami apamurca. Chashnami paipaj dioscuna cachun churarca. Amasiasca chai dioscunapaj ñaupajpimi cunguri callarirca. Sacrificiota rupachishpapishmi cushnichi callarirca. 15 Chaimantami Jehová Diosca Amasiashuanca yallitaj pꞌiñarirca. Paica shuj profetata cachashpami: “¿Canca chai llajtapi causajcunapaj dioscunataca imamantataj adorashpa catingui? ¿Manachu chai llajtamanta dioscunaca cambaj maquimanta paicunapaj gentecunataca mana quishpichi tucurcacuna?” nirca. 16 Profeta parlacujpirajmi reyca: “¿Ñucaman consejota cuchunchu cantaca nombrashcani? ¡Parlanata saqui! ¿Canta huañuchichunchu munangui?” nirca. Chashna nijpimi profetaca parlanata manaraj saquishpa: “Can rurashcalla dioscunata adorashcamanta, ñuca consejotapish mana uyashcamantami Diosca canta tucuchinata decidishca” nirca.

17 Paipaj consejajcunata tapushca qꞌuipaca Judamanta rey Amasiasca Israelmanta rey Jehoasmanmi shuj huillaita cacharca. Jehoasca Jehoacazpaj churimi can. Jehoacazca Jehupaj churimi can. Amasiasca chai huillaipica: “¡Ñucahuan macanacunaman* shamui!” nishpami cacharca. 18 Israelmanta rey Jehoasca Judá llajtamanta rey Amasiasman caita nichunmi mandarca: “Líbano urcucunapi tiyaj casha mana alli qꞌuihuaca, Líbano urcucunapi tiyaj cedro yuramanca: ‘Cambaj ushushitaca ñuca churipaj huarmi cachun cui’ nichunmi cacharca. Pero Líbano urcucunamanta shuj sacha animal shamushpami casha mana alli qꞌuihuataca sarurca. 19 Canca: ‘Ñucaca Edomtami tucuchishcani’* nishcanguimi. Chaimantami cambaj shunguca yallitaj jatun tucushca. Canta jatunyachichunpishmi munangui. Pero cunanca canca cambaj huasipi* saquiri. ¿Canca imamantataj shuj llaquita callarichishpa Judá llajtatapish canhuan llaquipi urmachisha ninguiyari?” nircami.

20 Pero Amasiasca chashna nishcataca mana cazurcachu. Diosca Amasiastapish, paipaj gentecunatapish Edom llajtapi tiyaj dioscunata adorashcamantami paicunapaj contracunapaj maquipi entreganata munarca. 21 Chaimi Israelmanta rey Jehoasca paipajman huichiyarca. Rey Jehoasca Judá llajtamanta rey Amasiashuanmi Bet-Semes llajtapi macanacurcacuna. Bet-Semes llajtaca Judapimi saquirirca. 22 Israel runacunaca Judá runacunatami misharca. Chaimi Judamanta caj soldadocunaca cada uno paicunapaj huasiman* tigrarcacuna. 23 Israelmanta rey Jehoasca* Bet-Semes llajtapimi Judamanta rey Amasiastaca prezu japirca. Amasiasca Jehoaspaj churimi carca. Jehoasca Jehoacazpaj churimi carca. Qꞌuipaca Jehoasmi Amasiastaca Jerusalenman pushamurca. Chaipimi Jehoasca Jerusalenpi tiyaj shuj parte pircata urmachirca. Paica Efraín Pungu nishcamanta Esquina Pungu nishcacamami urmachirca. Urmachishca pircaca 178 metrocunatami* charirca. 24 Shinallataj Diospaj huasimantami orota, cullquita, tucui cosascunatapish Obed-Edom runa cuidacushcata apashpa rirca. Reypaj huasipi tiyaj achca valij cosascunata huaquichina cuartocunamantapishmi orota, cullquita, tucui cosascunatapish aparca. Gentecunatapishmi prezu aparca. Chai qꞌuipaca Samaria llajtamanmi tigrarca.

25 Israelmanta rey Jehoacazpaj churi Jehoás huañushca qꞌuipami Judamanta rey Jehoaspaj churi Amasiasca 15 huatacunahuan causashpa catirca. 26 Amasiaspaj causaimantaca callarimanta tucuringacamami Israel llajtamanta, Judá llajtamanta Reycunapaj Libropi quillcashca tiyacun. 27 Jehová Diosta Amasías sirvinata saquishca punllamantami Jerusalenpica paipaj contra jatarircacuna. Chaimi Amasiasca Lakís llajtaman miticushpa rirca. Pero paitaca Lakís llajtaman catishpa richunmi huaquin runacunata cacharcacuna. Chai llajtapimi paitaca huañuchircacuna. 28 Chai huashaca paitaca caballopimi Judá llajtaman aparcacuna. Chai llajtapimi paipaj ñaupa yayacuna pambashcapi paitapish pambarcacuna.