2 Crónicas
35 Josiasca Jehová Diospajmi Jerusalenpi shuj Pascua fiestata rurarca. Primer quillapaj 14 punllapica Pascua fiestata rurangapajmi animalcunata huañuchircacuna. 2 Sacerdotecunatapish paicuna imata rurana cashcata rurachunmi churarca. Jehová Diospaj huasipi paicunapaj ruranacunata pajtachichunpishmi animarca. 3 Shinallataj Josiasca israelitacunata yachachij Jehová Diospajlla chꞌicanyachishca levitacunataca cashnami nirca: “Israel llajtata mandaj Salomón shayachishca huasipi jucha illaj Arcata churaichij. Paica Davidpaj churimi can. Cai Arcataca cancunapaj rigra jahuapica mana apanachu canguichij. Cunanca cancunapaj Jehová Diostapish, paipaj pueblo Israeltapish sirvichij. 4 Israelmanta rey Davidpish, paipaj churi Salomonpish quillcashca shina cancunapaj yayacunapaj familiacunapi, cancunapaj grupocunapi sirvingapaj allichirichij. 5 Diospajlla chꞌicanyachishca lugarpi, cancunapaj grupocunapi shayarichij. Chashnami gentecunataca sirvi tucunguichij. Shinallataj levitacunapaj yayapaj familiapi chasquishca trabajotapish ruranguichij. 6 Pascua fiestata rurangapaj animalcunata huañuchichij, cancunapish chuyayarichij. Cancunapaj huauquicunapajpish allichichij. Chashnami Jehová Dios Moisesman mandashcata pajtachinguichij” nircami.
7 Josiasca chaipi caj gentecunamanmi malta ovejacunata, malta chivocunata curca. Chai animalcunataca Pascua fiesta sacrificiocunata rurangapajmi curca. Tucui animalcunaca 30.000-mi carca. Shinallataj 3.000 torocunatapishmi curca. Tucui cai animalcunaca rey charishca animalcunami carca. 8 Reypaj mandajcunaca gentecunapaj, sacerdotecunapaj, levitacunapajmi shuj ofrendata curcacuna. Chai ofrendaca shungumanta cushca ofrendami carca. Diospaj huasipi pushaj Hilquiaspish, Zacariaspish, Jehielpish Pascua fiesta sacrificiota rurangapajmi 2.600 animalcunata sacerdotecunaman curcacuna. Shinallataj 300 torocunatapishmi curcacuna. 9 Conaniaspish, Semayapish, Netanelpish, Hasabiaspish, Jeielpish, Jozabadpish levitacunata pushajcunami carca. Semayapish, Netanelpish Conaniaspaj huauquicunami carca. Paicunaca levitacunamanca Pascua fiesta sacrificiota rurangapajmi 5.000 animalcunata curcacuna. Shinallataj 500 torocunatapishmi curcacuna.
10 Pascua fiestapajca tucuitami listo saquircacuna. Sacerdotecunaca paicuna charishca puestollapitajmi saquirircacuna. Cutin levitacunaca paicunapaj grupocunallapitajmi saquirircacuna. Chaitaca rey mandashca shinami rurarcacuna. 11 Pascua fiestata rurangapajpish animalcunatami huañuchircacuna. Levitacuna animalcunata lluchucujpica sacerdotecunaca levitacuna cushca yahuarta japishpami tsirapajcuna carca. 12 Qꞌuipaca rupachishca ofrendacunata gentecunaman cungapajmi allichircacuna. Gentecunaca yayacunapaj familiacunamanta caj grupocunapimi carcacuna. Cutin gentecunaca rupachishca ofrendacunataca sacerdotecunamanmi curcacuna. Sacerdotecunaca Jehová Diosmanmi Moisesman quillcachishca libropi mandashca shina curcacuna. Torocunahuanpish chashnallatajmi rurarcacuna. 13 Paicuna charishca costumbre shinallatajmi Pascua fiestapaj aichata ninapi yanurcacuna.* Shinallataj Diospajlla chꞌicanyachishca ofrendacunataca mangacunapi, jatun mangacunapi, pailacunapimi yanurcacuna. Chai qꞌuipaca utcami gentecunapajman aparcacuna. 14 Levitacunaca Pascua fiesta micunataca paicunapaj, sacerdotecunapajmi yanurcacuna. Aaronpaj huahua huahuacunamanta sacerdotecunaca rupachishca sacrificiocunata, animalcunapaj huiratapishmi tutacama cushpa saquirircacuna. Chaimi levitacunaca paicunapajpish, Aaronpaj huahua huahuacunamanta sacerdotecunapajpish micunata yanurcacuna.
15 Shinallataj David, Asaf, Hemán, Jedutún mandashca shinami Asafpaj churi cantajcunaca paicunapaj puestocunapi carcacuna. Jedutún runaca reypaj muscuipi shina ricushcacunata huillajmi carca. Punguta cuidajcunapish chꞌican chꞌican pungucunapimi cuidacurcacuna. Paicunapaj huauqui levitacunaca Pascua fiesta micunatami cantajcunapajpish, punguta cuidajcunapajpish yanurcacuna. Chaimi paicunapaj puestocunapi sirvinata saquinataca mana minishtircacuna. 16 Chai punllapica Pascua fiestata rurangapajmi Jehová Dios paicunaman mandashca shina tucuita allichishpa saquircacuna. Shinallataj Jehová Diospaj altarpi rupachishca ofrendacunata cungapajpishmi tucui allichishca saquirirca. Chaitaca rey Josías nishca shinami rurarcacuna.
17 Chai punllapi caj israelitacunami Pascua fiestata rurarcacuna. Levadura illaj tandata micuna fiestatapishmi canchis punllacunata rurarcacuna. 18 Profeta Samuel causashca punllacunamantaca Israelpica chashna laya Pascua fiestataca mana nunca rurashcacunachu carca. Shinallataj Israelmanta shujtaj reycunaca Josías shina, sacerdotecuna shina, levitacuna shina, Judamanta, Israelmanta chaipi cajcuna shina, Jerusalenpi causajcuna shinaca Pascua fiestataca mana rurashcacunachu carca. 19 Pascua fiestataca Josías 18 huatata mandacujpimi rurarcacuna.
20 Tucui chaita rurashca qꞌuipa, Josías Diospaj huasita allichishca qꞌuipami Egiptomanta rey Nekoca Éufrates cꞌuchupi caj Carquemis llajtapi macanacunaman llujshirca. Chaimi Josiasca rey Nekohuan macanacungapaj llujshirca. 21 Rey Nekoca: “Judá llajtamanta rey, ¿ñucapaj contraca imamantataj macanacunaman llujshingui? Ñucaca canhuan macanacunamanca mana shamunichu. Ñucanchij contrahuan macanacunamanmi shamuni. Diospish ñucataca utca macanacuchun ninmi. Cambaj allipajllataj Diosta ama jarcaichu, paica ñucahuanmi can. Can jarcajpica paica cantaca tucuchingami” nishpa huillachunmi huillajcunata cacharca. 22 Pero Josiasca mana uyashpami shujtaj laya ropata churarishpa Nekopaj contra macanacunaman rirca. Nekó nishca shimicunaca Diosmantami shamurca. Pero Josiasca mana uyashpami Meguidó pugru pambapi macanacunaman rirca.
23 Arcota charijcunaca rey Josiastami flechahuan shitarcacuna. Chaimi Josiasca paita sirvijcunataca: “Ñucaca chugririshcami cani. Ñucata caimanta llujshichichij” nirca. 24 Chaimi paita sirvijcunaca carretamanta llujshichishpa, macanacuna caishuj catij carretapi paita churashpa Jerusalenman aparcacuna. Chashna Josías huañujpimi paipaj ñaupa yayacuna maipimi pambashca carca, chaillapitaj paitaca pambarcacuna. Judapi, Jerusalenpi tucui causajcunami Josiasmantaca llaquilla sintirircacuna. 25 Jeremiasca Josiasmanta yallitaj llaquirishpami shuj cantota cantarca. Cunan punllacunacamami tucui cantaj cꞌaricunapish, huarmicunapish paicuna llaquilla cantana cantocunapica Josiasmanta cantancuna. Israel llajtapica cai cantocunata cantachunmi decidircacuna. Cai cantocunaca llaquilla cantana cantocunata quillcashca libropimi tiyacun.
26 Josiaspaj causaipish, Jehová Diospaj Leypi quillcashcacunata cazungapaj mana tucurij cꞌuyaita ricuchishcapish, 27 pai imalla rurashcacunapish callarimanta tucuringacamami Judá llajtamanta, Israel llajtamanta Reycunapaj Libropi quillcashca tiyacun.